TLAMACHTIL 26
TLAKUIKALI 123 Ialtepe Jehová techyekana
Matiyetokan tiyolyamankej uan matikajsikamatikan amo nochi tikmatij
“Tejuan amo uelis tikajsikamatiskej akin kipia miak chikaualistli” (JOB 37:23).
NIN TLEN TIMOMACHTISKEJ
Tejuan amo nochi tikmatij miak tlamantli pero techpaleuis tla tikatej tiyolyamankej. Noijki techpaleuis tla tikchiuaskej tlen tikmatij uan tla tikneltokaj Jehová.
1. ¿Tlen okichi Jehová ijkuak otechchijchi uan tleka?
JEHOVÁ otechchijchi kuali matimokuayejyekokan, matimomachtikan miak tlamantli uan matikajsikamatikan ken tikchiuaskej tlen timomachtiaj. ¿Tleka ijkon otechchijchi? Ye kineki matiyetokan tiixtlamatkej uan kineki kuali matimokuayejyekokan tlen tikpejpenaskej tikchiuaskej ijkuak tiktekichiuiliskej (Prov. 2:1-5; Rom. 12:1).
2. (1) ¿Tlen moneki tikajsikamatiskej? (Job 37:23, 24; noijki xikita dibujo). (2) ¿Ken techpaleuia matiyetokan tiyolyamankej uan matikajsikamatikan amo nochi tikmatij?
2 Tejuan amo nochi tikmatij maski Jehová otechchijchi matimomachtikan miak tlamantli (xiktlajtolti Job 37:23, 24). Matikitakan tlen okipanok Job. Jehová okitlajtlani miak tlamantli pero ye amo okimatki ken kinankilis uan okajsikamatki amo nochi okimatiaya. Non okipaleui makipatla ken omokuayejyekouaya uan okajsikamatki omonekiaya yetos yolyamanki (Job 42:3-6). Tejuan noijki matiyetokan tiyolyamankej uan matikajsikamatikan amo nochi tikmatij. Tla tiyetoskej tiyolyamankej Jehová techmatiltis tlen moneki tikmatiskej uan non techpaleuis kuali matikpejpenakan tlen tikchiuaskej (Prov. 2:6).
Tejuan noijki techpaleuia tla tikajsikamatij amo nochi tikmatij ijkon ken okipanok Job. (Xikita párrafo 2).
3. ¿Tlen timomachtiskej?
3 Axkan tikitaskej seki tlamantli tlen amo tikmatij uan tleka ualeua techtekipachoua porque amo tikmatij non tlamantli. Noijki tikitaskej tleka techpaleuia amo matikmatikan seki tlamantli. Tlen timomachtiskej techpaleuis matikneltokakan Jehová techmatiltis tlen moneki porque ye okachi ixtlamatki (Job 37:16).
AMO TIKMATIJ KEMAN TLAMIS NOCHI TLEN AXKAN PANOTOK
4. ¿Tlen amo tikmatij ijkon ken kijtoua Mateo 24:36?
4 (Xiktlajtolti Mateo 24:36). Amo tikmatij keman tlamis nochi tlen axkan panotok. Nion Jesús amo okimatiaya ijkuak okatka nikan tlaltikpak. Satepan Jesús okinmilui iapóstoles san Jehová kinamiki kijtos keman panos seki tlamantli (Hech. 1:6, 7).a Jehová yokitlali tlen tonal kipojpolos tlen axkan panotok uan tejuan amo uelis tikmatiskej.
5. ¿Ken timomachiliaj porque amo tikmatij keman ejkos itonal toTajtsin Dios?
5 Tlen okijto Jesús techititia amo tikmatij tlen tonal kipojpoloskej nochi tlen axkan panotok. Ikinon xamo timokuayejyekouaj amo keman ejkos itonal Jehová uan timosotlauaj. Okachi ijkon kinpanoua tokniuan tlen yikipiaj miak xiuitl kitekichiuilijtokej Jehová. Noijki xamo amo tikxikouaj ijkuak techpinauiaj tofamiliares noso oksekimej porque ayamo ejko itonal toTajtsin Dios (2 Ped. 3:3, 4). Xamo timokuayejyekouaj tla tikmatiskiaj tlen tonal ajsiki amo okachi oui titlaxikoskiaj uan tikxikoskiaj ijkuak techpinauiskiaj.
