Tlanojnotsalis itech tlaneltokilis, itech nemilis uan tlasojtlalis

SANTIAGO uan Judas okatkaj itlakpaikniuan Jesús, Pedro uan Juan okatkaj itlatitlaniluan. Yejuan naui, ika itlayekanalis toTajtsin Dios okijkuilojkej chikome amatlajkuilolmej tlen nesij itech Escrituras Griegas Cristianas, uan inamatlajkuiloluan kipia intoka. Yejuan kinekiaj kinpaleuiskej tlaneltokakej ma yetokan yolmelajkej inauak toTajtsin Dios uan iTekiuajkayo.

Ma monexti tlaneltokilis. Amo san tikijtoskej tikpiaj tlaneltokilis; moneki tikteititiskej ika tlen tikchiuaj. Ken kijtoa Santiago, “Tla akaj kijta kineltoka Dios pero mach kichiua tlan kineltoka, [...] kijtosneki miktok itlaneltokalis” (Santiago 2:17). Akin kixikoa tlajyouilis ika miak tlaneltokilis okachi mochikaua. Noijki uelis kitlajtlanilis ixtlamatilis toTajtsin Dios, pampa kimati kinankilis. Tla yolmelajki inauak Jehová, ye kiteochiuas (Santiago 1:2-6, 12). ToTajtsin Dios nochipa kipaleuia akin kipia iyolo ajsitok inauak Ye. Ik non, Santiago teyoleua: “Ximijkuanikan inauak Dios, iuan Yej mijkuanis amonauak” (Santiago 4:8).

Akinmej kichiuaj ken Cristo moneki kichikauaskej intlaneltokilis pampa kiixtopeuaskej tlen teyoltilana uan tlen amo kuali. Judas akin onemia kan okatka miak auilnemilis, kinyoleua “ximochijchikauakan para amo xikpolokan tlan tikneltokaj” (Judas 3).

Ma mopia nemilis chipauak. Jehová kichia ke itekipanojkauan ma yetokan yolchipauakej itech nochi innemilis. Pedro kijkuiloa: “Moneki ke nochi tlan ankichiuaskej xikchiuakan ika amoyolo chipauak [...] in tiotlajkuilole ijkin kijta: ‘Namejuan xiekan anyolchipauakej porke Nej [Jehová] niyolchipauakʼ” (1 Pedro 1:15, 16). Ik non, uelis kichiuaskej ken Cristo, akin ken kijtoa tlatitlanil, okinkauili se neskayotl “para noijki xikxikokan ijkon ken Yej okixikoj” (1 Pedro 2:21). Maski oui yetos kitlakamatiskej itlanauatiluan toTajtsin Dios, tlen okachi moneki “ma chipa[j]to namotlalnamikilis” (1 Pedro 3:16, 17). Pedro kiyekijtoa ke moneki ma kipiakan se nemilis chipauak uan ma kinextikan ika tlen kichiuaj ke tlaneltokaj itech toTajtsin Dios ijkuak kichiaj ma ualajsi Tonal itech Tlaixkomakalis uan noijki yankuik Tlaltikpak, “kan nochtin kichiuaskej tlan Dios kineki” (2 Pedro 3:11-13).

Ma monexti tlasojtlalis. “Porke Dios Yej tetlasojtlak” ijkon kijtoa Juan. Jehová okiteititi ke techtlasojtla miak ijkuak okiualtitlanki iKone “ma mikiki [...] para ijkon ma techtlapojpolui de totlajtlakol”. ¿Ken uelis tiktlasojkamatiskej non tlasojtlalis? Juan kiyekijtoa: “Notetlasojkaikniuan, tla ijkon nik otechtlasojtlak toTajtsin Dios, [en]tonces moneki tejuan noijki ma timotlasojtlakan se iuan okse” (1 Juan 4:8-11). Uelis tikteititiskej ke tikintlasojtlaj tokniuan tla kuali tikinseliaj akinmej techtlajpaloaj tokalijtik (3 Juan 5-8).

¿Uan ken kiteititiaj akinmej kichiuaj ken Cristo ke kitlasojtlaj Jehová? Juan tlanankilia: “Tla tiktlasojtla in Dios [en]tonces ma tikchiuakan tlan technauatia, iuan tla Yej technauatia ma tikchiuakan mach sa tekitl tetlasojtlaj” (1 Juan 5:3; 2 Juan 6). Akinmej kitlakamatij toTajtsin Dios kuali kimatij ke uelis kipiaskej Itlasojtlalis uan kichiaj “in yankuik nemilistle katlej mach keman tlamis” (Judas 21).

(Okisak itech Santiago, 1 Pedro, 2 Pedro, 1 Juan, 2 Juan, 3 Juan uan Judas)