¿Tlen mitspaleuis xitlaxiko? seki tlamantli tlen uelis tikchiuas

Xamo tikajsis miak tlamantli tla tikneki timoyolseuis, uelis seki okachi mitspaleuis. Porque tlatlamantli tikmachiliaj ijkuak ixpoliui akin tiktlasojtlaj, ik non, amo mitspaleuis tlen okse okipaleui.

Pero onka seki tlamantli tlen miakej yokinpaleui. Tlen kijtouaj ixtlamatkej kinyolseuia akinmej moyolkokouaj. Pero tlen yejuan kijtouaj yiuejkika okijkuilojkej itech Biblia.

1: XIKINKAUILI MA MITSPALEUIKAN MOYOLIKNIUAN UAN MOFAMILIARES

• 

  Miakej ixtlamatkej kijtouaj ijkuak ixpoliui akin otiktlasojtlayaj, moneki okachi timouikaskej inmiuan oksekimej. Pero ualeua xamo tikneki tiyetos moselti uan hasta tikualanis tla oksekimej kinekij mitspaleuiskej. Pero amo ximotekipacho.

• Amo ximokuayejyeko san moneki tiyetos inmiuan oksekimej pero noijki amo moselti xiyeto. Xamo satepan tiknekis ma mitspaleuikan. Amo xikualani ijkuak tikinmiluis tlen tikneki.

• Kuali xikita keman moneki tiyetos moselti uan keman moneki tiyetos iuan oksekimej.

PRINCIPIO BÍBLICO: “Okachi kuali ome uan amo san se [...]. Uan tla se uetsi, iyolikni uelis kipaleuis” (Eclesiastés 4:9, 10).

2: XIKKUA TLEN MITSPALEUIS UAN XIKCHIUA EJERCICIOS

• Tla tikkua tlen mitspaleuis, amo okachi timotekipachos tla oixpoliuik akin otiktlasojtlaya. Xikkua kilitl, tlakilotl uan okseki tlamantli tlen amo ma kipia chiauak.

• Xikoni miak atl uan okseki tlamantli tlen mitspaleuis.

• Tla amo tikneki titlakuas, xikkua itlaj maski san tepitsin. Noijki xikilui akin tlapajtia tlen okachi uelis mitspaleuis.a

• Tla tinejnemi uan tikchiua ejercicios, mitspaleuis amo ximokuayejyeko tlen amo moneki. Sekimej ijkuak ijkon kichiuaj kilnamikij akin oixpoliuik pero oksekimej mokuayejyekouaj okse tlamantli.

PRINCIPIO BÍBLICO: “Porke amaka kikokolia ikuerpo, yej kimalwia iwa kitlakualtia” (Efesios 5:29).

3: KUALI XIKOCHI

• 

  Moneki tikochiskej pero okachi moneki kochiskej akinmej moyolkokouaj porque oixpoliuik ikaj akin okitlasojtlayaj. Porque yejuan okachi sotlauaj.

• Amo xikoni miak alcohol uan okseki tlamantli tlen okachi kipia cafeína porque non kichiuas amo kuali xikochi.

PRINCIPIO BÍBLICO: “Okachi kuali tepitsin ma timoseuikan uan amo sapanoua ma titekipanokan porque yetoskia ken tiktokaj ejekatl” (Eclesiastés 4:6).

4: XIKITA TLEN UELIS MITSPALEUIS

• 

  Tlatlamantli kimachiliaj akinmej moyolkokouaj porque oixpoliuik akin okitlasojtlayaj, ik non, moneki tikitas tlen mitspaleuis.

• Akinmej moyolkokouaj porque oixpoliuik akin okitlasojtlayaj, kinpaleuia ijkuak kijtouaj ken momachiliaj pero oksekimej amo ijkon kichiuaj. Sekimej ixtlamatkej tlatlamantli mokuayejyekouaj ijkuak ikaj kijtoua ken momachilia. Tla tikita oui tikiluis ikaj ken timomachilia, uelis tikiluis akin okachi iuan timouika.

• Sekimej kinpaleuia ijkuak chokaj pero oksekimej amo kinekij chokaskej.

PRINCIPIO BÍBLICO: “Sejse kimati tlen kimachilia” (Proverbios 14:10, Nueva Versión Internacional).

5: AMO XIKCHIUA TLEN AMO MITSPALEUIS

• 

  Sekimej para kuali momachiliskej tlauanaj uan kimotlatliliaj drogas. Ijkuak ijkon kichiuaj okachi mouijtiliaj. Maski kimachiliaj uelis kinpaleuis satepan okachi tlajyouiaj, ik non, xikita tlen mitspaleuis para amo okachi timoyolkokos.

PRINCIPIO BÍBLICO: “Amo matikchiwakah tlan weletis techijtlakos” (2 Corintios 7:1).

