¿Otikmatiaya?

¿Kanin okinokiayaj estli teopixkej tlen okinkixtiliayaj yolkamej ijkuak okinmiktiayaj?

ITECH altepetl Israel okatkaj teopixkej tlen sejse xiuitl okinmiktiayaj miakej yolkamej uan okintemakayaj ixpan altar. Se ixtlamatki itoka Josefo tlen okatka judío okijto achto siglo ijkuak omochiuaya Pascua okinmiktiayaj kanaj 250,000 (doscientos cincuenta mil) ichkamej. Non kijtosneki sapanoua miak estli okinkixtiliayaj yolkamej (Lev. 1:​10, 11; Núm. 28:​16, 19). ¿Kanin okinokiayaj nochi non estli?

Ixtlamatkej otlachkuakej ikuitlapan templo tlen Herodes otlanauati makichijchiuakan uan okitakej okipiaya kanin okikajkauayaj sokiatl. Non templo ye tlen okixixinijkej xiuitl 70. Yejuan okitakej okipiaya ik kanin okinokiayaj estli uan ijkon okikixtiayaj itech templo.

Matikitakan ome tlamantli tlen kiteititia ijkon okikixtiayaj estli itech templo:

• Otlakoyonijkej inakastlan altar: Amochtli Misná tlen kijtoua tlen okichiuayaj judíos kiyekijtoua tlen okichijkej: “Inakastlan altar ojka otlakoyonijkej. Ompa okinokiayaj estli tlen okinkixtiliayaj yolkamej uan atl tlen ika otlapajpakayaj. Non sokiatl oajsiaya itech aueyatl tlen itoka Cedrón”.

  Ixtlamatkej tlen axkan tlatemouaj kijtouaj melauak otlakoyonijkej inakastlan altar ijkon ken kijtoua amochtli Misná. Amochtli The Cambridge History of Judaism noijki kijtoua ijkon ochijchitoka kanin okisaya sokiatl. Kijtoua: “Xamo ik ompa okinokiayaj estli tlen okinkixtiliayaj yolkamej uan atl tlen ika otlapajpakayaj”.

• Okipiayaj miak atl: Teopixkej okinejnekiayaj miak atl porque otlachipauayaj kanin okatka altar uan kanin okinokiayaj sokiatl. ¿Kanin okikuiayaj atl? Atl okonanayaj itech non altepetl uan noijki okinechikouayaj. Se ixtlamatki itoka Joseph Patrich okiyekijto: “Amo okatka okse templo tlen sapanoua kualtsin ochijchitoka porque okipiaya kanin okiualikayaj atl, kuali otlachipauayaj uan okipiayaj kanin okinokiayaj sokiatl”.