¿Tikchiua itlanekilis toTajtsin Dios?

“Tla tejuatsin tikneki itlaj san moneki tinechiluis uan ne nimitsmakas.” Nin amo tikiluiskia ikaj akin amo tikixmati. Pero kema tikiluis ijkon se moyolikni. Uan non melauak kuali, pampa nochtin tiknekij tikinpaleuiskej toyolikniuan uan tikchiuaskej tlen techiluiaj.

Biblia techmachtia Jehová kichiua seki tlamantli pampa itekipanojkauan ma yolpakikan. Se neskayotl, ueyi tekiua David, akin kuali omouikaya iuan toTajtsin Dios okijto: “Miak tlamantli moneuian otikchijchi, [...] sapanoa miakej uan amo uelis nikinpoaskia” (Salmo 40:5). Pero Jehová noijki kichiua tlamantli kuali pampa akinmej amo kixmatij. “Noiwa techmaka tlan techpoloa para matikpiakah tlan tikkuaskeh iwa matiyetokah ika pakílistli.” (Hechos 14:17.)

Ken Jehová mochijchikaua pampa kuali ma tiyetokan, tejuan noijki moneki timochijchikauaskej pampa ma yolpaki (Proverbios 27:11). Axkan ma timotlajtlanikan, ¿tlen moneki ma tikchiuakan pampa ma yolpaki toTajtsin Dios? Biblia techiluia: “Amo xikilkawakah nonkichiwaskeh tlan kuali. Xikimpalewikah akimeh amitla kipiah, ye tlan Dios kipaktia” (Hebreos 13:16). ¿Kijtosneki san moneki tikinchiuiliskej tlen kuali oksekimej?

Amo, pampa Biblia noijki kijtoa: “Pero tla se amo kipia tlaneltokálistli, mach weletis tikpaktis Dios” (Hebreos 11:6). Noijki miak ipati tlen okipanok Abrahán, pampa okitokayotijkej “itlakaikni n Dios” ijkuak otlaneltokak itech Jehová (Santiago 2:23). Uan Jesucristo noijki okijto pampa tejuan tikseliskej tlateochiualistli moneki titlaneltokaskej itech toTajtsin Dios (Juan 14:1). Tla ijkon, ¿ken uelis tejuatsin titlaneltokas pampa kuali timouikas iuan toTajtsin Dios? Achto moneki timomachtis Biblia. Ijkon tejuatsin tikmatis tlen kineki toTajtsin Dios xikchiua uan uelis tikyolpaktis ika nochi tlen tikchiua. Tla timochijchikaua pampa okachi kuali tikixmatis uan tiktlakamatis, mochikauas motlaneltokilis uan okachi timotokis itech Jehová (Colosenses 1:9, 10).