Amo onikneltokaya kajki toTajtsin Dios

TLEN ONIKCHIUAYA.

Onineski itech se altepetl tlen kajki ik República Democrática Alemana (RDA) tlen axkan kixmatij ken Sajonia. Notatajuan kuali omouikayaj uan onechmachtijkej ma nitetlakaita. Altepetl kanin otichantiayaj okipaleuiayaj partido comunista, ik non, amo okinpaktiaya religión. Ne amo onikneltokaya kajki toTajtsin Dios, onikneltokaya san omonekiaya tikpaleuiskej partido comunista.

¿Tleka oniknekiaya nikpaleuis partido comunista? Porque okijtouayaj nochtin okinpatioitayaj. Onikneltokaya para amo ma kinchikoitakan akinmej amitlaj okipiayaj omonekiaya nochtin ma kinxejxelilikan tomin. Ik non, opejki nikinpaleuia sekimej tlen opouiayaj itech partido comunista. Ijkuak onikpiaya 14 xiuitl sapanoua onitlapaleui para amo ma kitlamotlakan tlajsoli uan otikitayaj ken uelis oksepa tiktekitiltiskej tlen okitlamotlakej. Maski amo okachi miak xiuitl onikpiaya, onikinmixmatki miakej akinmej otlayekanayaj itech política. Onikneltokaya kuali tlen onikchiuaya uan satepan nikpiaskia miak tlamantli.

Pero amo ijkon opanok. Itech xiuitl 1989 oxitinki tepamitl tlen okatka ompa Berlín uan omoxelojkej partido comunista tlen okatka Europa del Este. Onikitak amitlaj ipati tlen onikchijtoka. Satepan onikmatki miakej okinchiuilijkej tlen amo kuali. Akinmej amo okipaleuiayaj partido comunista okinmitayaj amitlaj inpati. ¿Tleka ijkon okinchiuiliayaj tla yejuan okijtouayaj nochtin okinpatioitayaj? ¿San otlakajkayauayaj? Sapanoua onechtekipacho tlen onikmatki.

Opejki nikchiua okseki tlamantli, opejki nimomachtia para nitlakuikas uan nikinchiuas dibujos. Opejki nimomachtia porque oniknekiaya nias itech universidad uan nimomachtiskia nitlakuikas uan arte. Ayakmo onikchiuaya tlen onechmachtijkej ijkuak onikatka nitsikitsin. San oniknekiaya nimoyolpaktis, noijki oniauilnemiaya iuan miakej ichpochmej. Pero maski onimomachti uan onikchiuaya tlen oniknekiaya, nochipa san onimotekipachojtoka uan ijkon omotaya itech dibujos tlen onikinchiuaya. ¿Tlen nechpanoskia satepan? ¿Tlen nechpaleuiskia ma niyolpaki?

Ijkuak onikmatki tlen onimotlajtlaniaya sapanoua onimotlajtlachialti. Se tiotlak, ijkuak onikatka kanin onimomachtiaya, onikinkak sekimej telpochmej omotlapouijtokaj tlen panoskia satepan. Ompa okatka Mandy,a ye okatka iTlaixpantijka Jehová uan onechilui itlaj miak ipati. Onechilui: “Andreas, tla tikneki tikmatis tlen timotlajtlania uan tlen panos satepan, ximomachti Biblia”.

Onimotlajtlaniaya miak tlamantli pero noijki oniknekiaya nikitas kox melauak. Mandy onechititi Daniel capítulo 2 uan ijkuak oniktlajtolti sapanoua onechtlajtlachialti. Nin profecía kijtoua akinmej tlanauatiskiaj, kijtosneki tekiuajkej tlen kichiuaskiaj itlaj tlen ika kinmixmatiskiaj hasta axkan. Satepan Mandy onechititi okseki profecías tlen kijtoua ken tiyetoskej satepan. Axkan yonikmatiaya tlen onimotlajtlaniaya. Pero ¿akin okinmijkuilo profecías? ¿Akin kuali kimati ken tiyetoskej? ¿Kijtosneki kajki toTajtsin Dios?

BIBLIA OKIPATLAK NONEMILIS.

Mandy okilui Horst uan Angelika ma nechpaleuikan, yejuan noijki okatkaj iTlaixpantijkauan Jehová. Yejuan onechpaleuijkej okachi ma nimomachti Biblia. Onikajsikamatki san iTlaixpantijkauan Jehová kitekitiltiaj itoka toTajtsin Dios uan noijki kitematiltiaj (Salmo 83:18; Mateo 6:⁠9). Onimomachti Jehová kineki ma tichantikan para nochipa itech xochitlali nikan tlaltikpak. Salmo 37:⁠9 kijtoua: “Akinmej amo yolkualmej kinmixpoloskej pero akinmej mochiaj itech Jehová yetoskej itech tlaltikpak”. Sapanoua onechpakti ijkuak onikmatki tinochtin uelis tiyoltoskej tla timochijchikauaj tikchiuaj tlen toTajtsin Dios kineki.

Onikitaya oui nikchiuas tlen kijtoua Biblia porque onimoueyinekiaya porque onikmatiaya nitlakuikas uan nikchiuas dibujo, ik non, onimochijchika amo ijkon nimokuayejyekos. Noijki onikitak oui ayakmo niauilnemiskia. Niktlasojkamatilia Jehová porque kimati mochia, kinmajsikamati uan kintlasojtla akinmej mochijchikauaj kitlakamatiskej tlen kijtoua Biblia.

Achto amo onikneltokaya kox kajki toTajtsin Dios uan oniknekiaya nikpaleuis partido comunista, pero desde ijkuak onikpiaya 18 xiuitl, Biblia yonechpaleui para ma nikchiua tlen kuali. Tlen onimomachti onechpaleui uan ayakmo okachi onechtekipachouaya tlen panoskia satepan. Itech xiuitl 1993 onimoapolakti uan onimochi iTlaixpantijka Jehová uan itech xiuitl 2000 onimonamikti iuan Tabitha, ye noijki kipaktia momachtis Biblia. Timochijchikauaj tikinpaleuiskej oksekimej ma kimatikan tlen kijtoua Biblia. Miakej kinmachtiaj amo kajki toTajtsin Dios uan san moneki kipaleuiskej se partido, ijkon ken ne onikneltokaya. Sapanoua nechpaktia nikinpaleuis ma kixmatikan Jehová.

TLATEOCHIUALISTLI TLEN YONIKSELI.

Ijkuak opejki nimouika iuan iTlaixpantijkauan Jehová, notatajuan amo okinpakti. Pero satepan okitakej onechpaleuiaya tlen onimomachtiaya. Axkan niyolpaki porque noijki yejuan yopejkej momachtiaj Biblia uan noijki monechikouaj iuan iTlaixpantijkauan Jehová.

Tabitha uan ne timochijchikauaj tikchiuaskej tlen timomachtiaj itech Biblia para akinmej yomonamiktijkej uan melauak techpaleuia ma tiyolpakikan. Biblia techiluia amo ma tikkajkayauakan tonamik uan nikita techpaleuia para tejuan kuali ma timouikakan uan ma timotlasojtlakan (Hebreos 13:⁠4).

Yinikmati tlen achto onimotlajtlaniaya uan noijki tlen panos satepan. Nipoui iuan miakej iTlaixpantijkauan Jehová itech nochi tlaltikpak uan kuali timouikaj, yetoskia ken se familia. Itech nin familia tinochtin timotlasojtlaj uan timotlakaitaj, ijkon ken nochipa oniknekiaya.