Jehová nochipa techtlasojtlas

1, 2. ¿Ken momachiliaj sekimej tokniuan ijkuak itlaj kixnamikij?

MATIMOKUAYEJYEKOKAN se barco kajki itlajkotia mar uan sapanoua ejekakiaui. Barco sapanoua chikauak motlauiteki uan atl sapanoua kolinia. Barco uelis tlaxikos tla kitlamotlaskej ijtik atl tepostli tlen ika kiketsaltiaj.

² ¿Tikixnamikij itlaj tlen tikitaj oui? Tla ijkon timomachiliaj xamo techpanoua ijkon ken barco tlen atl sapanoua chikauak kiuiteki. Ijkon techpanoua ijkuak san niman mopatlatikisa ken timomachiliaj ijkuak itlaj tikixnamikij. Seki tonal tikilnamiktokej Jehová techtlasojtla uan techpaleuia. Pero okseki tonal timokuayejyekouaj Jehová amo kitekipachoua tlen techpanoua (Sal. 10:1; 13:1). Xamo se toyolikni techiluis itlaj tlen techyolchikauas uan non techpaleuis kuali matiyetokan san kanaj keski tonal (Prov. 17:17; 25:11). Pero satepan xamo oksepa amo kuali timomachiliskej. Xamo hasta timokuayejyekoskej Jehová ayakmo kitekipachoua tlen techpanoua. Tla ijkon techpanoua, ¿tlen techpaleuis matikneltokakan Jehová techtlasojtla uan techpaleuia?

3. (1) ¿Tlen kijtosneki Jehová tetlasojtla uan amo keman techkauas? (Salmo 31:7 uan 136:1). (2) ¿Tleka tikijtouaj san Jehová okachi tetlasojtla uan amo tekaua? (Noijki xikita dibujo).

³ Ijkuak itlaj tikixnamikiskej matikilnamiktokan “Jehová techtlasojtla uan amo keman techkaua”. Non yetoskia ken timopaleuiaj ika tepostli tlen kitlamotlaj ijtik atl para kiketsaltiskej barco (xiktlajtolti Salmo 31:7; 136:1). Ijkuak moijtoua Jehová techtlasojtla kijtosneki nochipa touan kajki uan amo keman techkaua. Ijkon ken ome personas tlen sapanoua motlasojtlaj. San Jehová okachi kuali kipia iyelis ikinon ye akin okachi kuali kiteititia non tlamantli. Biblia kijtoua Jehová “tetlasojtla uan amo tekaua” uan kiteititia sapanoua kintlasojtla akinmej kitekichiuiliaj (Éx. 34:​6, 7; Sal. 86:5). Nin techpaleuis matikilnamiktokan Jehová amo techkauas ijkuak itlaj tikixnamikiskej porque ye amo keman kinkaua akinmej kitekichiuiliaj (Sal. 23:4).

MATIKNELTOKAKAN JEHOVÁ MELAUAK TECHTLASOJTLA

4. ¿Tlen tlamantli otikmatkej ijkuak opejki timomachtiaj Biblia? ¿Tleka axkan ayakmo ikaj techkajkayauas?

⁴ Biblia kijtoua matikneltokakan Jehová techtlasojtla. Non yetoskia ken tiktlamotlaj tepostli ijtik atl tlen ika kiketsaltiaj barco para ika timopaleuiskej ijkuak itlaj tikixnamikij. ¿Ken tikitaj tlen otikmatkej ijkuak opejki timomachtiaj? Non tlamantli sapanoua miak ipati porque kajki itech iTlajtol toTajtsin Dios tlen otikneltokakej ijkuak opejki timomachtiaj. Otikmatkej toTajtsin Dios itoka Jehová, iKone Jehová itoka Jesús, amitlaj kimatij akinmej yomikej, tlaltikpak yetos se xochitlali uan uelis nochipa tiyoltoskej (Sal. 83:18; Ecl. 9:5; Juan 3:16; Apoc. 21:​3, 4). Otikneltokakej nin tlamantli ijkuak opejki timomachtiaj uan axkan ayakmo ikaj techkajkayauas. Noijki matikneltokakan Jehová techtlasojtla uan non techpaleuis amo matimokuayejyekokan amo kitekipachoua tlen techpanoua.

