¿Akin okichijchi toTajtsin Dios?

Se teta kiluia ikone tlen kipia chikome xiuitl: “Yiuejkika toTajtsin Dios okichijchi tlaltikpak uan nochi tlen onka. Noijki okichijchi tonaltsin, metstli uan sitlalimej”. Pero chokotsin mokuayejyekoua uan kitlajtlania itajtsin: “Pero, ¿akin okichijchi toTajtsin Dios?”.

Itajtsin kinankilia: “Amikaj okichijchi, Ye nochipa kajki”. Chokotsin ayakmo itlaj okitlajtlani. Pero ijkuak moskaltia okachi kineki kimatis. Amo kajsikamati tleka toTajtsin Dios amikaj okichijchi. Mokuayejyekoua: “Nochi tlen onka ikaj okichijchi”, ik non, ok motlajtlania ¿Akin okichijchi toTajtsin Dios?

¿Tlen kijtoua Biblia? Ijkon ken okinankilijkej chokotsin. Moisés okilui Jehová: “Ijkuak ayamo otikchijchiuaya tepeyo, ijkuak ayamo otikchijchiuaya tlaltikpak uan ijkuak ayamo otlatlakiaya, te yotikatka tiDios uan nochipa tiyetos” (Salmo 90:1, 2). Profeta Isaías noijki ijkon okijto: “¿Amo yitikmati noso amo yitikkaki? Jehová akin oKichijchi nochi tlaltikpak, ye se Dios tlen kajki nochipa” (Isaías 40:28). Carta tlen okijkuilo Judas noijki kijtoua toTajtsin Dios “nochipa” kajki (Judas 25).

Ninmej textos kiteititia toTajtsin Dios ye “Torey non nochipa yolitok”, ijkon ken okijto apóstol Pablo (1 Timoteo 1:17). Nin kijtosneki nochipa kajki uan nochipa yetos (Apocalipsis 1:8). ToTajtsin Dios amikaj okichijchi nion uelis ixpoliuis.

¿Tleka ualeua amo ueli tikajsikamatij? Porque tejuan amo uejkika tiyoltokej, ik non, amo tikajsikamatij tleka Jehová nochipa yoltok. Para toTajtsin Dios mil xiuitl san se tonal (2 Pedro 3:8). Para tikajsikamatiskej ximokuayejyeko nin tlamantli. Se chapuli yoltok 50 tonalmej, ik non, amo uelis kajsikamatis ken momachilia ikaj yoltos 70 noso 80 xiuitl. Para toTajtsin Dios tejuan ken chapulimej porque amo tiuejkauaj, noijki amo ueli timokuayejyekouaj ken ye (Isaías 40:22; 55:8, 9). Ik non, onka seki tlamantli tlen tejuan amo ueli tikajsikamatij.

Maski amo ueli tikajsikamatij toTajtsin Dios nochipa yoltok, non melauak. Tla ikaj kichijchiuaskia toTajtsin Dios, ye moixmatiskia ken akin nochi otlachijchi. Pero Biblia kijtoua Jehová okichijchi nochi tlen onka (Apocalipsis 4:11). Noijki tejuan tikmati yiuejkika amitlaj okatka (Génesis 1:1, 2). Pero akin opejki tlachijchiua yiuejkika yokatka uan satepan okinchijchi ángeles uan noijki iKone (Job 38:4, 7; Colosenses 1:15). Ik non, ijkuak amitlaj okatka, toTajtsin Dios okatka iselti. Ye amikaj okichijchi porque amikaj iuan okatka.

Tejuan uan nochi tlen onka kiteititia toTajtsin Dios nochipa yetos. ToTajtsin Dios yokatka, ye otlachijchi uan okijto ken omonekiaya yetos nochi tlen onka. Jehová okichi ma tiyoltokan (Job 33:4).