Caín sapanoa okualanki uan okimikti ikni

Satepan ijkuak Adán uan Eva okinkixtijkej itech xochitlali Edén, okinpixkej miakej inkoneuan. Achto inkone okitokayotijkej Caín uan ye otlatokaya. Uan okse inkone okitokayotijkej Abel uan ye okatka tlajpixki.

Se tonal, Caín uan Abel okitlamanilijkej Jehová. ¿Tikmati tlen se tlamanali? Se tetliokolil tlen kimakaj toTajtsin Dios. Jehová okipakti itetliokolil Abel, pero amo okipakti itetliokolil Caín. Ik non, Caín sapanoa okualanki uan Jehová okilui: “Tla tikualantos, tikchiuas itlaj tlen amo kuali”. Pero Caín amo okikak tlen okijto Jehová.

Caín okilui Abel: “Tiauij tlalan”. Ijkuak okatkaj inselti, Caín okiuitek ikni uan okimikti. ¿Tlen okichi Jehová? Okilui Caín uejka ma uia uan ayakmo keman kinmitaskia ikalchanejkauan.

¿Tlen techmachtia nin neskayotl? Ualeua tikualanij ijkuak itlaj amo kuali kisa. Uan tla tikmachiliaj okachi tikualanij noso tla oksekimej techitaj tikualantokej, moneki san niman ma tikpatlakan toyelis. Tla amo ijkon tikchiuaj, uelis titlajtlakolchiuaskej.

Abel okitlasojtlaya Jehová uan okichiuaya tlen kuali, ik non, Jehová nochipa kilnamiktos. Ye kiyolitis ijkuak yetos xochitlali.