¿Akin Jesús?

Miakej kimatij Jesús okatka nikan tlaltikpak. Miakej san kimatij itoka uan noijki mokuayejyekouaj seki tlamantli pero amo kimatij akin ye. Pero, ¿tlen kijtoua Biblia?

1. ¿Akin Jesús?

Jesús se ángel tlen kipia miak chikaualistli uan kajki iluikak. Jehová achto okichijchi ye uan satepan okichijchi okseki tlamantli. Ikinon Biblia kijtoua “ye achto okichijchijkej ijkuak ayamo itlaj okatka”” (Colosenses 1:15). Biblia kijtoua Jesús “san ye se iKone” toTajtsin Dios. Ijkon kijtoua porque amikaj okipaleui Jehová ijkuak okichijchi iKone (Juan 3:16). Satepan Jesús okipaleui Jehová ijkuak okichijchi nochi tlen onka (xiktlajtolti Proverbios 8:30). Uan yejuan nochipa kuali mouikaj. Jesús ye “Tlajtoli”, kijtosneki ye nochipa kitematiltia tlen iTajtsin kineki (Juan 1:14).

2. ¿Tleka Jesús ouala nikan tlaltikpak?

Yikipia kanaj 2,000 xiuitl Jehová ika iespíritu santo, okichi se milagro. Okitlali iyolilis Jesús ijtik se ichpochtli tlen omotokayotiaya María. Ijkon oneski Jesús nikan tlaltikpak (xiktlajtolti Lucas 1:34, 35). Ouala porque ye okatka Mesías tlen omoijto ualaskia uan techmakixtiskia.a Profecías tlen okijtouayaj tlen kichiuaskia Mesías, okichi Jesús uan non okiteititi ye okatka Mesías. Ijkon nochtin okimatkej ‘ye Cristo, iKone toTajtsin Dios tlen yoltok’ (Mateo 16:16).

3. ¿Kanin kajki Jesús?

Ijkuak Jesús oixpoliuik, Jehová okiyoliti ken se ángel uan omokopki iluikak. Ompa “toTajtsin Dios okachi okiueyitlali” (Filipenses 2:9). Axkan Jesús ueyititok pero san Jehová kipia miak chikaualistli.

4. Jesús amo toTajtsin Dios

Maski Jesús se ángel tlen kipia chikaualistli, Biblia kijtoua ye kitlakamati Jehová porque iDios uan iTajtsin. ¿Tleka ijkon tikijtouaj? Xikitakan VIDEO para tikajsikamatis tlen kijtoua Biblia akin Jesús uan akin toTajtsin Dios.

VIDEO: ¿Jesucristo ye toTajtsin Dios? (3:22)

Textos tlen tikintlajtoltiskej techpaleuiskej matikajsikamatikan akin Jehová uan akin Jesús. Xiktlajtoltikan sejse texto uan satepan xikitakan tlen namechmachtia.

Xiktlajtoltikan Lucas 1:30-32.

• Ijkon ken okijto ángel, ¿akin Jesús uan akin Jehová akin “okachi Ueyititok”?

Xiktlajtoltikan Mateo 3:16, 17.

• ¿Tlen omoijto ijkuak omoapolakti Jesús?

• ¿Akin ijkon okijto?

Xiktlajtoltikan Juan 14:28.

• ¿Akin okachi tlayekantok uan tlanauatia, se teta noso ikone?

• ¿Tleka Jesús okijto Jehová iTajtsin?

Xiktlajtoltikan Juan 12:49.

• ¿Omokuayejyekouaya Jesús ye inuan iTajtsin san se okatkaj? ¿Tejuatsin tlen timokuayejyekoua?

5. Jesús ye Mesías tlen omoijto ualaskia

VIDEO: Seki profecías tlen omochijkej itech Jesús (3:03)

Xikitakan tlen kijtouaj ninmej profecías tlen katej itech Biblia uan satepan xikitakan tlen namechmachtia.

Xiktlajtoltikan Miqueas 5:2 uan xikitakan kanin nesiskia Mesías.b

• ¿Omochi nin profecía? (Mateo 2:1).

Xiktlajtoltikan Salmo 34:20 uan Zacarías 12:10 uan xikitakan ken omoijto ixpoliuiskia Mesías.

• ¿Omochi tlen omoijto? (Juan 19:33-37).

• ¿Timokuayejyekoua Jesús itlaj okichi para mamochiua tlen omoijto itech nonmej profecías?

• ¿Tlen techititia itech Jesús nochi tlen yotimomachtijkej?

XIKILNAMIKTO

Jesús se ángel tlen kipia chikaualistli, ye iKone toTajtsin Dios uan Mesías.

Matikojpauikan

• ¿Tleka Biblia kijtoua Jesús “ye achto okichijchijkej ijkuak ayamo itlaj okatka”?

• ¿Tlen okichiuaya Jesús ijkuak ayamo oualaya nikan tlaltikpak?

• ¿Ken tikmatij Jesús ye Mesías tlen omoijto ualaskia?

NIN NOIJKI MITSPAKTIS

Xikita seki tlamantli tlen kiteititia Jesús ye Mesías tlen omoijto ualaskia.

“¿Kiteititiaj profecías tlen moijtoua itech Biblia Jesús ye Mesías?” (Nin tlamachtil kajki itech jw.org/ncx)

Xikita tleka Biblia kiteititia Jehová iTajtsin Jesús.

“¿Tleka tikijtouaj Jesús iKone toTajtsin Dios?” (Nin tlamachtil kajki itech jw.org/ncx)

Xikita tleka trinidad amo moijtoua itech Biblia.

“¿Jesús ye toTajtsin Dios?” (Akin Tetlapouijtok, 1 de abril 2009)

Xikita ken okipaleui se siuatl ijkuak okimatki tlen kijtoua Biblia itech Jesús.

“Se siuatl judía kijtoua tleka axkan okse tlamantli kineltoka” (¡Ma titlachixtokan!, mayo 2013)