Pampa okachi kuali titetlapouiskej: ken uelis titetlapouiskej ika interfono

Tleka miak ipati. Uelis timomojtiaj titetlapouiskej ika interfono. Ik non, uelis ayakmo timochijchikauaskej ika nochi toyolo tikchiuaskej tekitl tlen kuali, ¿tlen uelis tikchiuaskej pampa amo ijkon ma techpano? Moneki tikilnamikiskej ijkuak titetlapouiaj ika interfono san ijkon uelis tikintlapouiskej kuali tlajtolmej sekimej tlaltikpaktlakamej (Rom. 10:14). Seki neskayomej kiteititiaj ken kuali otetlapouijkej ika interfono (xikita Anuario 2011, páginas 65 uan 66, uan Anuario 2000, página 54, párrafo 3). Ma tikitakan ken uelis tikchiuaskej.

Ken uelis tikchiuaskej:

Ximoyektlali pampa amo tiuejkauas iuan timotlapouis, uan xikijkuilo tlen tikiluis pampa tiktlajtoltilis non tlaltikpaktlakatl itech interfono. Nin kichiuas ayakmo ximomojti. Achto xikilui tleka otiktlajpaloto. Tla ijkuilitok tlen itoka akin ompa chanti, xiknotsa ika itoka. Saiktlami, xikilui tikneki tikmakas se amatsintli, se revista noso tikkauilis ikaltempa pampa uelis okachi kimatis.
Ximokuayejyeko tlen kuali. Xiixuetska uan ximokuayejyeko tika iixpan non tlaltikpaktlakatl.
Amo ximomojti uan xiktlapoui. Kuali xiktenkixti motlajtol, amo yolik nion sapanoa chikauak xitlajto. Amo sapanoa totoka xitlajto, pero amo ximokeketi.
Kuali ximokuayejyeko. Itech uejueyij kalmej, uelis onka miakej interfonos. Ik non, uelis tikinnotsas kanaj eyi tlaltikpaktlakamej, tikinmijkuilos uan tias, pampa akinmej ompa chantij uelis momojtiskej tla kitaskej tiuejkaua itech interfonos.

Xikchiua nin itech nochi metstli:

Ijkuak nankiueyichiuaskej Jehová ken kalchanejkej, ximomachtikan ken uelis nantetlapouiskej itech interfono, amo ximotakan ijkuak nanmotlapouijtoskej.