Techpaleuia matimouikakan inuan tokniuan

1, 2. ¿Tlen okachi kipatioita Jehová uan tlen kineki matikchiuakan?

JEHOVÁ sapanoua kipatioita kuali matimouikakan inuan oksekimej. Jesús otechmachti matikintlasojtlakan oksekimej ijkon ken tejuan timotlasojtlaj (Mat. 22:​37-39). Ikinon moneki matikinyektlapouikan akinmej amo kiueyichiuaj Jehová. Ijkon tikchiuaskej ken toTajtsin Dios kichiua porque “ye kichiua matlaui tonaltsin inpan akinmej kichiuaj tlen kuali uan akinmej kichiuaj tlen amo kuali. Noijki kichiua makiaui inpan yolkualmej uan akinmej amo yolkualmej” (Mat. 5:45).

² Jehová nochtin kintlasojtla pero okachi kintlasojtla akinmej kitlakamatij (Juan 14:21). Jehová kineki matikchiuakan ijkon ken ye kichiua. Ikinon techiluia ‘sapanoua matimosepantlasojtlakan’ ken tiknimej (1 Ped. 4:8; Rom. 12:10). Moneki titetlasojtlaskej ijkon ken tiktlasojtlaj se tofamiliar noso se toyolikni.

3. ¿Tlen moneki tikchiuaskej para titetlasojtlaskej?

³ Titetlasojtlaskej yetoskia ken se xochitl tlen moneki tikatekiskej uan tikmaluiskej tla tiknekij kualtsin mamoskalti. Apóstol Pablo okinmilui tokniuan: “Nochipa ximotlasojtlakan ken namiknimej” (Heb. 13:1). Jehová kineki okachi matitetlasojtlakan. Axkan timomachtiskej tleka miak ipati okachi matimouikakan inuan tokniuan uan ken uelis nochipa ijkon tikchiuaskej.

¿TLEKA MONEKI OKACHI MATIMOUIKAKAN INUAN TOKNIUAN?

4. ¿Tlen techpaleuis okachi matikintlasojtlakan tokniuan ijkon ken kijtoua Salmo 133:1? (Noijki xikinmita fotos).

⁴ (Xiktlajtolti Salmo 133:1). Tejuan noijki tikijtouaj ijkon ken akin okijkuilo Salmo. Ye okijto “sapanoua kuali uan teyolpaktia” timouikaskej inuan akinmej kitlasojtlaj Jehová. Pero ualeua ayakmo tikinmitaskej tokniuan ijkon ken achto otikinmitayaj. ¿Tleka ijkon tikijtouaj? Sapanoua timotlajtlachialtiaj ijkuak tikitaj se ueyi kouitl pero ijkuak nochipa tikitaj ayakmo timotlajtlachialtiaj. Noijki uelis ijkon techpanos inuan tokniuan porque sejse semana miak uelta tikinmitaj. ¿Tlen techpaleuis nochipa matikinpatioitakan ijkon ken ijkuak yikin otikinmixmatkej? Okachi tikintlasojtlaskej tokniuan uan tikinpatioitaskej tla tikitaj ken techpaleuiaj uan ken tlapaleuiaj itech tlanechikol.

5. ¿Ken kinpaleuia oksekimej ijkuak kitaj timotlasojtlaj?

⁵ Miakej motlajtlachialtiaj ijkuak peuaj touan monechikouaj porque kitaj timotlasojtlaj. Ijkuak kitaj ken timotlasojtlaj kineltokaj melauak tikchiuaj ken Cristo. Jesús okijto: “Tla nanmosepantlasojtlaj, nochtin kimatiskej namejuan nannodiscípulos” (Juan 13:35). Matikitakan tlen okipanok se ichpochtli itoka Alejandra.a Ye momachtia universidad pero noijki opejki momachtia Biblia. Ye okimakakej se amatsintli para touan mauia ueyi nechikol regional. Ijkuak otlanki achto tonal omonechikoto, okilui tokni tlen okimachtiaya: “Nopapanuan amo keman onechnapalojkej noso onechnauajtekej pero nin tonal kanaj 52 uelta ijkon okichijkej. Onikmachili Jehová sapanoua nechtlasojtla porque kuali onechselijkej. Nikneki noijki namouan nipouis”. Alejandra ok omomachti Biblia uan omoapolakti 2024. Miakej akinmej yikin peuaj touan monechikouaj kinekij kitekichiuiliskej Jehová ijkuak kitaj tikchiuaj tlen kuali uan tikteititiaj timotlasojtlaj (Mat. 5:16).

6. ¿Ken techpaleuis tla okachi timouikaskej inuan tokniuan?

