Iyolikniuan toTajtsin Dios amo kichiuaj tlen amo kuali

Satanás techtlalilia miak tlamantli pampa ma tikchiuakan tlen amo kuali. Tla tiknekij timochiuaskej tiiyolikniuan toTajtsin Dios, moneki tiktlauelitaskej tlen Jehová kitlauelita (Romanos 12:9). Nikan nesi sekimej tlamantli tlen iyolikniuan toTajtsin Dios amo moneki kichiuaskej:

Tlajtlakol tlen kichiuaj se tlakatl uan se siuatl. “Amo ximomekati.” (Romanos 13:9.) Amo kuali motekaskej se siuatl uan se tlakatl tla ayamo monamiktiaj (1 Corintios 6:18).

Tlauanalis noso uintilis. “Iuan amo ma titlauantinemikan” (Romanos 13:13).

Temiktilis uan tlamayauilis. “Amo xitemikti.” (Santiago 2:11.) Noijki ijkuak se siuatl amo kineki kipias ikone uan kimayaui, noijki temiktia.

Tlachtekilis. “Amo xitlachteki.” (Marcos 10:19.)

Tlakajkayaualis. “Ayakmo xitlakajkayauakan” (Efesios 4:25).

Moteuiaj uan sapanoa kualanij. Jehová “kitlauelita akin kipaktia moteuis” (Salmo 11:5). Itech “tlan amo kuale tlan kichiuaj in tlakaj ika intlalnakayo [...] niman kualanij” (Gálatas 5:19, 20).

Auiltin ika tomin. “Porque nijkuak se kitlalia iyolo itech tomin, ijkuakon peua se kichiua nochi tlamantle katlej mach kuale. Sekimej kikauaj in Dios porque kinekij kipiaskej okachi de tlan ya kipiaj iuan tlajyouiaj miek itech innemilis.” (1 Timoteo 6:10.)

Kintlauelitaj akinmej tlajtoaj okse tlajtol uan akinmej uitsej itech okse altepetl. “Xikintlasojtlakan akinmej amechkokoliaj. Iuan ximotiotsajtsilikan por yen akinmej amechtlatlalochtiaj.” (Mateo 5:43, 44.)

ToTajtsin Dios techiluia nochi nin tlamantli pampa kineki ma tiyetokan kuali. Kemantika oui yetos tikchiuas tlen kuali, maski ijkon, Jehová uan iTlaixpantijkauan mitspaleuiskej pampa amo tikchiuas tlen amo kipaktia toTajtsin Dios (Isaías 48:17; 2 Corintios 4:7; Hebreos 10:24, 25).