Xiyeto yolmelajki iuan monamik

Jehová kineki ma tiktlasojtlakan melajkayotl (Miqueas 6:8). Uan nin miak ipati itech namiktilistli, pampa tla amo tiyolmelajki iuan monamik ye amo uelis mitsneltokas. Uan moneki ma mitsneltoka pampa okachi nanmotlasojtlaskej.

Axkan itech namiktilistli okachi oui yetoskej yolmelajkej pampa onka miak tlamantli tlen kichiua amo ma yetokan yolmelajkej. Pampa tikmaluis monamiktilis moneki tikchiuas ome tlamantli.

1 XIKPATIOITA MONAMIKTILIS

BIBLIA KIJTOA: “Nochipa nonkimatiskeh ken ijki nonkipejpenaskeh tlan okachi kuali” (Filipenses 1:10). Itech nochi monemilis okachi ipati monamiktilis. Ik non, moneki xikpatioita.

Jehová kineki san ximotekipacho itech monamik uan ijkon nanyolpakiskej (Eclesiastés 9:9). Jehová kijtoa moneki nochipa timotekipachos itech monamik, pero noijki moneki timochijchikauas pampa ma yolpaki (1 Corintios 10:24). Monamik ma kita melauak timotekipachoa itech uan tiktlasojtla.

TLEN UELIS TIKCHIUAS:

• Ximochijchikaua pampa nochipa tiyetos iuan monamik uan ximotekipacho itech

• Moneki timokuayejyekos itech namome uan amo san motech

2 XIKMALUI MOYOLO

BIBLIA KIJTOA: “Nochi tlakatl non kelewia se siwatl non amo iaxka, kijtosneki yokimomekati itech iyolo” (Mateo 5:28). Ikaj uelis kikajkayauas inamik tla mokuayejyekojtok itech auilnemilistli.

Jehová kijtoa tejuatsin moneki “xikmalui moyolo” (Proverbios 4:23; Jeremías 17:9). Ik non, moneki tikinmaluis moixtololouan (Mateo 5:29, 30). Moneki tikchiuas ken Job akin omoka iuan ixtololouan amo keman kitas okse siuatl pampa kinekis motekas iuan (Job 31:1). Amo keman xikita auilnemilistli noso pornografía. Uan amo keman xiktlasojtla okse.

TLEN UELIS TIKCHIUAS:

• Oksekimej ma kitakan san tiktlasojtla monamik

• Ximotekipacho itech tlen kimachilia monamik, uan ximochijchikaua pampa ayakmo timouikas iuan akin monamik uelis chauati