Jehová otechpaleui matipakikan maski san kanin otechtitlankej

1979 Mats uan Ann-Catrin omomachtitoj Galaad uan yotlapaleuijkej itech altepemej Irán, Mauricio, Myanmar, Tanzania, Uganda uan Zaire. Se tokni tlen okinmachti ompa Galaad tlen itoka Jack Redford okinmilui: “Xipakikan maski san kanin namechtitlaniskej”. Sapanoua okinpaleui tlen okinmilui tokni porque yimiak uelta okinpatlakej kanin tlapaleuiaj. Matikitakan tlen okinpanok.

¿Ken opejki nantlaneltokaj?

Mats: Ijkuak omochijtoka Segunda Guerra Mundial nopapa ochantiaya ompa Polonia uan okitak okichiuayaj tlen amo kuali akinmej pouij teopan. Pero ye okijtouaya: “Xamo kajki se religión tlen melauak tlamachtia iTlajtol toTajtsin Dios”. Satepan onikajsikamatki neli tlen okijtouaya nopapa. Ne onechpaktiaya nikinkouas libros uan se tonal onikko se libro azul tlen itoka La verdad que lleva a vida eterna. Onechpakti ken omotokayotiaya non libro uan non youak nochi oniktlajtolti. Mostlatika onikajsikamatki non libro okijtouaya tlen melauak.

1972 opejki nikintlajtoltia amatlajkuilolmej tlen kinchiuaj iTlaixpantijkauan Jehová uan opejki nikajsikamati tlen tlamachtia Biblia. Onimomachili ken tlasemanki tlen okijto Jesús okintemojtinemiaya perlas kuajkualtsitsintin uan nochi omotlanemakito uan okiko perla. Yetoskia ken nochi onimotlanemaki porque ayakmo onimomachti para niyetos nitepajti (Mat. 13:​45, 46). Onimoapolakti 10 de diciembre 1972.

Opanok se xiuitl uan nopapanuan uan nokni tlen okachi tsikitsin opejki momachtiaj uan omoapolaktijkej. Julio 1973 onimochi precursor regular. Itech totlanechikol okatka se tokni precursora sapanoua kuajkualtsin. Non tokni itoka Ann-Catrin uan kuali omouikaya iuan Jehová. San niman otimotlasojtlakej uan 1975 otimonamiktijkej. Otitlapaleuitoj naui xiuitl ompa Strömsund tlen poui Suecia uan ompa miakej okinekiayaj momachtiskej Biblia.

Ann-Catrin: Nopapa opejki momachtia Biblia ijkuak yitlamiskia momachtis universidad ompa Estocolmo. Nopapa onechuikaya ijkuak omonechikouaya uan ijkuak oyaya tetlapouiti maski yikin onikpiaya eyi metstli. Nomama okualanki uan okijto kiteititiskia iTlaixpantijkauan Jehová san tlakajkayauaj. Pero amo ouelik okiteititi iTlaixpantijkauan Jehová san tlakajkayauaj. Ikinon satepan omoapolakti. Onimoapolakti ijkuak onikpiaya 13 xiuitl uan ijkuak onikpiaya 16 onimochi precursora. Opejki nitlapaleuia Umeå kanin omonekiaya okachi mamotetlapoui kuali tlajtoli uan satepan onechiluijkej manitlapaleui ken precursora especial.

Satepan ne uan Mats otimonamiktijkej uan opejki miakej tikinmachtiaj. Opejki tikmachtiaj se ichpochtli itoka Maivor. Ye kuali omauiltiaya uan uelis kitlaniskia miak tomin. Pero satepan ayakmo omauilti uan opejki tlapaleuia ken precursora iuan nokni tlen okachi tsikitsin. 1984 san sekan oyajkej Galaad uan axkan tlapaleuiaj ken misioneras ompa Ecuador.

¿Tlen yonamechpaleui “xipakikan maski san kanin namechtitlaniskej”?

