TLAMACHTIL 13
Religiones tlen tlakajkayauaj kijtouaj toTajtsin Dios amo yolkuali
Tla toTajtsin Dios tetlasojtla uan religiones kijtouaj kichiuaj tlen ye kipaktia, ¿tleka kichiuaj miak tlamantli tlen amo kuali? Ijkon kichiuaj porque amo melauak kitekichiuiliaj toTajtsin Dios. Ijkuak oksekimej kitaj tlen kichiuaj uan ken tlakajkayauaj religiones, mokuayejyekouaj toTajtsin Dios amo yolkuali. ¿Tlen kichiuaj religiones? ¿Ken momachilia toTajtsin Dios uan tlen kinchiuilis?
1. ¿Tlen tlamachtiaj religiones uan ijkon sekimej mokuayejyekouaj toTajtsin Dios amo yolkuali?
Religiones tlen amo kinselia toTajtsin Dios, amo tlamachtiaj tlen ye kineki (Romanos 1:25). Yejuan amo kitematiltiaj itoka toTajtsin Dios pero Biblia kijtoua matiknotsakan ika itoka (Romanos 10:13, 14). Sekimej tlen tlayekanaj itech religión kijtouaj toTajtsin Dios kineki matechpano tlen amo kuali pero non amo melauak, ye amo itlajtlakol ijkuak titlajyouiaj (xiktlajtolti Santiago 1:13). Maski amo melauak tlen yejuan tlamachtiaj, miakej kineltokaj uan ayakmo kitlasojtlaj toTajtsin Dios.
2. ¿Tleka sekimej mokuayejyekouaj toTajtsin Dios amo yolkuali ika tlen kichiuaj religiones?
Religiones tlen tlamachtiaj tlen amo melauak, amo tetlasojtlaj ken Jehová techtlasojtla. Biblia kijtoua yejuan ‘sapanoua yotlajtlakolchijkej’ (Apocalipsis 18:5). Religiones yimiak xiuitl kinpaleuiaj políticos. Noijki tlapaleuiaj ijkuak mochiuaj guerras, kitekauiliaj miakej makinmixpolokan uan tlapaleuiaj matemiktikan. Sekimej tlen tlayekanaj itech religiones kipiaj miak tlamantli patio uan kintlajtlaniliaj tomin akinmej pouij itech inreligión para kitlaxtlauaskej tlen kipiaj. Tlen kichiuaj kiteititia amo melauak kixmatij toTajtsin Dios, ikinon amo melauak kichiuaj tlen ye kineki (xiktlajtolti 1 Juan 4:8).
3. ¿Ken momachilia toTajtsin Dios ijkuak kita tlen kichiuaj religiones?
¿Mitskualania tlen kichiuaj religiones? Jehová okachi kikualania. Ye techtlasojtla ikinon sapanoua kikualania ijkuak akinmej tlayekanaj itech religiones kijtouaj ye amo yolkuali uan kintlajyouiltia oksekimej. ToTajtsin Dios kijtoua kinpojpolos religiones tlen amo kichiuaj tlen ye kipaktia ‘uan ayakmo keman oksepa kitaskej” (Apocalipsis 18:21). Ayakmo miak poliui uan kinpojpolos religiones (Apocalipsis 18:8).
MATIMOMACHTIKAN
Okachi matimomachtikan ken kinmita toTajtsin Dios religiones tlen kichiuaj tlen amo kipaktia. Noijki matikitakan okseki tlamantli tlen yokichijkej religiones. Saiktlami tikitaskej maski religiones kichiuaj miak tlamantli amo kuali, non amo kichiuas ayakmo xikixmati Jehová.
4. ToTajtsin Dios amo kinselia nochi religiones
Sekimej kineltokaj nochi religiones techpaleuiaj matimouikakan iuan toTajtsin Dios, ¿melauak tlen kijtouaj? Xiktlajtoltikan Mateo 7:13, 14 uan satepan xikitakan tlen namechmachtia.
Ijkon ken kijtoua texto tlen otiktlajtoltijkej, ¿ken kajki ojtli tlen techpaleuis nochipa matiyoltokan?
Xikitakan VIDEO uan satepan xikitakan tlen namechmachtia.
