¿Ok kanaj yoltokej akinmej yoixpolikej?

¿Yoixpoliuik ikaj akin tiktlasojtla? Tla ijkon yomitspanok, xamo sapanoua otimoyolkoko uan otimotlajtlani kox oksepa tikitas. ¿Oksepa tikinmitaskej akinmej yoixpolikej? Itech nin uan okse tlamachtil, tikitaskej tlen kijtoua Biblia.

1. ¿Ok kanaj yoltokej akinmej yoixpolikej?

Jesús okijto ijkuak ikaj ixpoliui, yetoskia ken kochtok. ¿Tleka ijkon okijto? Ijkuak ikaj kochtok amitlaj kikaki nion itlaj kimati uan ijkuak ikaj ixpoliui ayakmo itlaj kimachilia nion tlajyouia. Biblia kijtoua “akinmej yoixpolikej ayakmo itlaj kimatij” (xiktlajtolti Eclesiastés 9:5).

2. ¿Tleka techpaleuia ijkuak tikmatij ken katej akinmej yoixpolikej?

Miakej momojtiaj mikiskej uan mokuayejyekouaj akinmej yoixpolikej uelis itlaj kinchiuiliskej. Pero tlen kijtoua Biblia techyolseuia. Jesús okijto: “Tlen melauak namechmakixtis” (Juan 8:32). Miakej religiones tlamachtiaj ok itlaj yoltok ijkuak ikaj miki. Pero Biblia amo ijkon tlamachtia. Akinmej yoixpolikej amo tlajyouijtokej, yejuan amitlaj kimatij nion amitlaj uelis techchiuiliskej. Ikinon amo moneki matikinchiuilikan rezos nion matikintlamanilikan akinmej yoixpolikej.

Sekimej kijtouaj uelis timotlapouiskej inuan akinmej yoixpolikej pero non amo melauak. Ken yotikitakej, akinmej yoixpolikej “ayakmo itlaj kimatij”. Akinmej kijtouaj motlapouiaj inuan akinmej yoixpolikej san mokajkayauaj, porque motlapouiaj inuan amo kuali ejekamej. Ijkuak tikmatij ken katej akinmej yoixpolikej ayakmo techkajkayauaj amo kuali ejekamej. Jehová techiluia amo matimotlapouikan iuan akinmej yoixpolikej porque uelis techtlajyouiltiskej amo kuali ejekamej (xiktlajtolti Deuteronomio 18:10-12).

3. ¿Tlen kinpanoua akinmej ixpoliuij?

Sekimej kijtouaj miak tlamantli kinpanoua akinmej yoixpolikej. Pero amo melauak nochi tlen kijtouaj.

• Kanin tichanti, ¿tlen kineltokaj kinpanoua akinmej ixpoliuij?

VIDEO: ¿Ken katej akinmej yoixpolikej? (video tlen amo ueyi) (1:19)

Xiktlajtoltikan Eclesiastés 3:20 uan satepan xikitakan tlen namechmachtia.

• Ijkon ken kijtoua nin texto, ¿tlen kinpanoua akinmej ixpoliuij?

• Ijkuak ikaj ixpoliui, ¿ok itlaj yoltok?

Jesús omouikaya iuan se tlakatl tlen omotokayotiaya Lázaro uan Biblia techiluia tlen okipanok ijkuak oixpoliuik. ¿Ken okijto Jesús okatka Lázaro? Xiktlajtoltikan Juan 11:11-14 uan satepan xikitakan tlen namechmachtia.

• ¿Ken okineskayoti Jesús ijkuak ikaj ixpoliui?

• ¿Tlen techmachtia tlen ye okijto?

• ¿Timokuayejyekoua uelis tikneltokaskej tlen kijtoua Biblia?

4. Techpaleuia tikmatiskej ken katej akinmej yoixpolikej

Ijkuak tikmatij ken katej akinmej yoixpolikej ayakmo timomojtiaj. Xiktlajtoltikan Eclesiastés 9:10 uan satepan xikitakan tlen namechmachtia.

• ¿Uelis itlaj techchiuiliskej akinmej yoixpolikej?

Tla tikneltokaj tlen kijtoua Biblia, tikmatoskej amo moneki tikintlamaniliskej akinmej yoixpolikej. Xiktlajtoltikan Isaías 8:19 uan Apocalipsis 4:11 uan satepan xikitakan tlen namechmachtia.

• ¿Ken momachilia Jehová ijkuak kinmita sekimej kintlamaniliaj akinmej yoixpolikej uan kinmiluiaj makinpaleuikan?

5. Timoyolseuiaj ijkuak tikmatij ken katej akinmej yoixpolikej

Miakej kinmachtiaj tla kichiuaj tlen amo kuali, kintlajyouiltiskej ijkuak ixpoliuiskej. Pero timoyolseuiaj ijkuak tikmatij amikaj kitlajyouiltiskej ijkuak ixpoliuis, nion akinmej okichijkej miak tlamantli amo kuali. Xiktlajtoltikan Romanos 6:7 uan satepan xikitakan tlen namechmachtia.

• Biblia kijtoua ijkuak ikaj ixpoliui, toTajtsin Dios ayakmo kilnamiktok tlen amo kuali okichi. Ikinon, ¿timokuayejyekoua tlajyouijtokej akinmej yoixpolikej uan otlajtlakolchijkej?

Ijkuak okachi tikixmatij Jehová, tikajsikamatij ye amo kintlajyouiltia akinmej yoixpolikej. Xiktlajtoltikan Deuteronomio 32:4 uan 1 Juan 4:8 uan satepan xikitakan tlen namechmachtia.

• Ninmej textos kiteititiaj toTajtsin Dios kichiua tlen kuali, ¿tikijtoskia noijki tetlajyouiltia?

• ¿Mitsyolseuia tikmatis ken katej akinmej yoixpolikej? ¿Tleka ijkon tikijtoua?

XIKILNAMIKTO

Ijkuak ikaj ixpoliui, ayakmo kanaj yoltok. Akinmej yoixpolikej amo tlajyouijtokej nion uelis itlaj techchiuiliskej.

Matikojpauikan

• ¿Ok itlaj yoltok ijkuak ikaj ixpoliui?

• ¿Ken techpaleuia tikmatiskej ken katej akinmej yoixpolikej?

• ¿Tleka techyolseuia tikmatiskej ken katej akinmej yoixpolikej?

NIN NOIJKI MITSPAKTIS

Xikita ken kiyekijtoua Biblia tlen kijtosneki alma.

“¿Tlen kijtosneki alma?” (Nin tlamachtil kajki itech jw.org/ncx)

Xikita kox toTajtsin Dios tetlajyouiltia ijtik tlitl.

¿Tetlajyouiltia toTajtsin Dios ijtik tlitl? (3:07)

¿Uelis itlaj techchiuiliskej akinmej yoixpolikej?

Espíritus de difuntos... ¿pueden ayudar a uno?, ¿o causarle daño? ¿Existen, realmente? (Amatlajkuilol)

Xikita ken se tlakatl omoyolseui ijkuak okimatki ken katej akinmej yoixpolikej.

“Onechtlajtlachialti kuali tlanankilistli tlen kitemaka Biblia” (Akin Tetlapouijtok, 1 de febrero 2015)