Mats: Tejuan yimiak uelta oksekan otechtitlankej. Tikchiuaj ijkon ken Jesús kichiua uan timochijchikauaj tiyetoskej tiyolyamankej ijkon ken ye kichiua (Col. 2:​6, 7). Timochijchikauaj tikinmajsikamatiskej tokniuan uan tikajsikamatij tleka kichiuaj seki tlamantli. Tikajsikamatij tlen kichiuaj inmialtepe uan tlen kinpaktia. Ijkuak tikchiuaj ken Jesús, timomachiliaj “ken se kouitl tlen toktok itempa aueyatl” ikinon tiyolpakij maski san kanin techtitlaniskej (Sal. 1:​2, 3).

Ann-Catrin: Ijkuak se kouitl oksekan kitokaj moneki makajsi tonaltsin uan ijkon oksepa kuali moskaltis. Jehová yetoskia ken “se tonaltsin” tlen nochipa techpaleuia (Sal. 84:11). Otechteochi porque tokniuan sapanoua okiteititijkej techtlasojtlaj. Ijkuak otitlapaleuiayaj Teherán tlen poui Irán, tokniuan tlen inuan otimonechikouayaj kuali otechselijkej uan okichijkej ijkon ken akinmej yiuejkika okitekichiuilijkej toTajtsin Dios. Tejuan ok otiknekiayaj titlapaleuiskej ompa Irán. Pero julio 1980 tekiua okijto ayakmo matitetlapouikan uan otechchixki san ome tonal para matikisakan itech non altepetl. Otechtitlankej África ompa Zaire tlen axkan motokayotia República Democrática del Congo.

Opejki nichoka ijkuak onikmatki techtitlaniskiaj África. Ne onimomojtiaya nias itech non altepetl porque okijtouayaj ompa miakej mokokouaj uan noijki katej miakej kouamej. Ome tokniuan tlen miak xiuitl ompa otlapaleuijkej otechiluijkej: “Pero ayamo keman ompa nanyauij. Xiakan uan namechpaktis África”. Melauak tlen otechiluijkej porque tokniuan tlen ompa chantij kuali otechselijkej. Opanok chikuase xiuitl uan tekiuajkej ayakmo otechkauilijkej matitetlapouikan ompa Zaire. Oniixuetskak porque oniktlatlaujtijtoka Jehová matechkauili ompa matiyetokan. Ijkon onikchi porque onikajsikamatki yonechpaktiaya ompa niyetos.

¿Tlen tlamantli kualtsin yonamechpanok?

Mats: Yotitlapaleuijkej itech miakej altepemej uan non yotechpaleui matikinpiakan miakej toyolikniuan. Kanin yotechtitlankej miakej yotikinmachtijkej, ualeua tisejse otikinmachtijkej kanaj 20 personas. Nochipa nikilnamiktok tokniuan tlen katej África otechtlasojtlakej miak uan kuali otechselijkej. Ijkuak otikintlajpalouayaj tokniuan ompa Tanzania otimokauayaj ijtik tocombi uan otiktlaliayaj innakastlan inkalijtik tokniuan. Yejuan omochijchikauayaj techpaleuiskej maski amo okipiayaj miak tlamantli (2 Cor. 8:3). Tejuan otechpaktiaya timotlapouiskej yiyouak uan otimotlapouiayaj tlen otechpanok non tonal. Noijki otiktlasojkamatiliayaj Jehová porque nochipa otechmaluiaya.

Ann-Catrin: Nipaki nikinmixmatis tokniuan maski tlatlamantli inmialtepe. Yotimomachtijkej tlajtoli francés, luganda, persa, suajili uan noijki yotikitakej tlen tlamantli kichiuaj tokniuan itech tlatlamantli altepemej. Sekimej tokniuan yotikinmachtijkej ken kichiuaskej seki tlamantli. Non yotechpaleui matikinpiakan toyolikniuan uan san sekan inuan tiktekichiuiliaj Jehová (Sof. 3:9).

