¿Tleka moneki tikmatiskej tla ikaj otlachijchi?

¿Tleka moneki tikmatiskej kox ikaj nochi okichijchi? Tla tikneltoka kajki toTajtsin Dios porque miak tlamantli ijkon kiteititia, xamo tiknekis tikmatis kox iaxka tlen ijkuilitok itech Biblia. Tla tikneltoka, ijkin mitspaleuis.

Okachi tiyolpakis

BIBLIA KIJTOUA: ToTajtsin Dios “nochi tlan kuali okinchiwiliaya. Iwa Ye Akin techaltitlanilia n kiawitl iwa kichiwa kuali matlatlaki, noiwa techmaka tlan techpoloa para matikpiakah tlan tikkuaskeh iwa matiyetokah ika pakílistli” (Hech. 14:17).

¿TLEN KIJTOSNEKI? Nochi tlen onka itech tlaltikpak otechtliokoli toTajtsin Dios. Okachi tiyolpakis ijkuak tikitas itech Biblia ye sapanoua mitstlasojtla.

Mitspaleuis itech monemilis

BIBLIA KIJTOUA: “Tikajsikamatis tlen kuali, tlen kipia melajkayotl uan tlen moneki” (Proverbios 2:9).

¿TLEN KIJTOSNEKI? ToTajtsin Dios omitschijchi, ik non, ye mitspaleuis xiyolpaki. Tla timomachtia tlen kijtoua Biblia, tikajsis miak tlamantli tlen mitspaleuis.

Mitsnankilis tlen tikneki tikmatis

BIBLIA KIJTOUA: “Tikajsis ixtlamatilis toTajtsin Dios” (Proverbios 2:5).

¿TLEN KIJTOSNEKI? Ijkuak tikmatis ikaj otlachijchi, tikajsikamatis tleka tiyoltokej, tleka panoua tlen amo kuali noso tlen techpanoua ijkuak tiixpoliuij. Mitspaktis tlen kijtoua Biblia.

Tikneltokas satepan kuali tiyetos

BIBLIA KIJTOUA: “Ne kuali nikmati tlen namotech nimokuayejyekojtok, ijkon kijtoua Jehová, nimokuayejyekoua itech yolseuilistli uan amo itech ouijkayotl para satepan namechmakas tlen okachi kuali” (Jeremías 29:11).

¿TLEN KIJTOSNEKI? ToTajtsin Dios kijtoua kipojpolos nochi tlen techtlajyouiltia uan ayakmo ikaj ixpoliuis. Tla tikneltoka tlen ye kichiuas, uelis tikxikos nochi tlen mitstlajyouiltis.

Okinpaleui ijkuak okimatkej ikaj otlachijchi

“Nimotlajtlachialtia porque nikita toTajtsin Dios melauak nechpaleuia. Nechpaleuia ma nikchiua tlen okachi moneki, ijkuak itlaj amo kuali nechpanoua iuan oksekimej uan ma nikita Jehová ken noyolikni...” (Cyndi, Estados Unidos).

“Niyolpaki nikmati kajki akin nochi okichijchi. Amo keman nimosotlaua porque nochipa onka miak tlamantli tlen uelis nechmachtis tlen okichijchi noso tlen kijtoua iTlajtol toTajtsin Dios” (Elise, Francia).

“Axkan okachi niyolpaki porque nikchiua tlen techiluia akin otechchijchi uan ijkuilitok itech Biblia. Ayakmo nikinteneua uan nikita ken nikinpaleuis oksekimej uan ijkon niyolpaki uan okachi kuali nikinmiskaltia nokoneuan” (Peter, Países Bajos).

“Achto san onitlakuaya, onikochiaya uan san onitekipanouaya. Amo oniyolpakiaya. Axkan nikita ken se ueyi tetliokolil niyoltos uan axkan kema niyolpaki” (Liz, Estonia).

“Nochipa nimotekipachoua pero nikmati se tonal ayakmo yetos tlen amo kuali uan ayakmo ikaj tetlajyouiltis uan non kichiua ma nimoyolseui” (Adrien, Francia).