Rebeca okinekiaya kiyolpaktis Jehová

Rebeca okatka se siuatl tlen okitlasojtlaya Jehová. Inamik omotokayotiaya Isaac. Ye noijki okitlasojtlaya Jehová. Rebeca, ¿ken okixmatki Isaac? ¿Ken okiteititi okinekiaya kiyolpaktis Jehová? Okachi ma timomachtikan itech ye.

Itatajuan Isaac okatkaj Abrahán uan Sara. Yejuan ochantiayaj itech altepetl Canaán, tlaltikpaktlakamej akinmej ompa ochantiayaj amo okiueyichiuayaj Jehová. Maski ijkon, Abrahán okinekiaya itelpoch ma monamikti iuan se siuatl tlen okiueyichiuaya Jehová. Ik non, okititlanki se itekipanojka, uelis Eliezer, pampa ma kitemoti se siuatl pampa Isaac itech altepetl Harán kanin ochantiayaj sekimej ikalchanejkauan Abrahán.

Eliezer oyajki iuan oksekimej itekipanojkauan Abrahán. Melauak sapanoa uejka oyajkej. Yejuan okiuikayaj tlakuali uan tetliokolil itech majtlaktli camellos. ¿Ken uelis kimatiskia Eliezer akin kipejpenaskia pampa ma yeto isiua Isaac? Ijkuak Eliezer uan oksekimej oajsitoj Harán, yejuan omoketskej pampa Eliezer okimatiaya tlaltikpaktlakamej yaskiaj kikuitiuij atl. Ye okitlatlaujti Jehová uan okilui, ‘Ichpochtli tlen nikiluis xinechmaka atl uan ye nechmakas atl uan noijki nocamellos, ijkon nikajsikamatis ye siuatl tlen otikpejpenki’.

Ijkuakon ichpochtli Rebeca oajsito kanin kajki atekochtli. Biblia techiluia ye sapanoa kuajkualtsin okatka. Eliezer okilui ma kimaka atl uan Rebeca okilui: ‘Kema. Ne nimitsmakas atl te uan noijki mocamellos’. ¡Ximokuayejyeko! Ijkuak camellos amikij konij miak atl, ik non, Rebeca sapanoa totoka okisasakak atl pampa kinatlitis. ¿Tikita itech tlaixkopinal ken sapanoa chikauak tekititok?... Eliezer omotlajtlachialti ken Jehová okinankili itlatlaujtilis.

Eliezer okitliokoli Rebeca miak tlamantli kualtsitsintin. Uan Rebeca okinmilui Eliezer uan oksekimej itekipanojkauan ma mokauakan ikalijtik ikalchanejkauan. Eliezer okiyekilui ken Abrahán okititlanki ompa uan ken Jehová okinankili itlatlaujtilis. Ikalchanejkauan Rebeca sapanoa oyolpakiayaj uan okikauilijkej ma monamikti iuan Isaac.

Maski ijkon, ¿tikneltoka Rebeca okinekiaya monamiktis iuan Isaac?... Rebeca okimatiaya Jehová okititlanki Eliezer. Ik non, ijkuak ikalchanejkauan Rebeca okitlajtlanijkej kox okinekiaya yas Canaán pampa monamiktis iuan Isaac, ye okijto: ‘Kema, nikneki nias’. San niman oyajki iuan Eliezer. Ijkuak oajsitoj Canaán ye omonamikti iuan Isaac.

Rebeca okichi ijkon ken Jehová okinekiaya uan Jehová okiteochi. Miak xiuitl satepan Jesús oneski itech ikalchanejkauan. Tla tikchiuas ken Rebeca uan tikyolpaktis Jehová ye mitsteochiuas.