Axkan melauak yolpakij

MIAKEJ akinmej kichiuaj ken Cristo amo kichiuaj Navidad. ¿Moyolkokouaj porque ayakmo kichiuaj Navidad? ¿Ok kilnamikij tlen okichiuayaj? ¿Inkoneuan mokuayejyekouaj amo yolpakiskej tla amo kichiuaj Navidad? Matikitakan tlen kijtouaj sekimej iTlaixpantijkauan Jehová tlen chantij itech tlatlamantli altepemej.

Tikilnamikij Jesús. Eve tlen chanti altepetl Australia okijto: “Ijkuak ayamo onikatka niiTlaixpantijka Jehová, amo nochipa oniaya teopan. Ualeua san oniaya ijkuak okichiuayaj Navidad noso Pascua. Pero amo onikilnamikiaya Jesús. Axkan amo nikchiua Navidad pero nimonechikoua inmiuan tokniuan ome uelta itech se semana uan nikinmachtia oksekimej tlen tlamachtia Biblia itech Jesús”.

Itlaj tiktetliokoliaj. Reuben tlen chanti altepetl Irlanda ik Norte okijto: “Sapanoua niyolpaki ijkuak itlaj nechtliokoliaj tlen amo onikchiaya. ¡Nechpaktia itlaj manechtliokolikan! Noijki nechpaktia nikchiuas tarjetas noso dibujos uan nikintliokolis oksekimej. Ijkon yejuan yolpakij uan ne noijki”.

Tikinpaleuiaj akinmej itlaj kinpoloua. Emily tlen chanti altepetl Australia okijto: “Tiyolpakij ijkuak tikinchiuiliaj tlakuali akinmej mokokouaj. Ualeua tikintliokoliaj postres, xochimej noso itlaj tlen uelis kinyolchikauas. Maski san tlen tonal matiyetokan uelis itlaj tikintliokoliskej oksekimej”.

Timonechikouaj inmiuan tofamiliares. Wendy tlen chanti altepetl Islas Caimán okijto: “Ijkuak timonechikouaj inmiuan tofamiliares maski amo tiiluichiuaj, konemej okachi kuali kinmixmati inkoltsin, intios uan inprimos. Noijki tofamiliares kimatij tikintlasojtlaj uan tikinpatioitaj porque tikintlajpalotiuij inkalijtik maski amo tiiluichiuaj noso maski san tlen tonal tiyetoskej”.

Nochipa timoyolseuijtoskej. Sandra tlen chanti altepetl España okijto: “Ijkuak otikchiuayaj Navidad sapanoua onitekipanouaya, ik non, amo onimokuayejyekouaya ken uelis nimoyolseuijtos. Axkan yonimomachti tlen melauak tlamachtia Biblia uan non onechyolseui. Nikmati nokoneuan uelis chantiskej itech se xochitlali”.