“Mamochiua tlen Jehová kineki”

1-4. ¿Tleka Pablo oyajki Jerusalén uan tlen kipanoskia ompa?

IJKUAK Pablo uan Lucas okiskej altepetl Mileto, xamo sapanoua omoyolkokojkej kinkajteuaskej tlayekankej tlen okatkaj Éfeso porque sapanoua okintlasojtlayaj. Satepan Pablo uan Lucas otlejkokej itech barco. Yejuan okiuikayaj nochi tlen kinekiskiaj, noijki okiuikayaj tomin tlen okololojkej para kinpaleuiskiaj tokniuan tlen ochantiayaj Judea. Okinekiayaj kinuikiliskej tokniuan non tetliokolil porque ijkon omonekiaya kichiuaskej.

² Opejki ejeka uan barco opejki yaui, satepan ayakmo omokakiaya tlen opanotoka itempa mar porque uejka yoyayaj. Pablo, Lucas uan chikome tokniuan tlen inuan oyayaj okitayaj ken omoyolkokouayaj tokniuan tlen okinkajtejkej (Hech. 20:4, 14, 15). Pablo uan oksekimej tokniuan okintlajpalouayaj akinmej okinkajtejkej hasta ijkuak ayakmo okinmitakej.

³ Kanaj eyi xiuitl, Pablo okitekichiuili toTajtsin Dios inuan tlayekankej tlen okatkaj Éfeso. Pero satepan espíritu santo okiyekanki mauia Jerusalén. Pablo okimatiaya seki tlamantli tlen uelis ompa kipanoskia. Ye yokinmiluijka tlayekankej: “Espíritu santo nechyolinia manio Jerusalén maski amo nikmati tlen nechpanos ompa. San nikmati itech miakej altepemej, espíritu santo miak uelta nechmatiltia nechtsakuaskej uan nechtlajyouiltiskej” (Hech. 20:22, 23). Maski okimatiaya itlaj kipanoskia, ye okijto ‘espíritu santo okiyolini’ mauia Jerusalén uan ye ijkon okichi. Ye okinekiaya kichiuas ika pakilis uan amo san kitlakamatiskia espíritu santo. Amo kijtosneki okinekiaya makitlajyouiltikan, ye okachi okipatioitaya kichiuas tlen toTajtsin Dios kineki.

⁴ ¿Timokuayejyekouaj ijkon ken okichi Pablo? Ijkuak otimotemakakej ixpan Jehová, otikiluijkej okachi tikpatioitaskej tikchiuaskej tlen ye kineki. Ikinon timomachtiskej tlen okichi Pablo uan tikitaskej ken uelis tikchiuaskej ijkon ken ye okichi.

“Otikpanouijkej isla Chipre” (Hechos 21:1-3)

5. ¿Ik kanin opanokej Pablo uan iyolikniuan ijkuak oyajkej altepetl Tiro?

⁵ Barco kanin otlejkokej Pablo uan iyolikniuan ‘amo kanaj omoketski’. Ijkon opanok porque chikauak oejekaya uan amo kanaj opanokej ikinon non tonal oajsitoj isla Cos (Hech. 21:1). Xamo non youak ompa omoketski barco, mostlatika opanokej isla Rodas uan oajsitoj altepetl Pátara. Non altepetl okatka ik sur itempa mar ompa Asia Menor. Ompa Pátara otlejkokej itech se ueyi barco tlen okiuikaya miak tlamantli uan okinuikak hasta altepetl Tiro tlen okatka ompa Fenicia. Ijkuak oyajkej, ‘ik inmiopochma okipanouijkej isla Chipre’ (Hech. 21:3). ¿Tleka Lucas okijkuilo nochi non tlamantli?

6. (1) ¿Tleka Pablo omoyolchika ijkuak okitak isla Chipre? (2) ¿Ken timomachiliaj ijkuak timokuayejyekouaj Jehová yotechteochi uan yotechpaleui?

