ToTajtsin Dios okichijchi achto tlakatl uan achto siuatl

Jehová okitlali se xochitlali itech Edén. Ompa okatkaj miakej yolkamej, kuajmej uan miak xochitl. Satepan, toTajtsin Dios okichijchi achto tlakatl tlen omotokayotiaya Adán. Okichijchi ika tlali uan okiyekaijyopitski. Ijkon opejki iyolilis nin tlakatl. Jehová okilui Adán ma kimalui xochitlali uan ma kintokayoti nochtin yolkamej.

Jehová okinauati Adán itlaj tlen miak ipati: “Uelis tikkuas san tlen tlakilotl, san itlakilo se kuauitl amo tikkuas. Timikis tla tikkuas itlakilo non kuauitl”.

Satepan, Jehová okijto: “Nikchijchiuas akin kipaleuis Adán”. Ik non, okichi ma kochi Adán uan ika se iomisekuil okichijchiuili isiua. Nin siuatl omotokayotiaya Eva. Uan toTajtsin Dios okinnamikti Adán uan Eva. ¿Ken omomachili Adán ijkuak okitak isiua? Sapanoa oyolpakik uan okijto: “¡Jehová okichijchi ikaj ken ne ika noomisekuil!”.

Jehová okinnauati Adán uan Eva ma kinpiakan miakej inkoneuan uan ma kitemitikan Tlaltikpak. Okinekiaya san sekan ma tekitikan uan ma yolpakikan ijkuak kikuepaskiaj nochi Tlaltikpak se xochitlali. Ijkon nochi Tlaltikpak yetoskia kuajkualtsin ken xochitlali Edén. Pero amo ijkon opanok. ¿Tleka? Tikitaskej itech okse tlamachtil.