TLAMACHTIL 2
Biblia iTlajtol toTajtsin Dios
1, 2. ¿Tleka Biblia se kualtsin tetliokolil?
¿KEN timomachilia ijkuak se moyolikni itlaj mitstliokolia? Xamo san niman tikneki tikitas tlen omitsmakak. Ijkon kiteititia mitstlasojtla, ik non, sapanoa tiyolpaki uan tiktlasojkamatilia.
2 ToTajtsin Dios otechtliokoli Biblia. Tlen ompa ijkuilitok amo kijtoaj okseki amochmej. Biblia techiluia toTajtsin Dios okichijchi tlaltikpak uan iluikak. Noijki kijtoa okichijchi achto tlakatl uan achto siuatl. Tlen kijtoa Biblia techpaleuia ijkuak titlajyouiaj uan amo tikmatij tlen tikchiuaskej. Noijki kijtoa toTajtsin Dios kiyektlalis tlaltikpak uan techyekiluia ken kichiuas. Ik non, Biblia se kualtsin tetliokolil.
3. ¿Tlen tikajsikamatis ijkuak timomachtijtias Biblia?
3 Ijkuak timomachtijtias Biblia, tikajsikamatis toTajtsin Dios kineki iuan ximouika. Ijkuak okachi tikixmatis, okachi tiktlasojtlas.
4. Xikijto tlen okachi mitstlajtlachialtia itech Biblia.
4 Biblia yokitlajtolkopkej nochi noso san tlajko ika kanaj 3,000 tlajtolmej, noijki sapanoa miakej yokinchijchijkej. Itech nochi tlaltikpak miakej kipiaj Biblia ika intlajtol. Sejse semana, kintemakaj miakej biblias. Amo onka okse amochtli ken Biblia.
5. ¿Tleka Biblia iTlajtol toTajtsin Dios?
5 “Dios otlanawati makijkuilokah” Biblia (xiktlajtolti 2 Timoteo 3:16). Pero ualeua sekimej kijtoaj: “Biblia okijkuilojkej tlakamej, ik non, amo itlajtol Dios”. Pero Biblia kijtoa: “Profetas [...] ika iweletilis n Espíritu Santo nochipa okitenkixtijkeh tlan Dios okinekia makitematiltikah” (2 Pedro 1:21). ¿Ken okinmatilti toTajtsin Dios tlen okinekiaya ma kijkuilokan? Opanok ken ijkuak se tlakatl kiluia ikone ma kijkuilo se carta. Carta amo iaxka ikone, iaxka tlakatl porque ye okiluijtia tlen kijkuiloskia. Noijki ijkon, Biblia kipia iTlajtol toTajtsin Dios, amo kipia tlen omokuayejyekojkej akinmej okijkuilojkej. Ik non, nochi tlen ijkuilitok itech Biblia melauak “itlajtol Totajtsi Dios” (1 Tesalonicenses 2:13; xikita nota 2).
Traducción del Nuevo Mundo de las Santas Escrituras yokitlajtolkopkej ika miakej tlajtolmej.
SE AMOCHTLI TLEN KIJTOA TLEN MELAUAK UAN AMO MOTLAJTOLNAMIKI
6, 7. ¿Tleka Biblia amo motlajtolnamiki?
6 Ouejkajkej kanaj 1,600 xiuitl okijkuilojkej nochi Biblia. Tlatlamantli xiuitl okatkaj akinmej okijkuilojkej. Sekimej oyajkej escuela uan oksekimej amo. Se otlapajtiaya, oksekimej otlatokayaj, omichkitskiayaj, otlajpiayaj, sekimej okatkaj profetas, sekimej okatkaj jueces uan oksekimej okatkaj uejueyij tekiuajkej. Maski Biblia amo okijkuilo san se tlakatl, amo motlajtolnamiki, san se tlamantli tlamachtia kanin peua hasta kanin tlami.a
7 Itech amochtli Génesis kijtoa ken opejki ouijkayotl tlen tinochtin tikixnamikij. Kanin tlami Biblia kijtoa toTajtsin Dios kachiuas nochi tlen techtlajyouiltia uan kikopas tlaltikpak se xochitlali. Biblia techtlapouia tlen opanok yiuejkika uan non kiteititia toTajtsin Dios nochipa kichiua tlen kijtoa.
