Miakej tlajyouiaj ijkuak onka guerra
Tlajyouiaj miak akinmej chantij kanin onka guerras. Ipan nochi tlaltikpak miakej soldados uan oksekimej tlajyouiaj ijkuak ijkon panoua.
SOLDADOS TLAJYOUIAJ
Gary tlen ichan Gran Bretaña okijto: “Miak tlamantli panoua ijkuak onka guerra. Onikitak ijkuak miakej okinmiktijkej uan sekimej san okinkojkojkej. Ne onikijtouaya xamo san tlen hora uelis itlaj nechpanoskia”.
Wilmar tlen ichan Colombia okijto: “Ne onechkuitlapanmotlakej uan onechixmotlakej. Onikitak ijkuak miakej okinmiktijkej. Okinmiktijkej konemej uan abuelitos. Ijkuak onka se guerra ayakmo teiknomatij uan yoltlakuauaj”.
Zafirah tlen ichan Estados Unidos okijto: “Noixpan ikaj okimotlakej uan amo ueli nikilkaua. Nikilnamiki ijkuak otsajtsiaya uan ijkuak otlajyouiaya”.
OKSEKIMEJ NOIJKI TLAJYOUIAJ
Olexandra tlen ichan Ucrania okijto: “Ne onikijtouaya ayakmo keman nipakiskia. Onimomojtiaya manechmiktikan uan onimomojtiaya makinmiktikan nofamiliares uan noyolikniuan”.
Daler tlen ichan Tayikistán okijto: “Ijkuak oniaya niktemoti tlen tikkuaskej, omonekiaya nias nimochiati kanaj las dos kualkan uan oniualmokopaya kanaj tlajko youak. Onimomojtiaya porque uelis nechmotlaskiaj ijkuak ompa onimochixtoka”.
Marie tlen ichan Ruanda okijto: “Nopapanuan okinmiktijkej ijkuak opanotoka guerra. Onimoka iknotl uan amo onikpiaya akin nechmaluis uan nechyolchikauas”.
Miakej kuali katej uan moyolseuiaj maski otlajyouijkej ijkuak opanotoka guerra. Pero noijki kineltokaj se tonal ayakmo yetos guerras uan ayakmo ikaj mokualanis. Nin revista Akin Tetlapouijtok kiyekijtoua ika iTlajtol toTajtsin Dios se tonal ayakmo yetos guerras.