Noijki yotikitakej Jehová kualtsin okichi miak tlamantli. Ijkuak oksekan otechtitlaniayaj otipakiayaj uan otikmatokaj Jehová techyekanaskia. Ye yotechmachti miak tlamantli tlen tejuan toselti amo tikmatiskia ken tikchiuaskej.

¿Tlen tlamantli yonankixnamikej uan tlen onankichijkej?

Mats: Yimiak uelta otimokokojkej uan se tonal otechkitski se kokolistli itoka malaria. Ann-Catrin san totoka okichiuilijkej seki operaciones. Noijki otechtekipachouayaj topapanuan porque yokipiayaj yimiak xiuitl. Tokniuan otechpaleuijkej porque kuali okinmaluiayaj uan okintlasojtlayaj ikinon tikintlasojkamatiliaj miak (1 Tim. 5:4). Ualeua amo kuali otimomachiliayaj porque uejka otikatkaj uan amo ueli otikinpaleuiayaj topapanuan.

Ann-Catrin: 1983 ijkuak otikatkaj Zaire onechkitski kokolistli itoka cólera. Tepajti okilui Mats omonekiaya san niman tiaskej itech okse altepetl. Ijkuak otlaneski san niman otiajkej Suecia itech se avión tlen okiuikaya miak tlamantli.

Mats: Ann-Catrin opajtik maski tepajti okijtojka amo pajtiskia. Sapanoua otichokakej porque otimokuayejyekojkej ayakmo titlapaleuiskiaj ken misioneros. Opanok se xiuitl uan otimokopkej Zaire uan otiajsitoj altepetl Lubumbashi. Ijkuakon opejki titlapaleuiaj itech se tlanechikol kanin amo okatkaj miakej tokniuan uan tlajtouaj suajili.

Ann-Catrin: Onechiluijkej nikpiaskia se nokonetsin ijkuak otitlapaleuijtokaj ompa Lubumbashi. Ye amo oneski porque oixpoliuik. Amo otikchiayaj tikpiaskej tokonetsin pero sapanoua otimoyolkokojkej ijkuak oixpoliuik. Jehová nochipa otechpaleui matiyolpakikan porque sapanoua miakej opejki tikinmachtiaj. Ayamo otikajxitiayaj se xiuitl uan totlanechikol omomiaktili. Otikatkaj 35 tlen otitetlapouiayaj uan satepan yotikatkaj 70. Noijki otimonechikouayaj 40 uan satepan opejki timonechikouaj 220. Otitetlapouiayaj miak uan onikitak Jehová otechteochijtoka uan non otechpaleui matimoyolseuikan. Pero ok tikilnamikij tokone uan timotlapouiaj tlen kichijtoskia. Yitiknekij tikitaskej tlen kichiuas Jehová para techpaleuis ayakmo matimoyolkokokan porque oixpoliuik tokone.

Mats: Satepan Ann-Catrin opejki sapanoua sotlaua. Noijki ne onechiluijkej sapanoua yomoxitini cáncer itech nokuetlaxkol uan omonekiaya nechchiuiliskej se operación tlen oui okatka. Pero axkan kuali nika uan Ann-Catrin mochijchikaua kitekichiuilis Jehová.

Tejuan tikmatij amo san tejuan titlajyouiaj. 1994 okinmiktijkej miakej ompa Ruanda. Satepan tejuan otikintlajpalotoj tokniuan tlen oksekan omopaleuitoj. Otikitakej Jehová kinpaleuia tokniuan porque okipiayaj chikauak intlaneltokilis, otlaxikouayaj uan kuali okinseliayaj oksekimej (Sal. 55:22).

Ann-Catrin: 2007 otechpanok itlaj amo kuali. Otiajkej ijkuak okitlapojkej Betel tlen kajki Uganda. Ijkuak otlanki, otiajkej ik Nairobi tlen kajki ompa Kenia. Otiajkej inuan 25 misioneros uan betelitas. Ijkuak tiajsiskiaj kanin monamiki Kenia uan okse altepetl, toixpan ouala se camión uan otechkuitikiski. San niman oixpoliuik akin okiuikaya camión uan makuili tokniuan. Okse tokni oixpoliuik itech hospital. Tiknekij maajsi tonal ijkuak oksepa tikinmitaskej toyolikniuan (Job 14:​13-15).

