¿Ken tikinyekiluis mokoneuan tlen kijtosneki sexo?

TLEN PANOUA

Yiuejkika tetajmej, achto okintlapouiayaj inkoneuan tlen kijtosneki sexo, ijkon okichiuayaj ijkuak yejuan okitayaj inkoneuan yiuelis kajsikamatiskiaj seki tlamantli.

Pero axkan nochi yomopatlak, itech amochtli The Lolita Effect kijtoua: “Konemej maski ayamo nochi kajsikamatij, kikakij noso kitaj itech Televisión seki tlamantli tlen tlajtoua itech sexo”. ¿Ken kinmijtlakoua nin tlamantli?

¿TLEN MONEKI TIKMATIS?

San kanin tlajtouaj itech sexo. Deborah Roffman akin okijkuilo amochtli Talk to Me First okijto: “Ijkuak motlapouiaj itech películas, amochmej, tlakuikalmej, kanin kijtouaj tlen kinemakaj, televisión, mensajes, videojuegos, teléfonos uan computadoras kiteititiaj fotos uan tlajtouaj itech sexo. Ijkon miakej telpochmej uan konemej peua mokuayejyekouaj sexo sapanoua ipati”.

Akinmej tlanemakaj. Kichijchiuaj uan kinemakaj tsotsoli tlen kinchiua konemej mamokuayejyekokan nochipa moneki kuali motaskej. Amochtli So Sexy So Soon kijtoua: “Akinmej tlanemakaj kimatij konemej kinekij nochtin makinselikan, ik non, kinemakaj tsotsoli porque kimatij kikouaskej. Nochi nin tlamantli kitekitiltiaj para konemej matlakouakan uan amo para makinekikan ikaj iuan motekaskej”.

Amo san moneki tikmatis. Maski tikmatis ken kajki se carro, amo kijtosneki kuali tikuikas, noijki maski tikmatis kuali sekimej san sekan motekaskej, amo kijtosneki kuali tlen tikpejpenas.

Ijkon ken yotikitakej. Axkan okachi moneki tikinpaleuis mokoneuan para ‘makimatikah makiyejyekolikah’ kichiuaskej “tlan kuali iwa tlan amokuali” (Hebreos 5:14).

¿TLEN UELIS TIKCHIUAS?

Ximotlapoui iuan mokone. Maski tikitas oui timotlapouis iuan mokoneuan itech sexo, moneki ijkon tikchiuas (principio bíblico: Proverbios 22:6).

Amo san niman nochi xikinmilui. Ximotlapoui iuan ijkuak kanaj nanyauij noso ijkuak itlaj nankichiuaj. Para makijto tlen kimachilia, amo xiktlajtlani: “¿Mitspaktia tlen kinemakaj?”, okachi kuali xikilui: “¿Tleka kitekitiltiaj nochi nin tlamantli para uelis tlanemakaskej? ¿Tlen timokuayejyekoua?” (principio bíblico: Deuteronomio 6:6, 7).

Xikita kech xiuitl kipia. Konemej uelis kimatiskej tlen intoka intlakayo uan tlen uelis kichiuaskej ijkuak ikaj kinekis iuan motekas. Ijkuak moskaltis uelis tiktlapouis ken nesij konemej uan ijkuak yetos telpochtli okachi kajsikamatis tlen kijtosneki sexo.

Xikmachti tlen kuali. Xikmachti amo matlakajkayaua uan matetlakaita. Ijkon kuali kajsikamatis ijkuak iuan timotlapouis itech sexo. Xikilui tlen kuali tikitaj, ken san uelis motekaskej san sekan akinmej yomonamiktijkej uan xikyekilui tleka moneki ijkon kichiuas uan tlen uelis kipanos tla amo ijkon kichiua. Amochtli Beyond the Big Talk kijtoua: “Tla se telpochtli kimati ken kitaj itatajuan seki tlamantli, uelis amo san niman ikaj iuan motekas”.

Xikchiua tlen tikijtoua. Ximotlajtlani: “¿Nechpaktia ijkuak kijtouaj tlen amo kuali? ¿Nimotlakentia ken amo moneki? ¿Nechpaktia nikinmixuetskilis oksekimej?”. Tla ijkon tikchiua, mokoneuan amo kichiuaskej tlen tikinmachtia (principio bíblico: Romanos 2:21).

Ximokuayejyeko tlen kuali. ToTajtsin Dios kineki akinmej yomonamiktijkej mamoyolpaktikan ijkuak san sekan motekaj (Proverbios 5:18, 19). Ik non, xikilui mokone uelis iuan ikaj motekas ijkuak monamiktis. Ijkon amo tlajyouis ken oksekimej ijkuak san sekan moteka uan ayamo monamiktia (1 Timoteo 1:18, 19).