¿Tleka tla timoapolaktiskej techpaleuis matiyolpakikan?

Jesús okijto tla tiknekij tikchiuaskej ken ye, moneki timoapolaktiskej (xiktlajtolti Mateo 28:19, 20). ¿Tlen kijtosneki timoapolaktiskej? ¿Tlen moneki kichiuas akin kineki moapolaktis?

1. ¿Ken moneki timoapolaktiskej?

Ijkuak okiapolaktijkej Jesús okikalakijkej ijtik aueyatl Jordán uan satepan “okiski ijtik atl” (Marcos 1:9, 10). Ijkuak moapolaktiaj akinmej kichiuaj ken Cristo noijki kinkalakiaj ijtik atl.

2. ¿Tlen tikteititiaj ijkuak timoapolaktiaj?

Ijkuak timoapolaktiaj tikteititiaj yotimotemakakej ixpan Jehová. Timotemakaj ixpan Jehová ijkuak tiktlatlaujtiaj uan tikiluiaj tiknekij nochipa tiktekichiuiliskej uan san ye tikueyichiuaskej. Ijkon tikchiuaj ijkuak ayamo timoapolaktiaj. Noijki tikiluiaj tikchiuaskej tlen okichi Jesús, ye okijto: “Tla ikaj kineki nouan uits, ayakmo makichiua san tlen ye kineki. Makiseli makitlajyouiltikan uan nouan mauiki” (Mateo 16:24). Ijkuak timotemakaj ixpan Jehová uan timoapolaktiaj iuan timouikaj. Noijki timouikaj iuan akinmej kiueyichiuaj.

3. ¿Tlen moneki tikchiuaskej tla tiknekij timoapolaktiskej?

Tla tejuatsin tikneki timoapolaktis, moneki okachi xikixmati Jehová uan xikneltoka tlen ye kijtoua (xiktlajtolti Hebreos 11:6). Ijkuak okachi tikixmatis Jehová uan okachi titlaneltokas, okachi tiktlasojtlas. Noijki tiknekis titetlapouis uan tikchiuas tlen ye kineki (2 Timoteo 4:2; 1 Juan 5:3). Ijkuak peuas tiktlakamatis Jehová xamo tiknekis ixpan timotemakas uan timoapolaktis (Colosenses 1:9, 10).a

MATIMOMACHTIKAN

4. ¿Tlen techmachtia ijkuak Jesús omoapolakti?

Para okachi tikmatis tlen opanok ijkuak Jesús omoapolakti, xiktlajtoltikan Mateo 3:13-17 uan satepan xikitakan tlen namechmachtia.

• ¿Okatka se konetsintli Jesús ijkuak omoapolakti?

• ¿San okikuatekijkej?

Ijkuak Jesús omoapolakti opejki kichiua tlen toTajtsin Dios okinauati. Xiktlajtoltikan Lucas 3:21-23 uan Juan 6:38 uan satepan xikitakan tlen namechmachtia.

• Ijkuak Jesús omoapolakti, ¿tlen okachi okipatioitaya kichiuas?

5. Tejuatsin noijki uelis timoapolaktis

Xamo timomojtia ijkuak timokuayejyekoua timotemakas ixpan Jehová uan timoapolaktis. Pero ijkuak timomachtis, mitspaleuis ximokuayejyeko kox yitikneki timoapolaktis. Para tikmatis ken okichijkej sekimej, xikitakan VIDEO.

VIDEO: Kuali ximouika iuan Jehová (1:11)

Xiktlajtoltikan Juan 17:3 uan Santiago 1:5 uan satepan xikitakan tlen namechmachtia.

• ¿Tlen uelis tikchiuas para uelis timoapolaktis?

1. Timotemakaj ixpan Jehová ijkuak tikiluiaj tiknekij nochipa tiktekichiuiliskej.

2. Ijkuak timoapolaktiaj tikteititiaj inmixpan miakej yotimotemakakej ixpan Jehová.

6. Ijkuak ikaj moapolaktia poui iuan ifamilia Jehová

Akinmej yotimoapolaktijkej tipouij iuan ifamilia Jehová. Tinochtin tiktlakamatij tlen kijtoua Biblia uan san se tlamantli tikneltokaj maski tlatlamantli otimoskaltijkej. Xiktlajtoltikan Salmo 25:14 uan 1 Pedro 2:17 uan satepan xikitakan tlen namechmachtia.

• ¿Ken techpaleuia ijkuak timoapolaktiaj okachi matimouikakan iuan Jehová uan noijki iuan oksekimej?

XIKILNAMIKTO

Jesús okijto tla tiknekij tikchiuaskej ken ye moneki timoapolaktiskej, ikinon moneki okachi titlaneltokaskej, tikchiuaskej tlen Jehová technauatia uan ixpan timotemakaskej.

Matikojpauikan

• ¿Tlen kijtosneki timoapolaktiskej uan tleka moneki ijkon tikchiuaskej?

• ¿Tlen tikteititiaj ijkuak timoapolaktiaj?

• ¿Tlen moneki kichiuas akin kineki motemakas ixpan Jehová uan moapolaktis?

NIN NOIJKI MITSPAKTIS

Xikita tlen kijtosneki timoapolaktiskej uan tlen kineltokaj oksekimej.

“¿Tlen kijtosneki timoapolaktiskej?” (Nin tlamachtil kajki itech jw.org/ncx)

Xikita tlen moneki tikchiuas para timoapolaktis.

“Miakej moapolaktiaj porque kitlasojtlaj Jehová uan motlasojkamatij” (Akin Tetlapouijtok, marzo 2020)

Xikita ken se tlakatl omoapolakti porque ye okinek ijkon kichiuas.

“Onechpaleuijkej ma nimomachti tlen melauak kijtoua Biblia” (Akin Tetlapouijtok, 1 de febrero 2013)

Xikita tleka miak ipati timoapolaktis uan tlen mitspaleuis ijkon xikchiua.

“¿Yiuelis nimoapolaktis?” (Telpochmej uan ichpochmej tlajtlanij. Nin kinpaleuis [volumen 2], tlamachtil 37)