¿TLEN TIKCHIUASKEJ IJKUAK TLAPATIOUA?

Satepan nochi kuali yetos

Xamo kanin tichantij okachi tlapatioua uan amo miak tomin tiktlanij kanin titekipanouaj. ¿Techtekipachoua tlen ika mopanoltiskej tofamilia? Tla ijkon techpanoua, xamo techtekipachoua satepan okachi tlapatiouas. Techpaleuis matimoyolchikauakan tla tikilnamiktoskej satepan nochi moyektlalis.

¿TLEKA MIAK IPATI?

Akinmej kineltokaj satepan nochi moyektlalis, amo san kichixtokej mapano tlen kuali. Non kinpaleuia makimatikan tlen uelis kichiuaskej ijkuak itlaj kixnamikij. Tepajtijkej yokitakej ken kipiaj inyelis akinmej kineltokaj satepan nochi moyektlalis:

Tlaxikouaj ijkuak itlaj kixnamikij.
Kimatij tlen kichiuaskej ijkuak mopatla innemilis.
Kuali kipejpenaj tlen kichiuaskej uan non kinpaleuia mapakikan uan amo mamokokokan.

¿TLEN UELIS TIKCHIUASKEJ?

Matikitakan ken techpaleuia Biblia. ITlajtol toTajtsin Dios techiluia tlen uelis tikchiuaskej ijkuak tlapatioua. Noijki techpaleuia matikmatikan amo toselti tikatej uan techpaleuia matikmatikan tlen tikchiuaskej ijkuak itlaj tikixnamikiskej.

“Tla kuali timokuayejyekoua, kuali tiyetos uan timomakixtis tla tikmati tlen kuali uan tlen amo kuali” (Proverbios 2:11).

Noijki matikmatikan tlen kijtoua Biblia panos satepan. Xamo tiknekiskej tikmatiskej tlen panos satepan ijkuak tikitaskej iTlajtol toTajtsin Dios kipia miak ixtlamatilistli. Uelis tikmatiskej toTajtsin Dios kineki ‘techmakas tlen okachi kuali’ uan techiluia tleka uelis tikneltokiliskej ijkon kichiuas (Jeremías 29:11). Ijkon kichiuas iTekiuajkayo.

¿TLEN KIJTOSNEKI ITEKIUAJKAYO TOTAJTSIN DIOS UAN TLEN KICHIUAS?

ITekiuajkayo toTajtsin Dios kajki iluikak uan ualtlanauatis ipan nochi tlaltikpak (Daniel 2:44; Mateo 6:10). Ijkuakon ayakmo ikaj tlajyouis, kipiaskej nochi tlen moneki, kuali yetoskej uan pakiskej. Ninmej textos kiteititiaj satepan kuali tiyetoskej.

“Tipakis uan kuali tiyetos porque tikpias miak tlamantli” (Salmo 128:2).

Akinmej kinnauatis iTekiuajkayo toTajtsin Dios “amo san nenka tekipanoskej” (Isaías 65:23).

“Yetos miak semilla ipan tlaltikpak” (Salmo 72:16).

Miakej kineltokaj tlen kichiuas toTajtsin Dios porque kimatij ye “amo tlakajkayaua” (Tito 1:2). ¿Tikneki tikmatis tlen tlamachtia iTlajtol toTajtsin Dios? ITlajtol toTajtsin Dios techyolchikaua ijkuak tlapatioua uan techpaleuia amo matimomojtikan tlen panos satepan.