Tlamachtil 8
Kalchanejkej nemij ken toTajtsin Dios kipaktia
¿Akin tlayekana itech kalchanejkej? (1)
¿Ken moneki mouikas tlakatl inauak isiua? (2)
¿Tlen tekitl kipia teta? (3)
¿Tlen tekitl kipia siuatl itech ikalijtik? (4)
¿Tlen kineki toTajtsin Dios ma kichiuakan tetajmej uan konemej? (5)
¿Tlen kijtoa Biblia ijkuak moxeloaj uan mokajkauaj ixpan tekiuajkej? (6, 7)
1. Biblia kijtoa tlakatl tlayekana itech ichanejkauan (1 Corintios 11:3). Tlakatl moneki kipias san se isiua uan moneki monamiktiskej inmixpan tekiuajkej (1 Timoteo 3:2; Tito 3:1).
2. Tlakatl moneki kitlasojtlas isiua ijkon ken ye motlasojtla. Moneki kitlasojtlas isiua ijkon ken Jesús kintlasojtla imachtijkauan (Efesios 5:25, 28, 29). Amo keman ma kiuiteki nion ma kitlajyouilti. Moneki kitlasojtlas uan kitlakaitas (Colosenses 3:19; 1 Pedro 3:7).
3. Teta moneki tekitis chikauak pampa kinmakas ichanejkauan tlen kinpoloa. Moneki kinmakas tlen kikuaskej, tlen ika motlakentiskej uan se kali kanin chantiskej isiua uan ikoneuan. Noijki moneki ma kinmachti ichanejkauan uan ijkon okachi ma mochikaua intlaneltokilis (1 Timoteo 5:8). Moneki ma tlayekana pampa kinpaleuis ichanejkauan ma momachtikan itech toTajtsin Dios uan itech Itlanekilis (Deuteronomio 6:4-9; Efesios 6:4).
4. Siuatl tlen yomonamikti moneki kuali kipaleuis inamik (Génesis 2:18). Moneki kipaleuis inamik pampa kinmachtiskej inkoneuan (Proverbios 1:8). Jehová kijtoa siuatl ma kinmalui ichanejkauan ika tlasojtlalistli (Proverbios 31:10, 15, 26, 27; Tito 2:4, 5). Noijki moneki kitlakaitas miak inamik (Efesios 5:22, 23, 33).
5. ToTajtsin Dios kineki konemej ma kintlakamatikan intatajuan (Efesios 6:1-3). Ye kineki tetajmej ma kinmachtikan uan ma kinyektlalikan inkoneuan. Tetajmej moneki ma yetokan iuan inkoneuan pampa momachtiskej Biblia, kinpaleuiskej ma mochikaua intlaneltokilis uan noijki moneki ma motlapouikan iuan pampa kimatiskej ken momachiliaj (Deuteronomio 11:18, 19; Proverbios 22:6, 15). Ijkuak kinyektlaliaj inkoneuan, amo keman ma kinkojkokokan (Colosenses 3:21).
6. Ijkuak akinmej yomonamiktijkej ayakmo kuali mouikaj, moneki ma kichiuakan ken kijtoa iTlajtol toTajtsin Dios. Biblia techyoleua ma titetlasojtlakan uan ma titetlapojpoluikan (Colosenses 3:12-14). ITlajtol toTajtsin Dios amo kijtoa ma moxelokan ijkuak kipiaj ouijkayotl tlen amo kipia miak ipati. Se siuatl uelis mokuayejyekos moxelos inauak inamik tla 1) amo kineki kintlakualtis ichanejkauan, 2) sapanoa kiuiteki uan uelis kikojkokos noso kimiktis uan 3) amo kikauilia ma kiueyichiua Jehová (1 Corintios 7:12, 13).
7. Akinmej yomonamiktijkej amo ma mokajkayauakan. Akin momekatia tlajtlakoa ixpan toTajtsin Dios uan inauak inamik (Hebreos 13:4). Tlakatl noso siuatl akin okikajkayajkej uelis kikajkauas inamik ixpan tekiuajkej uan san ijkon uelis monamiktis oksepa, ijkon ken kijtoa Biblia (Mateo 19:6-9; Romanos 7:2, 3). Jehová kikokolia akin mokajkaua ixpan tekiuajkej uan monamiktia iuan okse maski inamik amo omomekati (Malaquías 2:14-16).
[Tlaixkopinalmej itech página 16 uan 17]
ToTajtsin Dios kineki tetajmej ma kinmachtikan uan ma kinyektlalikan inkoneuan
[Tlaixkopinal itech página 17]
Teta tlen tetlasojtla kinmaka ichanejkauan tlen moneki uan kinpaleuia ma mochikaua intlaneltokilis.