5. Xikyekijto tlen otikchijkej para ayakmo tikneltokaskej tlen otikneltokayaj.

⁵ Ijkuak opejki timomachtiaj Biblia, ¿tlen otechpaleui ayakmo matikchiuakan tlen otikneltokayaj? Xamo otikitakej itech Biblia kox melauak tlen otikneltokayaj. Matikijtokan achto otikneltokayaj Jesús ye Dios. Pero ijkuak opejki timomachtiaj xamo otimotlajtlanijkej kox neli tlen otikneltokayaj. Xamo otitlatemojkej tlen kijtoua Biblia uan otikitakej amo melauak tlen otikneltokayaj. Ijkuakon ayakmo otikneltokakej tlen otechmachtiayaj uan opejki tikneltokaj Jesús “ye achto okichijchijkej ijkuak ayamo itlaj okatka” uan otikneltokakej “san ye se ikone toTajtsin Dios” (Col. 1:15; Juan 3:18). Ualeua tikitaj oui ayakmo tikneltokaskej tlen otechmachtijkej porque “kajki ken se chikauak tepamitl” (2 Cor. 10:​4, 5). Pero ayakmo otikneltokakej non tlamantli ijkuak otikmatkej amo melauak tlen otechmachtiayaj (Filip. 3:13).

6. ¿Tleka Salmo 136 kijtoua miak uelta Jehová tetlasojtla uan amo tekaua?

⁶ Uelis tikchiuaskej ijkon ken yotikitakej tla timokuayejyekouaj Jehová amo techtlasojtla ijkuak itlaj tikixnamikij. Matimotlajtlanikan kox melauak tlen timokuayejyekouaj. Satepan matikitakan Salmo 136:1 kox mouika ika tlen timokuayejyekouaj. Nin texto kajki kanin peua tlamachtil. ¿Tleka nin texto kijtoua Jehová tetlasojtla uan amo tekaua? ¿Tleka Salmo 136 kijtoua 26 veces tlajtoli Jehová tetlasojtla uan amo tekaua? Yotikitakej Jehová kipatioita ialtepe uan amo kinkaua akinmej ompa pouij. Ikinon moneki matikneltokakan nin tlamantli ijkon ken tlen otikneltokakej ijkuak opejki timomachtiaj. Amo matikneltokakan ijkuak timokuayejyekouaj Jehová amo kitekipachoua tlen techpanoua. Ikinon matikixtopeuakan non tlamantli ijkon ken ijkuak otikixtopejkej tlen amo melauak tlamachtiaj.

7. ¿Tlen textos techpaleuiaj matikneltokakan Jehová techtlasojtla?

⁷ Biblia kinpia miakej textos tlen kiteititiaj Jehová melauak techtlasojtla. Matikitakan tleka ijkon tikijtouaj. Jesús okinmilui idiscípulos “namejuan okachi namopati amo ken miakej tototsitsintin” (Mat. 10:31). Ye amo okijto: ‘Namejuan xamo okachi namopati ken miakej tototsitsintin’. Jehová noijki okinmilui akinmej opouiayaj itech ialtepe: “Ne nimitsyolchikauas, kema, ne nimitspaleuis, ne melauak nimitspias ika noyekma ika melajkayotl” (Is. 41:10). Ye amo okijto xamo nimechpaleuis. Ninmej textos techiluiaj tlen melauak kichiuaj Jehová uan Jesús. Amo techiluiaj tlen xamo uelis kichiuaskej. Ninmej textos techyolchikauaj uan techpaleuiaj matikneltokakan Jehová techtlasojtla ijkuak titlajyouiaj uan ijkuak timokuayejyekouaj amo techtlasojtla. Kuali matimokuayejyekokan tlen kijtouaj ninmej textos uan matikiluikan Jehová ken timomachiliaj. Tla ijkon tikchiuaskej uelis tikijtoskej ijkon ken okijtojkej tokniuan tlen okatkaj achto siglo. Yejuan okijtojkej: “Yotikmatkej toTajtsin Dios techtlasojtla uan melauak ijkon tikneltokaj” (1 Juan 4:16).a

8. ¿Tlen uelis tikchiuaskej tla ok tikmachiliaj Jehová amo techtlasojtla?