⁶ Xamo Pablo okintlapoui iyolikniuan tlen achto okipanok ompa Chipre ijkuak okipanouijkej non isla. Kanaj chiknaui xiuitl achto, Pablo, Bernabé uan Juan Marcos ompa okatkaj ijkuak Pablo achto uejka otetlapouito. Ijkuakon itech non isla se tlakatl tlen omotokayotiaya Elimas uan otetlajchiuiaya, amo okinkauiliaya matetlapouikan (Hech. 13:4-12). Ijkuak Pablo okitak non isla uan okilnamik tlen ompa okipanok, xamo okiyolchika makixiko tlen kipanoskia ompa Jerusalén. Tejuan noijki moneki matimokuayejyekokan ken yotechteochi Jehová uan ken yotechpaleui matitlaxikokan. Tla ijkon tikchiuaj timomachiliskej ijkon ken David omomachiliaya ijkuak okijkuilo: “Akin yolkuali sapanoua tlajyouia pero Jehová kimakixtia itech nochi non tlamantli” (Sal. 34:19).

“Ompa otikintemojkej discípulos uan inuan otimokajkej” (Hechos 21:4-9)

7. ¿Tlen okichijkej Pablo uan iyolikniuan ijkuak oajsitoj altepetl Tiro?

⁷ Pablo okipatioitaya yetos inuan tokniuan ikinon okinekiaya kinmitas. Lucas okijkuilo tlen okichijkej ijkuak oajsitoj altepetl Tiro: “Ompa otikintemojkej discípulos uan inuan otimokajkej” (Hech. 21:4). Pablo uan iyolikniuan okimatiayaj ompa altepetl Tiro okatkaj tokniuan yolkualmej ikinon okintemojkej uan xamo inuan omokajkej. Axkan tejuan akinmej tikixmatij Jehová tipakij porque maski san kanin tiaskej tikinmajsij tokniuan tlen kuali techseliaj. Tinochtin akinmej tiktlasojtlaj Jehová uan tikchiuaj tlen ye kineki, tikinpiaj toyolikniuan ipan nochi tlaltikpak.

8. ¿Tlen kijtosneki tlen kijtoua Hechos 21:4?

⁸ Lucas okijto opanok itlaj tetlajtlachialti ijkuak omokajkej chikome tonal ompa Tiro, ye okijkuilo: “[Tokniuan tlen ochantiayaj Tiro] miak uelta okiluijkej Pablo amo mauia Jerusalén porque espíritu santo ijkon okinmatilti” (Hech. 21:4). ¿Okinekiaya Jehová makichiua okse tlamantli Pablo? ¿Ayakmo okinekiaya mauia Pablo Jerusalén? Amo. Espíritu santo yokimatiltijka Pablo tlajyouiskia ompa Jerusalén, pero amo okimatilti ayakmo mauia itech non altepetl. Xamo espíritu santo okinpaleui tokniuan tlen ochantiayaj Tiro makajsikamatikan Pablo tlajyouiskia ompa Jerusalén. Yejuan okintekipachouaya tlen kipanoskia Pablo ikinon okitlatlaujtijkej amo ompa mauia. Pero Pablo oyajki Jerusalén porque okinekiaya kichiuas tlen Jehová kineki (Hech. 21:12).

9, 10. (1) ¿Tlen okilnamik Pablo ijkuak okitak tokniuan omotekipachouayaj? (2) ¿Tlen mokuayejyekouaj miakej pero tlen otlamachti Jesús?

