Amatlajkuilol tlen techmaka Cuerpo Gobernante
Toknitsin:
Ken tejuatsin tikmati, Biblia tlajtoa itech tlaltikpaktlakamej tlen melauak okatkaj. Miakej siuamej uan tlakamej yolmelajkej okinpanok ken tejuan (Santiago 5:17). Sekimej itlaj okintekipachoaya, okipixkej ouijkayotl noso okinyolkokojkej oksekimej akinmej noijki okiueyichiuayaj toTajtsin Dios. Sekimej omotlajtlakoltiayaj ika itlaj tlen okichijkej.
¿Okikajkej Jehová ninmej tlaltikpaktlakamej? Amo. Sekimej okichijkej ken salmista akin omotlatlaujti: “Yonimopolo ken ijkuak poliui se ichkatsin. Xiktemo motekipanojka, pampa ayamo nikinmilkaua motlanauatiluan” (Salmo 119:176). ¿Ijkon yotimomachili?
Jehová amo keman kinmilkaua akinmej moxeloaj. Ye kintemoa uan kichiua ika tokniuan. Ximokuayejyeko ken Jehová okipaleui Job, ye sapanoa otlajyoui, okipolo nochi tlen okipiaya, omikej ikoneuan uan omokoko. Sekimej tlaltikpaktlakamej okiluijkej miak tlamantli tlen okiyolkoko uan amo okipaleuijkej. Maski amo okika Jehová, itech seki kauitl omokuayejyeko tlen amo kuali (Job 1:22; 2:10). Jehová, ¿ken okipaleui Job?
Ika Elihú Jehová okipaleui Job. Ijkuak Job otlajtojtoka, Elihú achto okikak uan satepan okilui tlen omokuayejyekoaya. ¿Tlen kiluiskia? ¿San kiteneuaskia? ¿San itech tlajtoskia uan kiluiskia itlajtlakol tlen okipanotoka? ¿Omoueyineki Elihú? Amo. Ika iespíritu santo toTajtsin Dios, Elihú okijto: “Iixpan akin melauak toTajtsin Dios ne noijki ken te; noijki onechchijchijkej ika tlali”. Noijki okilui amo ma momojti ika tlen kiluiskia (Job 33:6, 7). Amo okiyolkoko Job, okachi kuali okiyolchika uan okinojnotski ika tlasojtlalistli.
Nin amatlajkuilol kiteititia ken momachiliaj tokniuan. Achto otikinkakej sekimej tokniuan tlen omoxelojkej itech tlanechikol uan otimokuayejyekojkej tlen okinpanotoka (Proverbios 18:13). Satepan ika tlatlaujtilistli otimomachtijkej itech seki neskayomej tlen moajsij itech Biblia, ken Jehová okinpaleui itekipanojkauan. Uan satepan, pampa tikchijchiuaskiaj nin amatlajkuilol otikinsetilijkej neskayomej tlen moajsij itech Biblia uan tlen axkan sekimej noijki ijkon kinpanoa. Timitsyoleuaj xiktlajtolti nin amatlajkuilol. Sapanoa timitstlasojtlaj.
Cuerpo Gobernante tlen kipiaj iTlaixpantijkauan Jehová