⁸ ¿Tlen uelis tikchiuaskej tla ok timokuayejyekouaj Jehová amo techtlasojtla? Tla ijkon techpanoua matikitakan kox Jehová noijki ijkon mokuayejyekoua. Tejuan xamo tikmachiliskej Jehová amo techtlasojtla pero non amo melauak porque Biblia kijtoua Jehová techtlasojtla. Matikilnamiktokan iTlajtol toTajtsin Dios nochipa kijtoua tlen melauak pero uelis techkajkayauas tlen ualeua timokuayejyekouaj. Tla amo tikneltokaj Jehová techtlasojtla, yetoskia ken amo tikneltokaj ijkuak Biblia kijtoua Jehová ye tlasojtlalistli (1 Juan 4:8).

MATIKILNAMIKTOKAN TOTAJTSIN DIOS TECHTLASOJTLA

9, 10. ¿Tlen okinekiaya kijtos Jesús ijkuak okijto “toTajtsin Dios namechtlasojtla”? (Juan 16:​26, 27; noijki xikita foto).

⁹ Noijki techpaleuis okachi matikneltokakan Jehová techtlasojtla tla timokuayejyekouaj tlen Jesús okinmilui idiscípulos. Ye okinmilui: “ToTajtsin Dios namechtlasojtla” (xiktlajtolti Juan 16:​26, 27). ¿Tleka ijkon okinmilui idiscípulos? Ye amo ijkon okijto porque okinekiaya kijtos ken omomachiliayaj idiscípulos. Textos tlen achto katej kiteititiaj Jesús otlajtojtoka ijkuak timotlatlaujtiaj.

¹⁰ Jesús okinmilui idiscípulos omonekiayaj motlatlaujtiskej ika itoka pero amo okijto ye makitlatlaujtikan (Juan 16:​23, 24). ¿Tleka omonekiayaj kimatiskej nin tlamantli? Xamo discípulos kinekiskiaj kitlatlaujtiskej Jesús ijkuak okiyolitijkej porque kuali iuan omouikayaj. Xamo mokuayejyekoskiaj Jesús kinkakiskia ijkuak motlatlaujtiskiaj porque okintlasojtlaya uan kiluiskia iTajtsin makinpaleui. Pero Jesús okijto amo omonekiaya ijkon mokuayejyekoskej. Ye okinmilui: “ToTajtsin Dios namechtlasojtla”. ToTajtsin Dios sapanoua techtlasojtla ikinon ye ineuian techkaki ijkuak tiktlatlaujtiaj. Biblia ijkon kijtoua ijkuak techmachtia ken moneki timotlatlaujtiskej. Matimokuayejyekokan ken techpaleuia nin tlamantli. Ijkuak otimomachtijkej Biblia opejki tikixmatij uan tiktlasojtlaj Jesús (Juan 14:21). Ijkon ken idiscípulos Jesús tlen okatkaj achto siglo uelis tiktlatlaujtiskej toTajtsin Dios uan tikneltokaskej ye techkaki uan techtlasojtla. Okachi matiktlatlaujtikan toTajtsin Dios uan ijkon okachi tikneltokaskej ye techtlasojtla (1 Juan 5:14).

MATIKMATIKAN TLEKA UALEUA TIMOKUAYEJYEKOUAJ JEHOVÁ AMO TECHTLASOJTLA

11. ¿Tleka Satanás paki tla timokuayejyekouaj Jehová amo techtlasojtla?

¹¹ ¿Tleka ualeua timokuayejyekouaj Jehová amo techtlasojtla? Satanás kineki matimokuayejyekokan Jehová amo techtlasojtla uan ye neli ijkon kichiua matimokuayejyekokan. Ye “kitemojtinemi akin kikuas” uan kineki matimokuayejyekokan Jehová amo techtlasojtla (1 Ped. 5:8). Jehová sapanoua techtlasojtla ikinon okiualtitlanki iKone matechmakixtiki. Pero Satanás kineki matimokuayejyekokan tejuan titlajtlakolejkej uan amo technamiki non tetliokolil (Heb. 2:9). Satanás paki ijkuak tejuan timokuayejyekouaj Jehová amo techtlasojtla uan noijki paki ijkuak titlajyouiaj. Matikilnamiktokan Jehová ayakmo kitlasojtla Satanás. Pero Satanás kineki matimokuayejyekokan Jehová amo techtlasojtla uan amo techselia. Satanás kineki ijkon matimokuayejyekokan porque kineki techkajkayauas (Efes. 6:11). Matikilnamiktokan ken tlakajkayaua Satanás uan ijkon uelis timomaluiskej para amo imak tiuetsiskej (Sant. 4:7).