Ne onimokojko pero satepan onipajtik. Mats uan oksekimej tlen oyayaj itech camión otlajyouiayaj porque okilnamikiayaj tlen opanok. Ne noijki ijkon onechpanouaya youak uan sapanoua onimomojtiaya ijkuak onijsaya. Onikmachiliaya noyolo moketsaskia. Pero sapanoua otechpaleui tiktlatlaujtiskej Jehová uan otikintlajtoltiayaj textos tlen okachi otechpaktiayaj uan noijki otimokuayejyekouayaj tlen kijtouaj. Noijki otechpaleui otikitatoj tepajti. Axkan ayakmo okachi timomojtiaj uan tiktlatlaujtiaj Jehová matechpaleui matikinyolseuikan akinmej noijki ijkon kinpanoua.

Namejuan yonankijtojkej tlen yonamechpaleui xikixnamikikan seki tlamantli. Noijki nankijtouaj Jehová yetoskia ken namechuikatinemij ijkon ken totoltemej. ¿Uelis nantechyekiluiskej tlen kijtosneki non tlamantli?

Mats: Ika tlajtoli suajili kijtouaj “tumebebwa kama mayai mabichi” uan kijtosneki otechuikakej ijkon ken totoltemej. Ijkuak tikinuikaj totoltemej, tikinmaluiaj amo matlapanikan. Jehová noijki kuali techmaluia kanin techtitlani. Nochipa techmaka tlen moneki pero ualeua techmaka okachi miak tlamantli. Yotikitakej Jehová techtlasojtla uan techpaleuia porque akinmej pouij itech Cuerpo Gobernante techiknomatij.

Ann-Catrin: Neli tlen okijto Mats porque Jehová nochipa techpaleuia. Nikilnamiki se tonal onechnotskej uan onechiluijkej nopapa okatka hospital. Amo otikpiayaj tomin tlen ika tiaskiaj Suecia porque nonamik okipixki malaria. Ikinon otikijtojkej tiknemakaskiaj tocarro. Pero san niman otechualnotskej ome tokniuan. Se tokni uan isiua okimatkej tlen otechpanotoka uan okinekiayaj techtlaxtlauiliskej boletos para uelis tiaskiaj Suecia. Okse tokni yokipiaya miak xiuitl tlen otechnotski uan otechilui okipiaya se caja kanin okinechikouaya tomin uan okitlalili se amatsintli kanin okijtouaya “ijkuak ikaj itlaj kipolos” uan okinekiaya techmakas. Non okiteititi Jehová san niman otechpaleui (Heb. 13:6).

¿Tlen yonamechmachti 50 xiuitl nankitekichiuiliaj Jehová?

Ann-Catrin: Isaías 30:15 techmachtia tiyetoskej tichikauakej tla timoyolseuijtokej uan tla titlaneltokaj. Ijkuak tikneltokaj Jehová yetoskia ken ye topatka momaka (2 Crón. 20:​15, 17). Axkan yotikitakej Jehová okachi techteochiua ijkuak timochijchikauaj tiktekichiuiliskej maski san kanin techtitlanis.

Mats: Axkan yinikmati moneki nikneltokas maski san tlen nechpanos uan ijkon nikitas tlen kichiua para nechpaleuis (Sal. 37:5). Ye okijto nochipa touan yetoskia uan ijkon kiteititia kichiua. Axkan ok techpaleuia maski tikatej Betel ompa Myanmar.

Jehová kiteititis kintlasojtla telpochmej uan ichpochmej tla kipejpenaskej okachi kitekichiuiliskej ijkon ken tejuan otechititi techtlasojtla. Jehová kinpaleuis mapakikan maski san kanin kintitlaniskej.