TLAPOUALISTLI 103

Okalak Jesús maski kaltlatsakuil otsaktoka

IJKUAK Pedro uan Juan okiskej itech kanin okitlalijkej inakayo Jesús, María ompa omoka iselti uan opejki choka. ¡Ijkuakon, otlachixki ijtik mikakoyoktli uan okinmitak ome ángeles! Yejuan okitlajtlanijkej: ‘¿Tleka tichoka?’.

María okinnankili: ‘Okiuikakej noTeko, uan amo nikmati kanin okitlalijkej’. Ijkuakon omokuepki uan okitak se tlakatl. Nin tlakatl okitlajtlani: ‘¿Akin tiktemoa?’.

María omokuayejyeko non tlakatl okatka akin okinmatekiaya xochimej, uan omokuayejyeko uelis ye okiuikak inakayo Jesús. Ik non, okilui: ‘Tla te otikuikak, xinechilui kanin otiktlalito’. Tlakatl tlen omotlapouijtoka iuan María ye Jesús. Maski ijkon, María amo okixmatki pampa okipiaya okse inakayo. Uan ijkuak ye okinotski ika itoka, María okimatki nin tlakatl ye Jesús. María omotlalo uan okinmilui imachtijkauan Jesús: ‘¡Onikitak toTeko!’.

Satepan, itech non tonal, ijkuak ome imachtijkauan Jesús oyayaj itech altepetl Emaús, se tlakatl imiuan oyaya. Imachtijkauan sapanoa omoyolkokoayaj pampa okimiktijkej Jesús. Uan ijkuak onejnentiayaj, nin tlakatl okinyektlapoui miak tlamantli itech Biblia uan yejuan okachi kuali omomachilijkej. Saiktlami, ijkuak yejuan omoketskej pampa tlakuaskiaj, ninmej ome imachtijkauan okimatkej nin tlakatl ye Jesús. San niman ayakmo okitakej, uan yejuan omokuepkej Jerusalén pampa kinmiluiskiaj tlatitlaniltin.

Ijkuak nochi nin opanotoka, Jesús noijki omonexti ixpan Pedro. Oksekimej oyolpakej miak ijkuak okikakej nochi nin. Ijkuakon, ome imachtijkauan oyajkej Jerusalén uan okinmajsikej tlatitlaniltin. Okinmiluijkej Jesús okinmonextili ijkuak oualayaj ipan ojtli. Uan ijkuak okijtoayaj nochi nin tlamantli, ¿tikmati tlen tlamantli tlen tetlajtlachialtia opanok?

Xikita tlaixkopinal. Jesús ompa omonexti kanin yejuan okatkaj maski kaltlatsakuil kuali otsaktoka. ¡Melauak oyolpakej imachtijkauan! ¡Se tonal melauak kualtsin! ¿Tikmati keskipa omonexti Jesús? ¿Makuilpan?

Tlatitlanil Tomás amo ompa okatka ijkuak Jesús omonexti. Ik non, imachtijkauan Jesús okiluijkej Tomás: ‘¡Otikitakej toTeko!’. Maski ijkon, Tomás okijto pampa ye uelis tlaneltokas moneki kitas. Uan chikueyi tonal satepan, imachtijkauan okatkaj ijtik se kali tlen otsaktoka, uan axkan noijki ompa okatka Tomás. San niman, Jesús ompa omonexti. Ijkuakon, Tomás otlaneltokak.

Juan 20:11-29; Lucas 24:13-43.