12, 13. ¿Tleka tlajtlakoli amo techpaleuia matikneltokakan Jehová techtlasojtla?

¹² Amo san Satanás itlajtlakol timokuayejyekouaj Jehová amo techtlasojtla. Noijki ijkon peua timokuayejyekouaj porque titlajtlakolejkej (Sal. 51:5; Rom. 5:12). Tlajtlakoli amo techpaleuia kuali matimouikakan iuan Jehová, amo kuali timokuayejyekouaj, kijtlakoua toyolo uan timokokouaj.

¹³ Tlajtlakoli amo techpaleuia kuali matimomachilikan. Kichiua matimotlajtlakoltikan ijkuak itlaj panoua, san matimotekipachokan, matimomojtikan uan matipinauakan. Ijkon timomachiliaj porque titlajtlakolejkej uan amo tikatej ijkon ken Jehová okinekiaya matiyetokan (Rom. 8:​20, 21). Tejuan amo nochi kuali tikchiuaj porque yetoskia ken tikatej ijkon ken se carro tlen ijyokisa illanta uan ayakmo ueli nejnemi ijkon ken moneki. Ikinon ualeua timotlajtlaniaj kox toTajtsin Dios techtlasojtla. Tla ijkon techpanoua matikilnamikikan Jehová ueyititok uan amo keman kinkaua akinmej kitlasojtlaj uan kintlakamatij itlanauatiluan (Neh. 1:5).

14. ¿Ken techpaleuia tikmatiskej Jehová techtlasojtla ijkuak okitemakak iKone? (Romanos 5:8; noijki xikita recuadro “Amo matechkajkayaua ‘ichikaualis tlajtlakoli’”).

¹⁴ Ualeua timokuayejyekouaj amo technamiki matechtlasojtla Jehová. Pero ye techtlasojtla ikinon tikpatioitaj maski amo technamiki. Amo uelis itlaj tikchiuaskej para tikmotlaniliskej Jehová matechtlasojtla. Pero ye sapanoua techtlasojtla ikinon okitemakak iKone para uelis techtlapojpoluis (1 Juan 4:10). Matikilnamiktokan Jesús okinmakixtiko akinmej tlajtlakolejkej (xiktlajtolti Romanos 5:8). Jehová kimati titlajtlakolejkej ikinon amo kichia nochi kuali matikchiuakan. Axkan yitikmatij ualeua timokuayejyekouaj toTajtsin Dios amo techtlasojtla porque titlajtlakolejkej. Ikinon matikneltokakan Jehová nochipa techtlasojtlas (Rom. 7:​24, 25).

AMO MATIKKAUAKAN JEHOVÁ

15, 16. ¿Tlen kichiuas Jehová tla amo keman tikkauaj? (2 Samuel 22:26).

¹⁵ Jehová kineki kuali matikpejpenakan tlen tikchiuaskej uan amo matikkauakan maski titlajyouiskej (Deut. 30:​19, 20). Amo matikkauakan Jehová uan ye noijki amo techkauas toselti maski san tlen techpanos (xiktlajtolti 2 Samuel 22:26).

¹⁶ Ijkon ken yotimomachtijkej matiktlamotlakan tepostli ijtik atl tlen ika kiketsaltiaj barco ijkuak sapanoua titlajyouiaj para uelis ika timopaleuiskej. Non kijtosneki tikilnamikiskej Jehová techtlasojtla uan nochipa techpaleuis. Tla se tonal timokuayejyekouaj toTajtsin Dios amo techtlasojtla matikitakan kox ye noijki ijkon mokuayejyekoua. Nochipa matikilnamiktokan Biblia kijtoua Jehová techtlasojtla uan amo keman techkauas.