Itlanauatiluan toTajtsin Dios okachi techpaleuiaj kuali matiyetokan
Yikipia kanaj 3500 xiuitl ijkuak israelitas ayamo oajsiayaj kanin toTajtsin Dios okinmilui kinmakaskia intlal. Ijkuakon okinmilui kinpaleuiskia amo mamokokokan ijkon ken okinmitayaj omokokouayaj akinmej ochantiayaj Egipto (Deuteronomio 7:15). Okinpaleui amo mamokokokan porque okinnauati tlen omonekiaya kichiuaskiaj. Matikitakan seki tlamantli tlen okinmilui:
Tlanauatil okijtouaya omonekiaya maltiskej uan kipakaskej intsotsol (Levítico 15:4-27).
Tlanauatil okijtouaya para uelis yaskiaj baño omonekiaya kichiuaskej nin tlamantli: “Nankipejpenaskej kanin amikaj mokajtos uan kanin amikaj namechitas para ompa uelis nanyaskej baño. Noijki tikuikas se estaca iuan tlen tikuikas. Ika non estaca moneki nantlachkuaskej ijkuak nanmotlaliskej para nanyaskej baño uan satepan nankitlalpachoskej namokuitl” (Deuteronomio 23:12, 13).
Tla ikaj okitayaj okipiaya se kokolistli tlen uelis kinpanoltiliskia oksekimej okiluiayaj oksekan machantiti. Ijkuak ayakmo omokokouaya okiluiayaj makipaka itlaken uan mamalti. Ijkon okitayaj yokatka chipauak uan uelis oksepa mokopaskia inuan oksekimej israelitas (Levítico 14:8, 9).
Noijki okiluiayaj oksekan machantiti tla ikaj okikitskiaya tlen yoixpoliuik (Levítico 5:2, 3; Números 19:16).
Ijkuakon ayamo okimatiayaj miak tlamantli ken mopajtiskej pero tlanauatilmej tlen okinmakakej israelitas sapanoua okinpaleui.
Akinmej ochantiayaj okseki altepemej okichiuayaj okseki tlamantli para mochipauaskej ijkon ken okinmachtijkej miak xiuitl achto pero amo okinpaleuiaya.
Miakej okitlamotlayaj itech ojtli itlaj tlen yopalanki. Okatka miak kokolistli uan miakej konemej oixpoliuiayaj porque okatka sokio atl, okitlamotlayaj tlakuali tlen yoijtlakauik uan noijki okseki tlamantli.
Yiuejkika tepajtijkej amo okimatiayaj tleka ikaj opeuaya omokokouaya. Akinmej ochantiayaj Egipto omopajtiayaj ika pajtli tlen ochijchitoka ika inmieso yolkamej tlen motilanaj, inkuitl pelícanos, kimichimej tlen yomikej, tlapiastli uan pan tlen yopoxkauik. Egipcios okimotlaliliayaj inkuitl noso inkuitl yolkamej para ika mopajtiskiaj.
Akinmej ochantiayaj Egipto omokokouayaj porque okatka sokio aueyatl Nilo uan okatka sokio atl tlen ika otlaajuichiayaj. Noijki miakej konemej oixpoliuiayaj porque omokokouayaj uan okipiayaj diarrea porque okikuayaj tlakuali tlen yoijtlakauik.
Pero israelitas amo okachi omokokouayaj porque okintlakamatiayaj itlanauatiluan toTajtsin Dios.