¿Kiteititia Biblia toTajtsin Dios kinselia nochi religiones?
5. Religiones tlen tlakajkayauaj amo tetlasojtlaj
Religiones tlen tlakajkayauaj tlapaleuiaj ijkuak sekimej kichiuaj guerras, ikinon sekimej mokuayejyekouaj toTajtsin Dios amo yolkuali. Para tikmatis ken kichiuaj, xikitakan VIDEO uan satepan xikitakan tlen namechmachtia.
¿Tlen okichijkej akinmej opouiayaj itech religiones tlen tlakajkayauaj?
¿Ken tikita tlen okichijkej?
Xiktlajtoltikan Juan 13:34, 35 uan 17:16 uan satepan xikitakan tlen namechmachtia.
¿Ken momachilia Jehová ijkuak religiones tlapaleuiaj itech guerras?
Religiones tlen tlakajkayauaj yokichijkej miak tlamantli amo kuali uan kiteititiaj amo tetlasojtlaj, ¿kox yotikitak ijkon kichiuaj?
Religiones tlen tlakajkayauaj, amo tetlasojtlaj.
6. ToTajtsin Dios kinpaleuis akinmej kinkajkayajtokej
Xiktlajtoltikan Apocalipsis 18:4a uan satepan xikitakan tlen namechmachtia.
ToTajtsin Dios kineki kinpaleuis akinmej pouij itech religiones tlen tlakajkayauaj, ¿ken tikita tlen kichiuas?
7. Okachi xikixmati akin melauak toTajtsin Dios
Yotikitakej religiones kichiuaj miak tlamantli amo kuali, ¿kijtosneki ayakmo uelis tiktlasojtlas toTajtsin Dios? Matikijtokan se telpochtli ayakmo kineki kitlakamatis itajtsin maski tlen kiluia uelis kipaleuis, telpochtli yaui oksekan chantiti uan kichiua miak tlamantli amo kuali. Itajtsin amo kipaktia tlen ikone kichiua, tlen tikijtoskia, ¿itlajtlakol teta tlen kichiua ikone?
Ikinon, ¿kox kuali matiktlajtlakoltikan toTajtsin Dios uan ayakmo matimomachtikan porque religiones kichiuaj tlen amo kuali?
SEKIMEJ KIJTOUAJ: “Ne amo nikneki nikixmatis toTajtsin Dios porque religiones yokichijkej miak tlamantli tlen amo kuali”.
¿Noijki ijkon timokuayejyekoua?
¿Tleka moneki tikixmatiskej toTajtsin Dios maski seki religiones kichiuaj tlen amo kuali?
XIKILNAMIKTO
Religiones kichiuaj miakej ayakmo makitlasojtlakan Jehová porque tlamachtiaj tlen amo melauak uan kichiuaj tlen amo kuali, ikinon ayakmo miak poliui uan kinpojpolos.
Matikojpauikan
¿Ken tikita tlen yokichijkej uan yotlamachtijkej religiones?
¿Ken kinmita Jehová religiones tlen tlakajkayauaj?
¿Tlen kinchiuilis?
NIN NOIJKI MITSPAKTIS
Onka ome tlamantli tlen kichiuaj religiones, ikinon toTajtsin Dios amo kinselia, matikitakan tlen kichiuaj.
¿Tleka Jehová kineki matikueyichiuakan inuan oksekimej uan amo san toselti?
“¿Moneki ma tipouikan itech se religión?” (Nin tlamachtil kajki itech jw.org/ncx)
Se teopixki okinekiaya kimatis tleka itech ireligión okichiuayaj seki tlamantli, ikinon opejki momachtia Biblia.
“Se teopixki okipatlak ireligión” (¡Ma titlachixtokan!, febrero 2015)
Yimiak xiuitl religiones san kitlajtlakoltiaj toTajtsin Dios, ikinon miakej kineltokaj amo techtlasojtla uan techtlajyouiltia. Xikita tlen eyi tlamantli kijtouaj itech toTajtsin Dios.
“¿Tlen kijtouaj sekimej itech toTajtsin Dios?” (Akin Tetlapouijtok, 1 de noviembre 2013)