¿Otikmatiaya?

¿Ken okichiuayaj yiuejkika tla okinekiayaj yaskej itech barco?

IJKUAK okatka Pablo amo okatkaj barcos para itech kanaj yaskiaj. Tla ikaj okinekiaya kanaj yas, omonekiaya tlajtlaniti kanin okintlamamaltiayaj barcos uan ompa kiluiskiaj kox uelis kiuikaskiaj uan kox panoskia kanin ye kineki yas (Hech. 21:2, 3). Ualeua barcos amo okinuikayaj kanin oksekimej okinekiayaj yaskej. Pero uelis itech yaskiaj uan temoskiaj kanin uelis kikitskiskej okse barco uan ijkon ajsitiuij kanin kinekij yaskej (Hech. 27:1-6).

Barcos amo nochipa okinuikayaj itech okseki altepemej uan amo okipiayaj hora ijkuak okisayaj. Akinmej okinuikayaj barcos san tlen amo okineltokayaj. Amo okinkixtiayaj barcos porque oejekakiauiaya. Yejuan okineltokayaj ayakmo uelis kinkixtiskiaj barcos tla se kakalotl okatka ipan barco noso okitayaj se barco oxixiniaya. Okinkixtiayaj barcos ijkuak kualtsin oejekaya porque non ejekatl okinpaleuiaya. Ik non, akin ikaj okinekiaya oksekan yas, omonekiaya yas kanin moketsaj barcos uan ompa mochiaskia.

Se ixtlamatki itoka Lionel Casson, okijto: “Itech altepetl Roma otlayektlalijkej kanin okisayaj barcos uan ijkon amo okitemojtinemiayaj tlen barco uelis kinuikaskia. Barcos okinkixtiayaj itempa aueyatl Tiber. Amo uejka okatka kanin okatka altepetl Ostia uan ompa okinpiayaj miakej oficinas. Miakej okatkaj inmiaxkauan akinmej okinpiayaj barcos. Sekimej okintokayotiayaj Narbona [axkan intoka Francia], tlen omoajsiayaj Cartago [axkan intoka Túnez] [...] uan okseki. Ijkuak ikaj okinekiaya yas itech okse altepetl, ompa oyaya tlajtlaniti kox kisaskia se barco”.

Uelis itlaj kinpanoskia akinmej oyayaj itech barco pero non okinpaleuiaya totoka ma yakan ijkuak kanaj okinekiayaj yaskej. Tlatitlanil Pablo miak uelta oapolaki ijkuak oyaya itech barcos (2 Cor. 11:25).