¿Otikmatiaya?

¿Tleka Jesús okinmilui judíos amo ma kijtokan Dios kitika melauak kichiuaskiaj nochi tlen okijtoayaj?

TLANAUATIL tlen okijkuilo Moisés okijtoaya ualeua kuali ma tikijtokan melauak tikchiuaskej tlen yotikijtojkej. Pero ijkuak Jesús ouala, miakej judíos nochipa okijtoayaj Dios kitika melauak kichiuaskiaj tlen okijtoayaj uan ijkon nochtin okimatiayaj melauak ijkon kichiuaskiaj. Jesús ome uelta okinmilui: “San xikijtokah tla ‘ejé’, ‘ejé’, noso tla ‘amó’, ‘amó’” (Mat. 5:33-37; 23:16-22).

Se diccionario tlen tlajtoa itech tlaneltokalistli, kijtoa amochtli Talmud kinpia seki tlaxelolmej tlen kijtoaj judíos nochipa okijtoayaj Dios kitika melauak kichiuaskiaj tlen okijtoayaj. Talmud kiyekijtoa keman omonekiaya kichiuaskej tlen okijtojkej uan keman amo omonekiaya kichiuaskej.

Amo san ye Jesús okijto amo kuali ijkon ma kijtokan. Se tlakatl tlen omotokayotiaya Flavio Josefo okijto nin tlamantli itech se tlaneltokalistli judío: “Amo omonekiaya nochipa kijtoskej Dios kitika ijkuak itlaj kichiuaskiaj porque non okachi tlajtlakoli ken tlakajkayaualistli. Yejuan okijtoayaj tlajyouiskia akin amo okiluiaya toTajtsin Dios melauak kichiuaskia tlen okijto”. Se amochtli tlen amo kajki itech Biblia tlen itoka Eclesiástico noso Sabiduría de Jesús Ben Sirá kijtoa: “Sapanoa tlajtlakolchiua akin nochipa kijtoa Dios kitika ijkuak itlaj kichiuas” (23:11). Ik non, Jesús okijto amo san kajauilmatiskiaj ijkuak okijtoayaj Dios kitika ijkuak itlaj kichiuaskiaj. Tla nochipa tikijtoaj tlen melauak, amo moneki nochipa tikijtoskej Dios kitika ijkuak itlaj tikchiuaskej.