⁹ Ijkuak Pablo okitak tokniuan omotekipachouayaj, xamo okilnamik noijki ijkon okinpanok idiscípulos Jesús, ijkuak ye okinmilui yaskia Jerusalén uan ompa kitlajyouiltiskiaj uan kimiktiskiaj. Ijkuakon Pedro omoyolkoko uan okilui Jesús: “NoTeko, ¿tleka tikijtoua mitstlajyouiltiskej? Te amo keman ijkon mitspanos”. Pero Jesús okinankili: “¡Xio Satanás! Te san techtsatsakuilia porque timokuayejyekoua ken tlakamej uan amo ken toTajtsin Dios” (Mat. 16:21-23). Jesús okinekiaya kichiuas tlen toTajtsin Dios okilui maski kimiktiskiaj uan Pablo noijki ijkon okinekiaya kichiuas. Tokniuan tlen ochantiayaj Tiro kuali tlen okinekiayaj kichiuaskej ijkon ken okichi Pedro, pero yejuan amo okajsikamatiayaj toTajtsin Dios okinekiaya Pablo mauia Jerusalén.

¹⁰ Axkan miakej amo kinekij mochijchikauaskej kichiuaskej tlen okachi ipati. Ikinon kitemouaj se religión kanin kinkauiliaj makichiuakan tlen yejuan kinekij. Pero Jesús amo otlamachti ijkon matikchiuakan. Ye okinmilui idiscípulos: “Tla ikaj kineki nouan uits, ayakmo makichiua san tlen ye kineki. Makiseli makitlajyouiltikan uan nouan mauiki” (Mat. 16:24). Okachi ipati matikchiuakan ijkon ken Jesús okichi maski ualeua oui.

11. ¿Ken okiteititijkej tokniuan tlen ochantiayaj Tiro okitlasojtlayaj uan okipaleuiayaj Pablo?

¹¹ Satepan Pablo, Lucas uan inyolikniuan oksekan oyajkej. Ijkuak yiyaskiaj, Biblia kijtoua tokniuan tlen ochantiayaj Tiro okititijkej Pablo okitlasojtlayaj uan okipaleuiayaj ika tlen kichiuaskia. Nochtin tlakamej, siuamej uan konemej inuan oyajkej Pablo uan iyolikniuan hasta itempa mar. Yejuan omotlankuaketskej, san sekan omotlatlaujtijkej uan okiluijkej kuali mauia Pablo. Satepan otlejkokej itech barco uan okinuikak altepetl Tolemaida uan ompa omokajkej inuan tokniuan se tonal (Hech. 21:5-7).

12, 13. (1) ¿Ken okiteititi Felipe okinekiaya kitekichiuilis Jehová? (2) ¿Ken uelis kichiuaskej tetajmej ijkon ken okichi Felipe?

¹² Lucas okijkuilo, satepan nochtin oyajkej iuan Pablo ompa Cesarea. Ijkuak ompa oajsitoj yejuan oyajkej ‘ichan Felipe tlen otetlapouiaya’ (Hech. 21:8).a Ye yimiak xiuitl yokitekichiuiliaya Jehová. Kanaj 20 xiuitl achto ompa Jerusalén, apóstoles okitlalijkej Felipe makita ken kinxejxeliliskiaj tlakuali tokniuan tlen yikin opejkej monechikouaj. Noijki ye nochipa otetlapouiaya. Matikilnamikikan discípulos ocholojkej Jerusalén porque opejkej kintlajyouiltiaj ikinon Felipe oyajki Samaria uan ompa opejki tetlapouia. Satepan okimachti uan okiapolakti tekiua tlen oualaya Etiopía (Hech. 6:2-6; 8:4-13, 26-38). Xamo sapanoua opakej ijkuak okitakej Felipe porque ye amo keman okika Jehová.

¹³ Felipe ochantiaya Cesarea uan ompa nochipa otetlapouiaya. Ikinon Lucas okitokayotiaya Felipe akin otetlapouiaya. Biblia noijki kijtoua ye okinpiaya naui ichpochuan tlen noijki okitematiltiayaj kuali tlajtoli, non kijtosneki yejuan noijki okichiuayaj ijkon ken intajtsin (Hech. 21:9).b Felipe omochijchika para kipaleuis ifamilia makitlasojtla uan makitekichiuili Jehová. Axkan tetajmej noijki moneki kichiuaskej ijkon ken Felipe okichi, moneki makitakan inkoneuan yejuan kinpaktia tetlapouiskej uan ijkon kinekiskej yejuan noijki ijkon kichiuaskej.