6. ¿Ken techpaleuia amo matikmatikan keman ajsiki itonal toTajtsin Dios?
6 Jehová amo techiluia keman ejkos itonal porque techkauilia matikteititikan tiktekichiuiliaj porque tiktlasojtlaj uan tikneltokaj tlen ye kijtoua. Tejuan tiknekij nochipa tiktekichiuiliskej toTajtsin Dios uan amo san tiktekichiuiliskej hasta ijkuak ejkos itonal. Matimokuayejyekokan tlen kichiuas toTajtsin Dios ijkuak uits itonal uan amo san matimotlajtlanijtokan keman uits. Non techpaleuis okachi iuan matimouikakan uan okachi matikchiuakan tlen ye kipaktia (2 Ped. 3:11, 12).
7. ¿Tlen tlamantli tikmatij?
7 Okachi kuali matimokuayejyekokan tlen tikmatij. Kuali tikmatij 1914 opejki saiktlami tonalmej. ToTajtsin Dios otlanauati makinmijkuilokan seki profecías tlen kiteititiskiaj ken yetoskiaj saiktlami tonalmej. Ikinon tikmatij “iueyi tonal Jehová amo uejka kajki” (Sof. 1:14). Ye noijki kineki nochtin matikintlapouikan kuali tlajtoli itech Tekiuajkayotl (Mat. 24:14). Axkan titetlapouijtokej itech kanaj 240 altepemej ika kanaj mil tlajtoli. Nin techititia amo moneki tikmatiskej keman ejkos itonal Jehová para titetlapouiskej ika nochi toyolo.
AMO TIKMATIJ KEN TECHPALEUIS JEHOVÁ
8. ¿Tlen kijtosneki “nochi tlen kichiua” toTajtsin Dios? (Eclesiastés 11:5).
8 Tejuan amo tikmatij “nochi tlen kichiua akin melauak toTajtsin Dios” (xiktlajtolti Eclesiastés 11:5). Ijkuak kijtoua “nochi tlen kichiua” kijtosneki tlen kitekauilia mapano para kichiuas tlen ye kineki. Amo kuali tikmatij tleka kitekauilia mapano seki tlamantli nion tlen kichiuas para techpaleuis (Sal. 37:5). Biblia kijtoua tejuan amo uelis tikajsikamatiskej non tlamantli ijkon ken se konetsintli amo tikajsikamatij ijkuak moskaltia ijtik imama. Amo keman tikajsikamatiskej porque nion ixtlamatkej kajsikamatij.
9. ¿Tlen uelis timokuayejyekoskej porque amo tikmatij ken techpaleuia Jehová?
9 Xamo tikitaj oui ijkuak amo tikitaj ken techpaleuia Jehová. Ikinon ualeua amo timoyolchikauaj tiktekichiuiliskej Jehová noso tiaskej titlapaleuitiuij kanin okachi moneki mamotetlapoui. Xamo timotlajtlaniaj kox kipaktia Jehová tlen otikpejpenkej tikchiuaskej ijkuak amo kisa ijkon ken otikchiayaj. Xamo tiknekij okachi tiktekichiuiliskej Jehová pero amo ueli ijkon tikchiuaj. Xamo timochijchikauaj sapanoua titetlapouiskej pero amikaj techkaki. Xamo titlapaleuiaj kanin kalchiuaj tokniuan uan san niman itlaj tikixnamikij. Ikinon xamo timotlajtlaniaj kox techpaleuia Jehová.
10. ¿Tlen tikchiuaskej ijkuak amo tikmatij ken techpaleuia Jehová?
10 Tejuan amo tikmatij ken techpaleuis Jehová pero non techpaleuia matiyetokan tiyolyamankej uan techilnamiktia Jehová okachi kimati tlen techpaleuis (Is. 55:8, 9). Tikteititiskej techpaleuia tla tikkauaskej imak nochi tlen tikchiuaj. Noijki san ye matikueyichiuakan ijkuak techkakij ijkuak titetlapouiaj noso ijkuak tikchiuaj se tekitl itech ialtepe (Sal. 127:1; 1 Cor. 3:7). Timoyolchikauaj ijkuak tikmatij Jehová kita uan kimati tlen kichiuas ijkuak amo kuali kisa tlen tikchiuaj (Is. 26:12). Tejuan timochijchikauaj tikchiuaskej tlen moneki uan okseki tekitl tikkauaj imak Jehová. Tikneltokaj Jehová techyekanas maski amo kinchiuas milagros ijkon ken yiuejkika okichi (Hech. 16:6-10).
