Ma timouikakan iuan oksekimej
¿Tleka oui ijkon tikchiuaskej?
Tla amo techpaktia timouikaskej iuan oksekimej okachi titechikoitaskej. Tla timouikaj san iuan akinmej mokuayejyekouaj ken tejuan, uelis tikneltokaskej okachi kuali tlen timokuayejyekouaj, tlen tikmachiliaj uan tlen tikchiuaj.
Principio bíblico
“Xiktlapokah inmoyolo ijkó kemi tejvah timechtlapoliah toyolo” (2 CORINTIOS 6:13, NSUNT).
¿Tlen techmachtia non texto? Ijkuak kijtoua “toyolo”, kijtosneki tlen tikmachiliaj. Tla san techpaktia timouikaskej iuan akinmej kichiuaj ken tejuan, yetoskia ken tiktsakuaj “toyolo”. Para amo ijkon techpanos, ma timouikakan iuan akinmej okse tlamantli mokuayejyekouaj.
¿Ken techpaleuis tla timouikaj iuan oksekimej?
Ijkuak kuali tikixmatij ikaj, tikajsikamatij tleka kipaktia okse tlamantli kichiuas. Tla okachi kuali iuan timouikaj, okachi tiktlasojtlaj. Okachi tikajsikamatij ijkuak yolpaki uan moyolkokoua.
Ma tikitakan tlen okipanok se siuatl tlen motokayotia Nazaré. Ye okinchikoitaya akinmej oualayaj itech okse altepetl. Okijto: “Ijkuak inmiuan onitekipano uan opejki inmiuan nimouika, onikitak amo okipiayaj inyelis ken oksekimej onechiluijkej. Ijkuak timouikaj iuan akinmej okse tlamantli kichiuaj, ayakmo tikinteneuaj uan peua tikintlasojtlaj”.
¿Tlen uelis tikchiuas?
Ximotlapoui iuan akinmej uitsej itech okse altepetl uan okse tlamantli tlajtouaj. Uelis tikchiuas nin:
Itlaj xikintlajtlani.
Xikinyoleua ma tlakuatij mokalijtik.
Kuali xikinkaki ijkuak mitstlapouijtoskej.
Tla tikinmajsikamatij, tikinmiknomatiskej uan ayakmo tikinteneuaskej.