Jehová okinmakixti chikueyi tlaltikpaktlakamej

Noé, ikalchanejkauan uan yolkamej okalakej ijtik akali uan Jehová okitsak. Ijkuakon, opejki chikauak kiaui uan atl okajkokuik akali. Satepan, nochi Tlaltikpak oatemik. Nochtin akinmej amo yolkualmej amo okalakej ijtik akali uan omikej. Pero ken Noé uan ikalchanejkauan okatkaj ijtik akali, amo itlaj okinpanok. ¡Sapanoa oyolpakej porque okitlakamatkej Jehová!

Chikauak okiauik 40 tonalmej uan 40 yoak, satepan opanok kiauitl. Atl opejki temoa uan akali omoka ipan se tepetl. Pero ken ok otlaatentoka, Noé uan ikalchanejkauan amo okiskej, omokajkej ijtik akali seki kauitl.

Opanok seki tonalmej uan atl opejki uaki. Noé uan ikalchanejkauan okatkaj ijtik akali kanaj se xiuitl. Satepan Jehová okinmilui ma kisakan. ¡Ayakmo okatkaj akinmej amo yolkualmej! Sapanoa oyolpakej porque Jehová okinmakixti, okitlasojkamatilijkej uan okitlamanilijkej.

Jehová okipakti non tetliokolil uan okijto ayakmo keman katemitiskia Tlaltikpak. Ik non, okichi ma kisa achto kosamalotl uan ijkon nochtin kilnamiktoskiaj tlen okijto Jehová. ¿Yotikitak se kosamalotl?

Noijki, Jehová okinnauati Noé uan ikalchanejkauan ma kinpiakan inkoneuan uan ma kitemitikan Tlaltikpak.