11. ¿Tlen tlamantli tikmatij?
11 Sapanoua techpaleuis tla timokuayejyekouaj tlen tikmatij. Pero ¿tlen tikmatij? Tikmatij Jehová tetlasojtla, yolkuali, ixtlamatki uan kipatioita nochi tlen tikchiuaj uan noijki ijkuak tikinpaleuiaj tokniuan. Ye nochipa kinteochiua akinmej amo kikauaj (Heb. 11:6).
AMO TIKMATIJ TLEN PANOS SATEPAN
12. ¿Tlen amo tikmatij ijkon ken kijtoua Santiago 4:13, 14?
12 (Xiktlajtolti Santiago 4:13, 14). Tejuan amo tikmatij tlen techpanos satepan. “Porque tinochtin titlajyouiaj uan uelis itlaj amo kuali techpanotikisa” (Ecl. 9:11). Amo tikmatij kox uelis tikchiuaskej tlen yotikijtojkej porque uelis itlaj techpanos uan amo tikmatij kox tiyoltoskej.
13. ¿Ken timomachiliaj ijkuak amo tikmatij tlen panos satepan?
13 Ualeua timotekipachouaj porque amo tikmatij tlen panos uan ayakmo tipakij porque san timokuayejyekojtokej tlen techpanos. Xamo itlaj techpanotikisa ikinon timoyolkokoskej uan titlajyouiskej. Ualeua tikchixtokej mamochiua tlen tiknekij pero tla amo mochiua xamo timoyolkokoskej uan timosotlauaskej (Prov. 13:12).
14. ¿Tleka tipakij? (Noijki xikinmita fotos).
14 Tejuan tiktekichiuiliaj Jehová porque tiktlasojtlaj ikinon titlaxikouaj maski ualeua titlajyouiaj. Biblia amo kijtoua toTajtsin Dios yikimati tlen techpanos nion kijtoua amo kitekauilis amitlaj matechpano ijkuak itlaj tikixnamikiskej. Jehová kineki matipakikan maski amo tikmatij tlen panos satepan uan ijkon tikteititiskej tiktlakamatij uan tikkauiliaj matechyekana (Jer. 10:23). Ijkuak tikiluiaj Jehová matechyekana ijkuak itlaj tikchiuaskej, yetoskia ken tikiluiaj tla ye kineki “tiyoltoskej uan tikchiuaskej seki tlamantli” (Sant. 4:15).
Sapanoua techpaleuia ijkuak tiktlakamatij Jehová uan tikkauiliaj matechyekana. (Xikinmita párrafos 14 uan 15).b
15. ¿Tlen tikmatij panos satepan?
15 Tejuan tikmatij toTajtsin Dios amo techkajkayaua uan amikaj uelis kiluis amo makichiua tlen yokijto kichiuas (Tito 1:2). Tejuan amo tikmatij tlen panos satepan pero Jehová yotechilui uelis nochipa tiyoltoskej. Nochipa yoltoskej akinmej yaskej iluikak uan akinmej mokauaskej nikan tlaltikpak. San ye kijtoua “ken tlamis se tlamantli tlen peua uan yiuejkika kimati tlen ayamo panoua”. Miak tlamantli tlen yokijto yomochi uan okseki tlamantli mochijtok (Is. 46:10). Tejuan tikmatij Jehová techtlasojtla uan amikaj uelis kitsakuilis ijkon makichiua (Rom. 8:35-39). Jehová techmaka ixtlamatilistli uan techyolseuia. Non techpaleuis matitlaxikokan maski san tlen tlamantli tikixnamikiskej. Noijki kuali tikmatij Jehová nochipa techpaleuis uan techteochiuas (Jer. 17:7, 8).
TIKITAJ OUI TIKAJSIKAMATISKEJ JEHOVÁ KUALI TECHIXMATI
16. ¿Tleka Jehová kuali techixmati? (Salmo 139:1-6).