14. ¿Ken okinpaleui tokniuan ijkuak Pablo okintlajpaloto inkalijtik uan tejuan tlen uelis tikchiuaskej?

¹⁴ Kanin Pablo oyaya okintemouaya tokniuan para inuan yetoskia. Tokniuan tlen okinseliayaj Pablo uan iyolikniuan opakiayaj kinkalotiskej. Ijkuak ijkon okichiuayaj nochtin ‘omosepanyolchikauayaj’ (Rom. 1:11, 12). Axkan noijki uelis ijkon tikchiuaskej. Timosepanyolchikauaskej tla kuali tikinseliaj tokalijtik tokniuan tlayekankej itech circuito iuan insiua maski amo tikpiaj miak tlamantli (Rom. 12:13).

“Ne kuali nikmatok uelis [...] nechmiktiskej” (Hechos 21:10-14)

15, 16. ¿Tlen profecía okijto Ágabo uan tlen okichijkej akinmej okikakej?

¹⁵ Ijkuak Pablo okatka ikalijtik Felipe, ompa oajsito se tlakatl tlen omotokayotiaya Ágabo tlen nochtin okitlakaitayaj. Akinmej okatkaj ikalijtik Felipe okimatiayaj Ágabo okatka profeta. Porque ye yokijtojka tlaapistiskia ijkuak otlanauatiaya tekiua Claudio (Hech. 11:27, 28). Ijkuak ompa oajsito Ágabo, xamo omotlajtlanijkej: “¿Tleka otechitako? ¿Tlen kineki techiluis?”. Ijkuakon ye okikixtili kuetlaxtli tlen ika otlajkoilpitoka Pablo. Itech non kuetlaxtli, Pablo okitlaliaya tomin uan okseki tlamantli uan ika omotlajkoilpiaya. Ika non kuetlaxtli Ágabo omoikxilpi uan omomailpi uan satepan okijto itlaj tetlajtlachialti: “Espíritu santo kijtoua: ‘Ompa Jerusalén judíos ijkin kilpiskej akin iaxka nin kuetlaxtli. Noijki kitemaktiskej inmak akinmej amo judíos’” (Hech. 21:11).

¹⁶ Non profecía okiteititi Pablo yaskia Jerusalén. Noijki okiteititi intlajtlakol judíos ‘kitemaktiskiaj inmak akinmej amo judíos’. Akinmej okikakej profecía sapanoua omotekipachojkej. Lucas okijkuilo: “Ijkuak ijkon otikkakej, tejuan uan oksekimej tlen ompa okatkaj otiktlatlaujtijkej Pablo amo mauia Jerusalén. Pero ye otechilui: ‘¿Tleka nanchokaj uan nankichiuaj manimoyolkoko? Amo ximotekipachokan, ne kuali nikmatok uelis nechilpiskej noso nechmiktiskej ompa Jerusalén porque niktematiltia itoka toTeko Jesús’” (Hech. 21:12, 13).

17, 18. ¿Tleka Pablo amo okipatlak tlen kichiuaskia uan tlen okichijkej tokniuan?

¹⁷ Matimokuayejyekokan tlen opanok. Lucas uan tokniuan tlen ompa okatkaj okitlatlaujtijkej Pablo amo mauia Jerusalén. Sekimej hasta ochokakej. Ye okitak nonmej tokniuan okintekipachouaya tlen kipanoskia ikinon okinmilui: ¿Tleka “nankichiuaj manimoyolkoko”? Pero Pablo amo okijto ayakmo yaskia, ijkon ken ijkuak tokniuan tlen ochantiayaj altepetl Tiro okitlatlaujtijkej uan ochokakej, ye amo okinkauili makipatilikan tlen okipejpenka kichiuaskia. Ye okinyekilui tleka omonekiaya yas. Pablo okatka yolchikauak ijkon ken Jesús okatka, ikinon okijto yaskia Jerusalén (Heb. 12:2). Non amo kijtosneki Pablo okinekiaya makimiktikan, pero ye okajsikamatiaya ijkon kipanoskia porque okichiuaya ken Cristo.

