TLAMACHTIL 4
Ma kichiuakan tlen kinnauatiaj
¿TLEN KIJTOSNEKI?
Akinmej nochipa kichiuaj tlen kinnauatiaj, okachi kinmakaj tekitl porque kitlamiaj inteki ijkuak moneki.
Maski konemej ok tsikitsitsintin uelis kimatiskej tleka moneki kichiuaskej tlen kinnauatiaj. Se amochtli tlen itoka Parenting Without Borders (Padres sin fronteras) kijtoa: “Ijkuak se konetl yikipia se xiuitl uan eyi metstli yiuelis tlapaleuis ikalijtik uan okachi kinekis tlapaleuis ijkuak kipias se xiuitl uan tlajko. Itech miakej altepemej ijkuak konemej yikipiaj makuili noso chikuase xiuitl, tetajmej kinyolchikauaj ma tlapaleuikan. Maski ok tsikitsitsintin yiuelis kichiuaskej miak tlamantli”.
¿TLEKA MIAK IPATI?
Miakej telpokamej uan ichpokamej oksekan yauij chantitiuij. Pero ijkuak kitaj sapanoa oui kimotemoliskej tlen ika mopanoltiskej, oksepa yauij chantitiuij iuan intatajuan. Ijkon kinpanoa porque amikaj okinmititi ken kitekitiltiskej intomin, ken tlapaleuiskej inkalijtik noso ken tekipanoskej.
Ik non, xikinmititikan namokoneuan ma tekipanokan porque non kinpaleuis ijkuak moskaltiskej. Amochtli “How to Raise an Adult (Cómo preparar a su hijo para la edad adulta) kijtoa: “Tla mokone nochipa tikmakas tlen ika mopanoltis hasta ma kajxiti 18 xiuitl, satepan tlajyouis porque amitlaj kimatis kichiuas”.
¿KEN NANKINMACHTISKEJ MA KICHIUAKAN TLEN KINNAUATIAJ?
Ma tlapaleuikan kalijtik
PRINCIPIO BÍBLICO KIJTOA: “Tla chikauak titekitis, itlaj tikmotlanilis” (Proverbios 14:23).
Konemej nochipa kinekij kinpaleuiskej intatajuan. Ik non, xikinmiluikan ma namechpaleuikan ijkuak itlaj nankichiuaj.
Sekimej tetajmej mokuayejyekoaj inkoneuan kipiaj miak tarea, ik non, ayakmo kinmiluiaj ma tlapaleuikan.
Pero ijkuak tlapaleuiaj inkalijtik xamo okachi kuali momachtiaj porque kimatij tekipanoskej uan kichiuaj tlen kinnauatiaj. Noijki amochtli Without Borders kijtoa: “Tla konemej amo tikinkauiliaj ma tlapaleuikan, ijkuak moskaltiskej xamo mokuayejyekoskej amo moneki kinpaleuiskej oksekimej [...]. Noijki san kinekiskej nochi ma kinchiuilikan”.
Ijkon ken kijtoa amochtli, tla konemej kinkauiliaj ma tlapaleuikan inkalijtik, kinmititiaj ken uelis kitemakaskej tlen kipiaj uan amo san kitaskej tlen kinpoloa. Ijkon kajsikamatij moneki tlapaleuiskej uan intatajuan okachi kintlasojtlaj.
Xikinmititikan ma kiselikan tlen amo kuali okichijkej
PRINCIPIO BÍBLICO KIJTOA: “Xikkaki ijkuak mitsnojnotsaj uan xikseli ijkuak mitsyektlaliaj, ijkon satepan okachi tiixtlamatis” (Proverbios 19:20).
Tla namokoneuan itlaj amo kuali okichijkej, amo xikinmiluikan san ijkon ma mokaua. Moneki kiseliskej intlajtlakol. Ma tikijtokan okitlapankej itlaj tlen amo inmiaxka. Moneki kijtoskej ma kintlapojpoluikan uan xamo uelis kiyektlaliskej tlen okitlapankej.
Tla namokoneuan kiseliaj intlajtlakol, kinpaleuis:
amo ma tlakajkayauakan uan ma kijtokan tlen okichijkej
amo ma kintlajtlakoltikan oksekimej
ma kijtokan intlajtlakol tlen okichijkej
ma kijtokan ma kintlapojpoluikan