8. Xikijto tleka tlen kijtoa Biblia mouika ika tlen kijtoaj ixtlamatkej.
8 Biblia amo okijkuilojkej para ma techmachti ciencia nion para ika tlamachtiskej itech escuela. Pero mouika ika tlen kijtoaj ixtlamatkej. Ijkon moneki yetos porque otechmakak toTajtsin Dios. Itech amochtli Levítico, toTajtsin Dios okinmilui israelitas ken omonekiaya momaluiskej uan ijkon amo okachi mokokoskiaj. Non omoijkuilo achto momatiskia ken opejki seki kokolistli. Biblia noijki okijto “tlaltikpak amitlaj itech mokitskijtok” (Job 26:7). Ijkuak miakej okineltokayaj tlaltikpak patlauak, Biblia yokijtoaya tlaltikpak tolontik (Isaías 40:22).
9. ¿Tlen tikmatij akinmej okijkuilojkej Biblia okijtojkej nochi tlen opanok?
9 Nochi tlen kijtoa Biblia melauak ijkon opanok. Pero miakej tlen okijkuilojkej tlen yiuejkika opanok, amo okijkuilojkej nochi tlen opanok. Amo okijkuilojkej ijkuak okitlanilijkej inmialtepe. Pero akinmej okijkuilojkej Biblia noijki okijkuilojkej ijkuak okitlaniliayaj altepetl Israel. Noijki okijtojkej tlen amo kuali okichijkej. Itech amochtli Números, Moisés okijkuilo toTajtsin Dios okiyektlali porque okichi tlen amo kuali (Números 20:2-12). Akinmej okijkuilojkej Biblia okijtojkej nochi tlen opanok, non kiteititia iTlajtol toTajtsin Dios, ik non, uelis tikneltokaskej tlen ompa kijtoa.
BIBLIA TECHPALEUIA MA TIYOLPAKIKAN
10. ¿Tleka tlen Biblia kijtoa ok techpaleuia kuali ma tiyetokan?
10 Biblia “Dios otlanawati makijkuilokah, [uan ika] kuali matechmachtikah, ika matechnonotsakah, [uan] ika matechmilawakah” (2 Timoteo 3:16). Jehová otechmakak Biblia, ik non, tlen ompa kijtoa techpaleuia kuali ma tiyetokan. Jehová kajsikamati tlen timokuayejyekoaj uan tlen tikmachiliaj porque ye otechchijchi. Ye okachi kuali techixmati uan kineki ma tiyolpakikan. Kimati tlen techpaleuia uan tlen techijtlakoa.
11, 12. 1) ¿Tleka tlen okijto Jesús itech Mateo 5 a 7 techpaleuia? 2) ¿Tlen okseki tlamantli tlen Biblia kijtoa noijki techpaleuia?
11 Itech Mateo 5 a 7, kijtoa miak tlamantli tlen techpaleuia. Ompa Jesús okijto ken uelis tiyolpakiskej uan ken timouikaskej iuan oksekimej. Noijki kijtoa ken moneki timotlatlaujtiskej uan ken moneki tikitaskej tomin. Tlen okijto Jesús yikipia dos mil xiuitl pero axkan noijki techpaleuia.
12 Biblia noijki techiluia ken uelis tiyolpakiskej iuan tokalchanejkauan, ken kuali titekitiskej uan ken uelis tiyetoskej ika yolseuilistli iuan oksekimej. Tlen kijtoa Biblia tinochtin techpaleuia, maski san kanin tikatej uan maski san tlen ouijkayotl tikpiaj (xiktlajtolti Apocalipsis 1:3; xikita nota 3).
PROFECÍAS TLEN KIJTOA BIBLIA MELAUAK MOCHIUAJ
Isaías okijto ken kipojpoloskiaj Babilonia.
13. ¿Ken okijto Isaías kimoaxkatiskiaj Babilonia?
13 Miakej profecías tlen Biblia okijto yomochijkej. Profeta Isaías okijto Babilonia kipojpoloskiaj uan noijki okiyekijto ken kimoaxkatiskiaj (Isaías 13:19). Babilonia okinpiaya uejueyij puertas uan noijki okiyaualojtoka se aueyatl. Isaías okijto aueyatl uakiskia, puertas tlapotoskiaj uan akinmej kimoaxkatiskiaj amo moteuiskiaj. Noijki okijto tlakatl tlen kimoaxkatiskia altepetl motokayotiskia Ciro (xiktlajtolti Isaías 44:27-45:2; xikita nota 4).
14, 15. ¿Ken omochi tlen okijto Isaías?