¹⁸ ¿Tlen okichijkej tokniuan? Biblia kijtoua: “Ye amo okinek techkakis ikinon ayakmo itlaj otikiluijkej uan otikijtojkej: ‘Mamochiua tlen Jehová kineki’” (Hech. 21:14). Ijkon okitlakaitakej tlen okinekiaya kichiuas Pablo uan ayakmo okiluijkej amo mauia Jerusalén. Yejuan okajsikamatkej omonekiaya mamochiua tlen toTajtsin Dios kineki maski okinyolkokouaya. Satepan Pablo oyajki maski okimatiaya uelis kimiktiskiaj. Ye amo okachi moyolkokoskia tla tokniuan tlen okitlasojtlayaj san niman kikauaskiaj mauia.

19. ¿Tlen techmachtia tlen okichi Pablo?

¹⁹ Tlen okipanok Pablo techmachtia itlaj miak ipati. Amo keman matikinmiluikan tokniuan tlen kinekij okachi kitekichiuiliskej Jehová amo ijkon makichiuakan. Amo san tikijtouaj ijkuak itlaj uelis kinpanos. Sekimej tetajmej tlen kichiuaj ken Cristo kinyolkokouaj ijkuak inkoneuan kipejpenaj oksekan kitekichiuilitiuij Jehová, pero amo kinmiluiaj amo ijkon makichiuakan. Se tokni siuatl tlen itoka Phyllis tlen chanti Inglaterra, kuali kilnamiktok ken omomachili ijkuak ichpoch okipejpenki tlapaleuiti ken misionera altepetl África. Ye okijto: “Oui onikitak uan onechtekipacho porque nochpoch uejka yetoskia pero onipaki porque kuali tlen okipejpenki. Miak uelta oniktlatlaujtiaya Jehová manechpaleui. Nochpoch yokipejpenka yaskia uan amo keman onikilui amo ijkon makichiua. Ne onikmachti okachi kipatioitaskia kitekichiuiliskia Jehová. Ye yokitekichiuili Jehová 30 xiuitl itech okseki altepemej, sapanoua niktlasojkamatilia toTajtsin Dios porque yokipaleui makitekichiuilijto”. ¡Kuali tikchiuaj tla tikinpaleuiaj tokniuan okachi makitekichiuilikan Jehová!

“Tokniuan otechselijkej ika pakilistli” (Hechos 21:15-17)

20, 21. ¿Tleka Pablo okipaktiaya yetos inuan tokniuan?

²⁰ Ijkuak otlankej omoyektlalijkej Pablo uan iyolikniuan, oyajkej Jerusalén. Ijkuak ompa oyayaj nochipa okintemouayaj tokniuan para inuan yetoskiaj. Ompa altepetl Tiro okinmajsikej tokniuan uan inuan omokajkej chikome tonal. Altepetl Tolemaida okintlajpalojtikiskej tokniuan uan inuan omokajkej se tonal. Itech altepetl Cesarea omokajkej seki tonal ikalijtik Felipe. Satepan sekimej tokniuan tlen ochantiayaj Cesarea okinuikakej Pablo uan iyolikniuan hasta Jerusalén. Ijkuak ompa oajsitoj, okinseli ikalijtik se tlakatl tlen omotokayotiaya Mnasón tlen ‘yokipiaya miak xiuitl omochi discípulo’. Lucas okiyekijto: “Tokniuan otechselijkej ika pakilistli” (Hech. 21:17).

²¹ Pablo okipaktiaya yetos inuan tokniuan. Tejuan noijki timoyolchikauaj ijkuak tikatej inuan tokniuan ijkon ken okipanok Pablo. Tokniuan okiyolchikajkej matlaxiko porque okinekiayaj kimiktiskej akinmej okikokoliayaj.