¿TLEN TIKCHIUASKEJ IJKUAK TLAPATIOUA?

Amo matimotomintlamikan

Okachi oui tikitaj ijkuak tlapatioua. Pero uelis itlaj tikchiuaskej tlen techpaleuis.

¿TLEKA MIAK IPATI?

Ayakmo tikpiaskej tomin tla san tikajauilmatij. Timoouijtiliskej uan timotekipachoskej. Noijki tla amo tikpiaj miak tomin uelis itlaj tikchiuaskej tlen techpaleuis amo san tlen amo matikkouakan.

¿TLEN UELIS TIKCHIUASKEJ?

Amo san matimotomintlamikan. Non techpaleuis amo san matimotekipachojtokan uan tikpiaskej tlen ika titlatlaxtlauaskej ijkuak monekis.

Matikijkuilokan kech tiktlanij uan kech tomin moneki tiknejnekiskej. Satepan san matikkouakan tlen moneki. Noijki tla ayakmo tiktlanij miak tomin ayakmo miak matimotlakouikan. Tla yotimonamiktijkej matiktlajtlanikan tonamik noso tosiua tlen uelis tikkouaskej.

Matikchiuakan nin tlamantli: Nochi matiktlaxtlauakan ijkuak itlaj tikmokouiskej uan amo yolik matiktlaxtlajtiakan. Miakej yokitakej okachi kuali ijkon motlakouiskej uan amitlaj kiteuikiliaj. Noijki matikitakan kech tomin tikpiaj. Ijkon tikmatiskej kech tomin otiknejnekej uan amo san timotekipachojtoskej.

Matikitakan ken uelis tiknejnekiskej tomin maski tikitaskej oui ayakmo miak timotlakouiskej. Non techpaleuis amo san matechtekipachojto tomin.

“Achto kitas kox kajxilis itomin” (Lucas 14:28).

Kuali matitekipanokan. ¿Tlen techpaleuis amo matikpolokan toteki? Kualkan matiajsitij uan kuali matitekipanokan. Matikteititikan techpaktia titekipanoskej uan matitetlakaitakan. Matitekipanokan ijkon ken technauatiaj uan matimochijchikauakan okachi kuali tikchiuaskej toteki.

Amo san matimotomintlamikan. Matimotlajtlanikan: “¿San nimotomintlamia porque nikkoua tlen amo moneki noso nikkoua tlen amo nechpaleuia? Miakej motomintlamiaj porque kikouaj drogas, mauiltiaj ika tomin, kimokouiaj cigarros uan tlauanaj. Nin tlamantli amo kinpaleuia porque uelis mokokoskej uan kipoloskej inteki.

“Mayolpaki tlakatl tlen kipia ixtlamatilistli […]. Okachi kuali kitlanis non uan amo ken plata” (Proverbios 3:13, 14).

Matikololokan seki tomin uan ijkon tikpiaskej tlen ika titlatlaxtlauaskej ijkuak monekis. Matikololokan seki tomin para tikpiaskej tlen ika titlatlaxtlauaskej ijkuak itlaj panotikisa noso ijkuak monekis okseki tlamantli. Ijkon tikpiaskej tlen ika titlatlaxtlauaskej tla ikaj mokokos. Noijki tikpiaskej tomin ijkuak tikpoloskej toteki noso ijkuak itlaj panotikisa.

“Porque tinochtin titlajyouiaj uan uelis itlaj amo kuali techpanotikisa” (Eclesiastés 9:11).

Nin tlamantli techpaleuis matikololokan totomin

Matimotlakualchiuikan.

Patio kisa tla san timotlakualkouiaj noso tla san tikkouaj tlen tikoniskej. Amo okachi timotomintlamiskej tla timotlakualchiuiskej maski tikitaj oui. Noijki amo techijtikokos tlen tikmochijchiuiliskej porque yetos okachi chipauak.

Kuali matimokuayejyekokan tlen moneki tikkouaskej.

Achto matikijkuilokan tlen tikkouaskej uan amo matikkouakan tlen amo moneki. Amo san matikkouakan nochi tlen techpaktia.
Tla techajxilia totomintsin, matikmokouikan nochi tlen moneki uan amo san seki tlamantli matikmokouikan. Pero amo matikkouakan tlamantli tlen san niman ijtlakaui.
Amo matikkouakan tlen okachi patio.
¿Yotikyejyekojkej timotlakouiskej itech internet? Ualeua itech internet amo patio tlanemakaj. Ijkon okachi techajxilis totomin.
Matimotlakouikan ijkuak amo tlapatio. Noijki matikitakan kech tiktlaxtlauaj luz, gas, atl uan okseki tlamantli.

Achto matimokuayejyekokan tlen tikmokouiskej.

Kikixtiaj miak tlamantli yankuik akinmej kinchiuaj celulares uan okseki tlamantli porque kinekij kitlaniskej okachi miak tomin. Ikinon matimotlajtlanikan: “¿Moneki nikmokouis okse celular? ¿Moneki yinikkouas tla moneki nikpatlas? ¿Moneki nikmokouis tlen okachi yankuik?”.

Matikyektlalikan tlen ijtlakaui noso matikmokouikan tlen ayakmo yankuik.

Matikmaluikan tlen tiknejnekij para okachi mauejkaua. San niman matikyektlalikan tla itlaj ijtlakaui. Noijki okachi techajxilis totomin tla tikmokouiskej tlen ayakmo yankuik.

Matimotlatokikan.

¿Tikpiaj kanin timotlatokiskej? Tla timotlatokiskej amo monekis timotlakouitiuij tiankisko. Noijki uelis titlapatlaskej ika tlen otiktokakej, tiknemakaskej noso uelis ikaj tiktliokoliskej.

“Kuali kisas tlen kichiua akin kipaktia tekipanos” (Proverbios 21:5).

Miles tlen chanti Inglaterra okijto: “Tejuan nochipa tikitaj kox patioua tlen mojmostla tiknejnekij. Noijki tikitaj kech tomin tikpiaj itech totarjeta”.

Jeremy tlen chanti Estados Unidos okijto: “Ne uan nofamilia achto tikijkuilouaj tlen tikkouaskej ijkuak tiaskej tiankisko”.

Yael tlen chanti Israel okijto: “Ijkuak tlapatioua tikitaj tlen okachi moneki tikmokouiskej. Noijki tikololouaj seki tomintsin para uelis titlatlaxtlauaskej ijkuak itlaj monekis”.

Jeffrey tlen chanti Estados Unidos okijto: “Tejuan tikinmachtiaj tokoneuan makiyektlalikan ijkuak itlaj ijtlakaui uan amo san niman makikouatij okse yankuik. Tikinmachtiaj ken uelis kiyektlaliskej ijkuak ijtlakaui tocarro uan okseki tlamantli tlen tikpiaj tochan. Noijki nosiua uan ne amo tikmokouiaj tlen okachi yankuik”.

Hono tlen chanti Myanmar okijto: “Oniktokak verduras uan onikinmiskalti piomej uan ijkon okachi nechajxilia notomintsin. Noijki nechajxilia nikintliokolis oksekimej tlen oniktokak”.