14 Tlen Isaías okijkuilo, omochi kanaj 200 xiuitl satepan. Ijkuakon, miakej soldados oajsitoj Babilonia para kimoaxkatiskiaj. ¿Akin okinyekanaya? Akin otlanauatiaya Persia. ¿Ken omotokayotiaya? Ciro, ijkon ken okijto Isaías. Nochi okseki tlamantli tlen okijto noijki mochiuaskia.
15 Ijkuak okimoaxkatijkej Babilonia, akinmej ompa ochantiayaj oiluichijtokaj. Omokuayejyekojkej amitlaj kinpanoskia porque aueyatl okiyaualoaya altepetl uan okipiaya ueyi tepamitl. Pero Ciro uan isoldados okapantijkej aueyatl. Ik non, atl otemok uan ijkon soldados ik ompa opanokej. Pero ¿ken kipanouiskiaj tepamitl? Otlatlapotoka ijkon ken okijto Isaías. Ijkuakon, soldados san niman okalakej uan amo omoteuijkej.
16. 1) ¿Ken okijto Isaías mokauaskia Babilonia? 2) ¿Ken tikmatij melauak omochi tlen okijto Isaías?
16 Isaías noijki okijto satepan ayakmo ikaj chantiskia ompa Babilonia. Ijkin okijkuilo: “Amo keman ikaj ompa chantis nion akinmej satepan nesiskej” (Isaías 13:20). ¿Omochi tlen okijto Isaías? Kema. Babilonia okatka kanaj 80 kilómetros itech Bagdad tlen kajki ik sur ompa Irak. Pero axkan ompa sepa amitlaj onka nion amikaj chanti. Ijkon ken kijtoa Biblia, Jehová okipojpolo “ika tlachpano tlen tlaxixinia” (Isaías 14:22, 23).b
Ijkin mota kanin okatka Babilonia
17. ¿Tleka uelis tikneltokaskej mochiuas nochi tlen yokijto toTajtsin Dios?
17 Yomochijkej miakej profecías tlen kijtoa Biblia, ik non, uelis tikneltokaskej melauak mochiuas tlen ok poliui. Jehová melauak kikopas nochi tlaltikpak se xochitlali (xiktlajtolti Números 23:19). ToTajtsin Dios yokijto uelis tiyoltoskej nochipa uan melauak ijkon mochiuas porque ye “amo tlakajkayawa” (Tito 1:2).c
BIBLIA MITSPALEUIS XIKPATLA MONEMILIS
18. ¿Tlen okijkuilo tlatitlanil Pablo?
18 Yotimomachti amo onka okse amochtli ken Biblia. Amo motlajtolnamiki uan mouika ika tlen kijtoaj ixtlamatkej. Kijtoa miakej profecías tlen melauak opanok uan techpaleuia nochi tlen kijtoa. Ijkon ken okijkuilo tlatitlanil Pablo “itlajtol Dios yolitok iwa kipia weletílistli”. ¿Tlen kijtosneki non? (Xiktlajtolti Hebreos 4:12).
19, 20. 1) ¿Ken uelis mitspaleuis Biblia? 2) ¿Ken uelis tikteititis tiktlasojkamati non tetliokolil?
19 Biblia mitspaleuis xikpatla monemilis. Uelis mitspaleuis xikmati tlen tikpia itech moyolo uan ijkon tikajsikamatis tlen tikmachilia uan tlen timokuayejyekoa. Xamo timokuayejyekoaj tiktlasojtlaj toTajtsin Dios. Pero moneki tikchiuaskej tlen kijtoa Biblia uan ijkon tikititiskej tiktlasojtlaj.
20 Biblia melauak iTlajtol toTajtsin Dios. Ye kineki xiktlajtolti, ximomachti uan xikpatioita. Xiktlasojkamatili non tetliokolil. ¿Ken uelis tikchiuas? Okachi ximomachti uan ijkon tikajsikamatis ken kineki toTajtsin Dios ma tiyetokan. Okachi timomachtiskej nin tlamantli itech okse tlamachtil.
a Sekimej kijtoaj Biblia motlajtolnamiki pero non amo melauak. Tla tikneki tikmatis okachi, xikita amochtli La Biblia... ¿la Palabra de Dios, o palabra del hombre?, tlamachtil 7 tlen okichijchijkej iTlaixpantijkauan Jehová.
b Tla tikneki tikmatis okseki tlamantli tlen kijtoa Biblia, xikita revista ¡Despertad! de junio 2012, itech tlamachtil “La Biblia, un libro de profecías exactas. Parte 2”, páginas 12 a 14, tlen kichijchiuaj iTlaixpantijkauan Jehová.