Xikchiuakan ken teotlajtojkej: Sofonías
1. ¿Tlen opanoaya ijkuak Sofonías okatka teotlajtojki, uan tleka se kuali neskayotl?
1 Itech xiuitl 659 a.i.x. 1 pampa tlayekapan itech Judá okachi okiueyichiuayaj Baal. Amón, ueyi tekiua amo yolkuali okimiktijkej uan axkan telpochtli Josías peuaskia tlanauatiskia (2 Crón. 33:21–34:1). Itech non tonalmej Jehová okipejpenki Sofonías pampa ma kitematilti tlen kichiuaskia Jehová. Maski Sofonías uelis noijki okatka se tekiua, ye okinmilui akinmej okiyekanayaj altepetl Judá tlen okijto Jehová kichiuas (Sof. 1:1; 3:1-4). Tejuan noijki tikteititiaj yolchikaualistli, uan amo tikauaj tokalchanejkauan ma techtsakuilikan pampa amo ma tikueyichiuakan Jehová (Mat. 10:34-37). ¿Tlen okitematilti Sofonías, uan tlen opanok?
2. ¿Tlen moneki tikchiuaskej pampa uelis timomakixtiskej ijkuak Jehová kixpolos nochi tlen amo kuali?
2 “Xiktemokan Jehová.” San Jehová uelis kinmakixtis tlaltikpaktlakamej ijkuak ye kixpolos nochi tlen amo kuali. Ik non, Sofonías okinmilui akinmej ochantiayaj Judá ma kitemokan Jehová, melajkayotl uan yolyamanilistli, ijkuak ok okitekauiliaya Jehová (Sof. 2:2, 3). Axkan noijki ijkon panoa. Ijkon ken Sofonías, tikinyoleuaj tlaltikpaktlakamej ma kitemokan toTajtsin Dios, pero tejuan noijki moneki tiktemoskej. Uan amo keman tikauaskej Jehová (Sof. 1:6). Tiktemoaj Jehová ijkuak tiktlajtoltiaj iTlajtol uan tikiluiaj ma techyekana. Tiktemoaj melajkayotl ijkuak timochijchikauaj pampa amo tikchiuaskej tlen amo kuali. Tiktemoaj yolyamanilistli ijkuak ika miak yolpakilistli tiktlakamatij tlen techiluia ialtepe Jehová.
3. ¿Tleka moneki amo ma timosotlauakan ijkuak titetlapouiaj?
3 Sekimej okinpaleui. Tlen okijto Sofonías okinpaleui sekimej akinmej ochantiayaj Judá, pero okachi okipaleui Josías, akin opejki kitemoa Jehová ijkuak okatka telpochtli. Satepan Josías okixpolo nochi tlamantli tlen ika okinueyichiuayaj teotsitsintin itech Judá (2 Crón. 34:2-5). Axkan, maski seki xinachtli itech Tekiuajkayotl uetsi itech ojtli, itlajkotia temej noso itech uitstli, oksekimej uetsij itech kuali tlali tlen kitemaka tlakilotl (Mat. 13:18-23). Tikmatij Jehová techteochiuas pampa timochijchikauaj tiktematiltiskej kuali tlajtolmej itech Tekiuajkayotl (Sal. 126:6).
4. ¿Tleka moneki tikchiaskej itonal Jehová?
4 Itech Judá sekimej okineltokayaj Jehová amo itlaj kichiuaskia. Pero Jehová okinmilui tonal keman kixpoloskia nochi tlen amo kuali amo uejka okatka (Sof. 1:12, 14). San momakixtiskiaj akinmej mopaleuiskiaj itech (Sof. 3:12, 17). Ijkuak tikchiaj tonal keman Jehová kixpolos nochi tlen amo kuali, ma titetlapouikan ika yolchikaualistli iuan oksekimej tokniuan tlen kiueyichiuaj Jehová (Sof. 3:8, 9).