6: XIKITA TLEN MONEKI TIKCHIUAS

• Maski kinmiluiaj oksekimej ken momachiliaj, kichiuaj okseki tlamantli para mokuayejyekoskej okse tlamantli.

• Noijki kuali timomachilis tla tikinpia oksekimej moyolikniuan uan okachi timouika iuan tlen yitikinpia. Noijki mitspaleuis tla tikchiua tlen mitspaktia.

• Xamo satepan peuas tikchiuas okseki tlamantli uan xamo tikitas non mitspaleuia ayakmo okachi ximoyolkoko.

PRINCIPIO BÍBLICO: “Nochi moneki tikitaskej keman tikchiuaskej, [...] kauitl para tichokaskej uan kauitl para tiuetskaskej” (Eclesiastés 3:1, 4).

7: XIKCHIUA TLEN ACHTO OTIKCHIUAYA

• 

  San niman peua xikchiua tlen moneki.

• Xamo kuali timomachilis tla nochipa kualkan tikochi uan amo nochipa titekipanoua uan noijki tla tikchiua okseki tlamantli, xamo ijkon peuas okachi kuali timomachilis.

• Para amo san timoyolkokojtos, xikchiua okseki tlamantli tlen mitsyolchikauas.

PRINCIPIO BÍBLICO: “Amo san mokuayejyekojtos: Amo uejkauas inemilis, porque akin melauak toTajtsin Dios kipaleuijtok ye nochipa ma kita melauak yolpaki” (Eclesiastés 5:20).

8: AMO SAN NIMAN XIKPEJPENA TLEN TIKCHIUAS

• Miakej kipejpenaj kichiuaskej tlen ipati ijkuak yikin oixpoliuik akin okitlasojtlayaj pero amo kuali kisa.

• Amo san niman oksekan xichantiti nion oksekan xitekipanoti, amo san niman xiktlamotla tlen okipiaya akin oixpoliuik.

PRINCIPIO BÍBLICO: “Kuali kisas tlen kichiua akin kipaktia tekipanos pero amitlaj kipias akin san niman itlaj kichijtikisa” (Proverbios 21:5).

9: AMO XIKILKAUA AKIN OIXPOLIUIK

• 

  Miakej para amo kilkauaskej akin oixpoliuik kichiuaj seki tlamantli tlen ye okichiuaya.

• Nochipa xikpixto fotos uan okseki tlamantli noso xikijkuilo tlen okichi akin oixpoliuik uan ijkon amo keman tikilkauas.

• Xiktlali kanin tikitas seki tlamantli kualtsin tlen okichi akin oixpoliuik, xamo non mitspaleuis kuali ximomachili.

PRINCIPIO BÍBLICO: “Xikinmilnamiki tonalmej tlen yiuejkika opanokej” (Deuteronomio 32:7).

10: XIMOSEUI

• Ximoseui seki tonal.

• Tla amo ueli uejka tipaxialoti uelis tias se noso ome tonal aueyatl noso kanaj oksekan tinemiti.

• Noijki mitspaleuis ayakmo okachi ximoyolkoko tla tikpatla seki tlamantli tlen tikchiua.

PRINCIPIO BÍBLICO: “Xiwikih, matimosewitih kan amaka nemi” (Marcos 6:31).

11: XIKINPALEUI OKSEKIMEJ

• 

  Tla tikinpaleuia oksekimej, non kichiuas kuali ximomachili.

• Uelis tikinyolseuis akinmej moyolkokouaj porque oixpoliuik se inyolikni noso se infamiliar. Xamo yejuan noijki kinekij kijtoskej ken momachiliaj.

• Tiyolpakis tla tikinpaleuia uan tikinyolseuia oksekimej.

PRINCIPIO BÍBLICO: “Okachi yolpaki akin itlaj kitemaka uan amo ijkuak itlaj kiselia” (Hechos 20:35, TNM).

12: XIKITA TLEN OKACHI IPATI

• Tla timoyolkokoua porque oixpoliuik akin otiktlasojtlaya, mitspaleuis xikpatioita seki tlamantli.

• Xikita kox tikchijtok tlen moneki.

• Yolik xikpatla seki tlamantli.

PRINCIPIO BÍBLICO: “Okachi moneki tias ikalijtik akin moyolkokoua uan amo tias kanin iluichiuaj porque nochtin akinmej yoltokej mikiskej uan akinmej ok yoltokej moneki kilnamiktoskej” (Eclesiastés 7:2).

Moneki ma tikmatikan amitlaj uelis kichiuas ayakmo ma timoyolkokokan. Miakej akinmej moyolkokouaj porque oixpoliuik akin okitlasojtlayaj yokinpaleui seki tlamantli tlen kijtoua nin tlamachtil. Uelis tikajsis okseki tlamantli tlen mitspaleuis tla timoyolkokoua pero tla timochijchikaua tikchiuas tlen kijtoua nin revista, okachi kuali timomachilis.