⁶ Kuali tiyetoskej tla okachi timouikaj inuan tokniuan. Pablo okijto: “Nochipa ximosepanyolchikauakan [...]. Ijkon amo nanyoltlakuauaskej ika ichikaualis tlajtlakoli tlen tekajkayaua” (Heb. 3:13). Jehová uelis kiyolinis se tokni matechpaleui ijkuak timoyolkokouaj (Sal. 73:​2, 17, 23). Sapanoua techpaleuia tlen kichiua Jehová.

7. ¿Ken techpaleuia amo matimoxexelokan tla titetlasojtlaj? (Colosenses 3:​13, 14).

⁷ Tinochtin timochijchikauaj tikteititiskej timotlasojtlaj ikinon Jehová techteochiua miak (1 Juan 4:11). Tejuan ‘tikxikouaj tlen oksekimej kichiuaj’ porque timotlasojtlaj uan non techpaleuia amo matimoxexelokan (xiktlajtolti Colosenses 3:​13, 14; Efes. 4:​2-6). Ikinon sapanoua tipakij ijkuak timonechikouaj porque san ompa kuali timomachiliaj.

MATITETLAKAITAKAN

8. ¿Ken techpaleuia Jehová tinochtin matimouikakan?

⁸ Tinochtin titlajtlakolejkej pero Jehová techpaleuia kuali matimouikakan inuan nochtin tokniuan tlen chantij ipan nochi tlaltikpak (1 Cor. 12:25). Biblia kijtoua: “ToTajtsin Dios namechmachtijtok ken moneki nanmosepantlasojtlaskej” (1 Tes. 4:9). ¿Ken techmachtia? ITlajtol techiluia tlen moneki tikchiuaskej para okachi timouikaskej inuan oksekimej. Tejuan tikkauiliaj Jehová matechyekana ijkuak timomachtiaj tlen kijtoua iTlajtol uan tikchiuaj tlen ompa techiluia (Heb. 4:12; Sant. 1:25). Ikinon tiiTlaixpantijkauan Jehová timochijchikauaj ijkon tikchiuaskej.

9. ¿Tlen techmachtia tlen kijtoua Romanos 12:​9-13?

⁹ ¿Ken techpaleuia iTlajtol toTajtsin Dios okachi matimouikakan inuan tokniuan? Matikitakan tlen okijkuilo Pablo itech Romanos 12:​9-13 (xiktlajtolti). ¿Tlen kijtosneki kanin kijtoua “namejuan achto xitetlakaitakan”? Moneki tikitaskej ken tikteititiskej titetlasojtlaj. Nin kijtosneki matitetlapojpoluikan, kuali matikinselikan oksekimej uan matikinmakakan tlen tikpiaj (Efes. 4:32). Amo matikchiakan oksekimej matechnotsakan. Tejuan achto matikinnotsakan uan ijkon tikitaskej melauak tlen okijto Jesús. Ye okijto: “Okachi paki akin itlaj kitemaka uan amo ijkuak itlaj kiselia” (Hech. 20:35).

10. ¿Ken tikteititiskej ‘titetlakaitaj’ uan ‘timochijchikauaj titekipanoskej’? (Noijki xikita foto).

¹⁰ Pablo okijto ‘achto matitetlakaitakan’ pero noijki okijto ‘matimochijchikauakan matitekipanokan uan amo matitlatsiuikan’. Akin kipaktia tekipanos san niman kichiua tekitl tlen kimakaj. Proverbios 3:​27, 28 kijtoua: “Xikinchiuili tlen kuali akinmej uelis tikinchiuilis, tla tikmatok uelis tikinpaleuis”. Ikinon matimochijchikauakan matikinmakakan tlen moneki akinmej itlaj kinpoloua. Amo matikijtokan satepan tikinpaleuiskej nion matimokuayejyekokan ikaj kinpaleuis (1 Juan 3:​17, 18).

11. ¿Tlen techpaleuis okachi matimouikakan inuan tokniuan?

¹¹ Noijki tikteititiaj tikintlakaitaj oksekimej ijkuak san niman tikintlapojpoluiaj tla itlaj techtoktiaj. Efesios 4:26 kijtoua: “Amo xikualantokan nochi se tonal”. ¿Tleka ijkon kijtoua? Versículo 27 kijtoua ijkon ‘amo tikkauiliskej Diablo itlaj makichiua’. Jehová miak uelta techiluia itech iTlajtol matikintlapojpoluikan oksekimej. Colosenses 3:13 kijtoua: ‘Nochipa [...] xitetlapojpoluikan ika nochi namoyolo’. Okachi timouikaskej inuan tokniuan tla tikilkauaj tlen techtoktiaj uan tikintlapojpoluiaj. Ijkon ‘san sekan tiyetoskej uan kuali timouikaskej’ (Efes. 4:3). Ikinon miak ipati matitetlapojpoluikan uan ijkon timoyekuikaskej uan amo timoxexeloskej.

12. ¿Ken techpaleuia Jehová matitetlapojpoluikan?

