SEKIMEJ TECHTLAJTLANIAJ

Tlen okijkuilo David itech Salmo 37:25 uan tlen okijto Jesús itech Mateo 6:33, ¿kijtosneki itekipanojkauan Jehová amo keman kinpolos tlen ika mopanoltiskej?

David okijkuilo: “Amo onikitak ma kikauakan akin yolmelauak, nion ikoneuan ma kitemokan pan” (Salmo 37:25). Tlen okijto melauak okipanok uan kuali okimatiaya Jehová nochipa okimaluiaya. Pero ninmej tlajtolmej amo kijtosnekij nion se itekipanojka Jehová amo keman kipolos tlen ika mopanoltis.

David miak uelta otlajyoui. Se neskayotl, ijkuak ocholojtinemiaya pampa Saúl okitemojtinemiaya. Yotlantoka tlakuali tlen okipiayaj uan okitlajtlanki tlakuali pampa ye uan akinmej okipaleuiayaj (1 Sam. 21:1-6). Ijkuak okachi otlajyouijtoka, David omonekiaya ‘kitemos pan’. Pero itech Biblia amo techiluia okitlajtlantinemiaya tlakuali. David kuali okimatiaya Jehová amo keman kikauaskia.

Itech Mateo 6:33 Jesús techiluia toTajtsin Dios techmakas tlen techpoloa tla achto tikchiuaj itlanekilis. Jesús okijto: “Nomejwah moneki achto xikchiwakah tlan Dios nomechnawatia iwa xikchiwakah tlan Ye kimonekiltia. Iwa ijkó Dios nomechmakas nochi tlan nomechpolos [tlakuali uan tlakemitl]”. Pero noijki okijto ijkuak kintojtokaskiaj ikniuan kinpoloskia tlakuali (Mat. 25:35, 37, 40). Ijkon okipanok tlatitlanil Pablo ijkuak otiojsiuiaya uan oamikiaya (2 Cor. 11:27).

Jehová techiluia tlatlamantli titlajyouiskej. Uan uelis kitekauilis amo ma tikpiakan tlen ika timopanoltiskej pampa titlapaleuiaj ma moteititi Diablo tlakajkayaua (Job 2:3-5). Se neskayotl, ijkuak tokniuan otlajyouijkej kanin nazis okintsakuayaj. Satanás okiyejyeko intlaneltokilis ika apistli. Pero tokniuan yolmelajkej nochipa okitlakamatkej Jehová, uan ye amo okinka. Maski okitekauili ma kinyejyekokan, ijkon ken axkan techyejyekoaj. Jehová nochipa kinpaleuia ma tlaxikokan akinmej kipaleuiaj itoka (1 Cor. 10: 13). Uelis tikilnamiktoskej tlen kijtoa Filipenses 1:29: “Ken Dios okimonekilti xitlaneltokakah inawak Cristo, yej noiwa okimonekilti xitlaijyowikah por Ye”.

Jehová yokijto amo kinkauas akinmej kitekichiuiliaj. Ijkon ken kijtoa Isaías 54:17 “Maski san tlen tepostli ika mitsixnamikiskej, amo mitstlaniliskej”. Ika ninmej tlajtolmej Jehová kiluia ialtepe kuali yetos. Pero tisejse uelis titlajyouiskej noso uelis timikiskej.