Xikchiuakan ijkon ken teotlajtojkej: Nahúm
1. ¿Tlen techmachtia amochtli tlen okijkuilo Nahúm?
1 Altepetl Nínive tlen yoxixinki, kiteititia melauak tlen Nahúm okijkuilo panoskia, Jehová momakuepa itech akinmej kikokoliaj. Uan amo ikaj uelis kixnamikis, maski kipias miak chikaualistli. (Nah. 1:2, 6). Ik non, timomachtiskej tlen Nahúm okijkuilo panoskia, okachi techpaleuis itech tetlapouilistli.
2. ¿Tleka teyolchikaua tlen titetlapouiaj?
2 Ma tiktemakakan yolseuilistli uan chialistli. Amochtli Nahúm moita san kiteititia tlaixkomakalistli pampa kipojpoloskiaj Nínive, altepetl itech Asiria tlen omoueyinekiaya (Nah. 1:1; 3:7). Pero non kijtosnekia kuali tlajtolmej pampa ialtepe Jehová. Teotlajtojki Nahúm, tlen itoka kijtosneki “akin Teyolseuia”, okinmilui oksekimej judíos san niman kinmixpoloskiaj akinmej kinkokoliaj. Uan noijki okinmilui, Jehová “ken se tepamitl chikauak ijkuak sapanoa timoyolkokoaj” (Nah. 1:7). Ijkuak titetlapouiaj, noijki tikinmiluiaj kuali tlajtolmej tlaltikpaktlakamej uan tikinyoleuaj ma mopaleuikan itech Jehová (Nah. 1:15).
3. Ijkon ken Nahúm, ¿ken uelis tiktekitiltiskej neskayomej ijkuak titetlapouiaj?
3 Ma tiktekitiltikan neskayomej. Jehová okinauati Nahúm ma kitekitilti neskayotl itech Tebas (noso No-amón), se altepetl egipcio tlen okipojpolojkej asirios uan ijkon okineskayoti ken kipojpoloskiaj altepetl Nínive (Nah. 3:8-10). Ijkuak tikintlapouiskej tlaltikpaktlakamej uan tikinmiluiskej tlajtlamis nochi tlen amo kuali onka ipan Tlaltikpak, ma tiktekitiltikan Biblia pampa tikteititiskej melauak mochiuas nochi tlen Jehová kijtoa. Se neskayotl, ijkuak babilonios uan medos okiteuijkej altepetl Nínive itech xiuitl 632 achto itech xiuitl 1. Pampa sapanoa okiauik, non okichi ma moskalti aueyatl Tigris uan okintlamotlak itepauan altepetl. Ijkon okipojpolojkej Nínive, ijkon ken okijto Jehová panoskia (Nah. 1:8; 2:6).
4. ¿Ken uelis kuali tikyekijtoskej uan amo oui pampa kajsikamatiskej ijkuak titetlapouiaj?
4 Kuali ma tikyekijtokan uan amo oui pampa kajsikamatiskej. Nahúm noijki okiyekijto tlen panoskia, uan tetlajtlachialti tlen okijto. Nochi kuali okiyekijto (Nah. 1:14; 3:1). Noijki ijkon, moneki ma titlajtokan amo oui pampa kajsikamatiskej (1 Cor. 14:9). Ijkuak ikaj yikin tiktlajpalotiuij, kuali ma tikyekiluikan tleka otiktlajpalotoj. Noijki ma tikinpaleuikan akinmej tikinmachtiaj ika Biblia pampa okachi ma tlaneltokakan itech Jehová, itech iTlajtol uan ma kajsikamatikan ken kinpaleuia tlen momachtiaj (Rom. 10:14).
5. ¿Ken techyolchikaua tlen okijkuilo Nahúm?
5 Nahúm melauak okineltokaya nochi mochiua tlen Jehová kijtoa, uan ijkon kiteititia amochtli tlen okijkuilo uan kipia itoka. Ik non, pampa ayakmo uejkauas kitlajtlamiskej nochi tlen kiyekana Satanás, axkan techyolseuia tlen Jehová techiluia: “Ayakmo oksepa yetos yolkokolistli” (Nah. 1:9).