¹² Ualeua tikitaj oui tiktlapojpoluiskej akin itlaj otechtokti. Pero uelis titetlapojpoluiskej porque toTajtsin Dios techpaleuis ika iespíritu santo. Biblia kijtoua ‘espíritu santo techmaka chikaualistli’. Non techpaleuia matipakikan ijkuak tikchiuaj tlen kuali. Ijkon tikteititiaj titetlasojtlaj uan titetlapojpoluiaj ika nochi toyolo (Rom. 12:11). Ikinon matiktlatlaujtikan Jehová matechpaleui ika iespíritu santo (Luc. 11:13).

“AMO XIMOXEXELOKAN”

13. ¿Tlen tlamantli uelis techxexelos?

¹³ Tinochtin tlatlamantli timokuayejyekouaj porque tlatlamantli otechiskaltijkej (1 Tim. 2:​3, 4). Ikinon tlatlamantli timopajtiaj, tlatlamantli timotlakentiaj uan tlatlamantli timoyolpaktiaj. Pero moneki timomaluiskej para amo timoxexeloskej (Rom. 14:4; 1 Cor. 1:10). ToTajtsin Dios yotechititi ken timosepantlasojtlaskej ikinon amo tikijtouaj okachi kuali tlen tejuan tikpejpenaj tikchiuaskej (Filip. 2:3).

14. ¿Tlen moneki tikchiuaskej uan tleka?

¹⁴ Noijki ijkuak tikinyolchikauaj tokniuan techpaleuia amo matimoxexelokan (1 Tes. 5:11). Miakej tlen ayakmo omonechikouayaj uan tlen ayakmo opouiayaj itech tlanechikol, oksepa opejkej touan monechikouaj uan tejuan kuali tikinseliaj (2 Cor. 2:8). Se tokni tlen yokipiaya majtlaktli xiuitl ayakmo omonechikouaya, okijto tlen opanok ijkuak oksepa omonechikoto. Okijto: “Nochtin opakiayaj ijkuak onechtlajpalouayaj” (Hech. 3:19). Sapanoua okipaleui ijkuak okitak tokniuan kuali okiselijkej. Ye okijto: “Onikajsikamatki Jehová kineki oksepa maniyolpaki”. Tla timochijchikauaj titeyolchikauaskej, Jesús techyolinis matikinyolseuikan akinmej kimachiliaj ‘kimamajtokej itlaj etik’ (Mat. 11:​28, 29).

15. ¿Tlen okse tlamantli techpaleuis amo matimoxexelokan? (Noijki xikita foto).

¹⁵ Noijki techpaleuis amo matimoxexelokan tla kuali tikintlapouiaj oksekimej. Job 12:11 kijtoua: “¿Kox tonakas amo kinyekoua tlajtolmej ijkon ken tonenepil kiyekoua tlakuali?”. Akin kimati tlakualchiuas achto kiyekoua tlakuali para kitas kox uelik tlen okichijchi. Tejuan noijki kualtsin matikintlapouikan oksekimej uan ijkon kinyolchikauas tlen tikinmiluiskej (Sal. 141:3; Efes. 4:29).

16. ¿Akinmej moneki teyektlapouiskej?

¹⁶ Tlakamej tlen yomonamiktijkej moneki kualtsin makitlapouikan insiua uan tetajmej noijki kualtsin makintlapouikan inkoneuan (Col. 3:​19, 21; Tito 2:4). Tlayekankej noijki kinyektlapouiaj tokniuan uan kinyolchikauaj porque Jehová okinnauati makinmaluikan (Is. 32:​1, 2; Gál. 6:1). Proverbios 15:23 kijtoua: “Melauak teyolchikaua tla moijtoua se tlajtoli ijkuak moneki”.

“XIKTEITITIKAN NANTETLASOJTLAJ IKA TLEN NANKICHIUAJ”

17. ¿Tlen tikchiuaskej tla tiknekij tikteititiskej titetlasojtlaj ika nochi toyolo?

¹⁷ ¿Tlen tikchiuaskej tla tiknekij tikteititiskej titetlasojtlaj ika nochi toyolo? 1 Juan 3:18 kijtoua: “Amo san xikijtokan nantetlasojtlaj. Xikteititikan nantetlasojtlaj ika tlen nankichiuaj uan xikchiuakan ika nochi namoyolo”. Okachi tikintlasojtlaskej tokniuan uan inuan timouikaskej tla timochijchikauaj inuan tiyetoskej. Noijki inuan matimotlapouikan ijkuak timonechikouaj, inuan matitetlapouikan uan matikintlajpalotij inkalijtik. Ijkon tikteititiskej ‘toTajtsin Dios techmachtijtok ken moneki timosepantlasojtlaskej’ (1 Tes. 4:9). Tikitaskej melauak tlen kijtoua nin Salmo: “Sapanoua kuali uan teyolpaktia san sekan mayetokan tokniuan” (Sal. 133:1).