16 (Xiktlajtolti Salmo 139:1-6). Jehová kimati ken otechchijchi ikinon kimati ken timomachiliaj uan ken timokuayejyekouaj. Jehová kita nochi tlen tikchiuaj. Kimati tlen tikijtouaj uan tlen tiknekij tikijtoskej uan tleka tiknekij tikchiuaskej seki tlamantli. Tekiua David okijto Jehová techyaualojtok uan nochipa techmaluia. ToTajtsin Dios kitekipachoua ken tikatej maski ye kipia miak chikaualistli uan otlachijchi ipan nochi tlaltikpak uan iluikak. Ikinon David okijto: “Amo nikajsikamati nochi non ixtlamatilistli. Kajki sapanoua uejkapan uan amo ueli nikajxilia” (Sal. 139:6).
17. ¿Tleka ualeua tikitaj oui tikajsikamatiskej Jehová kuali techixmati?
17 Ualeua tikitaj oui tikajsikamatiskej Jehová techtlasojtla uan kitekipachoua tlen techpanoua. Xamo amo tikajsikamatij porque amo ijkon otechmachtijkej ijkuak otechiskaltijkej noso amo ijkon otikneltokayaj ijkuak ayamo otimomachtiayaj Biblia. Xamo techkuejsoua totlalnamikilis porque yiuejkika otikchijkej itlaj amo kuali uan timokuayejyekouaj Jehová amo kineki touan mouikas ijkon ken okipanok David (Sal. 38:18, 21). Xamo ikaj mochijchikaua kipatlas inemilis uan kichiuas tlen toTajtsin Dios kipaktia. Pero xamo motlajtlania: “¿Tleka toTajtsin Dios amo kineki manikchiua tlen nechpaktia tla ye nechajsikamati?”.
18. ¿Tleka moneki matikajsikamatikan Jehová okachi kuali techixmati? (Noijki xikinmita fotos).
18 Jehová techtlasojtla maski ualeua timotlapololtiaj. Noijki kajsikamati ken timomachiliaj uan tleka tikchiuaj seki tlamantli. Techtlasojtla maski kita tlen amo kuali tikchiuaj pero kajsikamati ken timomachiliaj uan tleka ualeua itlaj tikchiuaj (Rom. 7:15). Ijkuak tikajsikamatij ken techita Jehová, tipakij uan tiknekij okachi tiktekichiuiliskej.
Tejuan amo nochi tikmatij pero Jehová yokijto satepan kualtsin tiyetoskej uan non techyolchikaua matitlaxikokan ijkuak titlajyouiaj. (Xikinmita párrafos 18 uan 19).c
19. ¿Tlen tikmatij kichiua toTajtsin Dios?
19 Tejuan kuali tikmatij Jehová techtlasojtla. Ye techtlasojtla miak ikinon techinmaka itlanauatiluan porque kineki kuali matiyetokan (1 Juan 4:8). Noijki okitemakak iKone porque kineki nochipa matiyoltokan. Non tetliokolil techmachtia uelis tikyolpaktiskej Jehová maski titlajtlakolejkej (Rom. 7:24, 25). Noijki tikmatij “toTajtsin Dios nochi kimati. Ye okachi ueyi uan amo ijkon ken toyolo” (1 Juan 3:19, 20). Jehová kuali techixmati uan kimati uelis tikchiuaskej tlen ye kineki.
20. ¿Tlen techpaleuis amo okachi matimotekipachokan?
20 Jehová techiluia nochi tlen moneki tikmatiskej. Matiyetokan tiyolyamankej uan non techpaleuis amo matechtekipacho tlen amo tikmatij. Noijki matikchiuakan tlen okachi miak ipati uan ijkon tikteititiskej tikneltokaj Jehová porque san ye okachi ixtlamatki (Job 36:4). Axkan amo nochi tikmatij pero tipakij porque satepan nochipa tiyoltoskej uan okachi tikixmatiskej toTajtsin Dios (Ecl. 3:11).
TLAKUIKALI 104 Techmaka moespíritu santo
a Jesús tlayekanas ijkuak kipojpoloskej nochi tlen kinauatia Satanás. Ikinon Jesús yikimati tlen tonal peuas Armagedón uan keman kintlanilis akinmej kikokoliaj (Apoc. 6:2; 19:11-16).
b FOTO: Se tokni uan ikone kikalakiaj seki tlamantli ijtik inmochila.
c FOTO: Se tokni tlajyouijtok pero mokuayejyekoua ken pakis ijkuak yetos itech xochitlali.