Ma tikmachtikan totlalnamikilis

1, 2. 1) ¿Akin otechmakak totlalnamikilis? 2) ¿Tleka tiktlasojkamatiliaj Jehová?

JEHOVÁ otechchijchi pampa sejse tejuan ma tikpejpenakan tlen tikchiuaskej. Uan pampa kuali ma tikpejpenakan otechmakak totlalnamikilis. ¿Tlen kijtosneki tlalnamikilistli? Itlaj tlen totech kajki uan tlen techiluia tlen kuali uan tlen amo kuali (xikita recuadro tlen itoka “¿Tlen kijtosneki?”). Tla kuali tikmachtiaj totlalnamikilis, techpaleuis ma tikchiuakan tlen kuali uan ma tikixtopeuakan nochi tlen amo kuali. Jehová techtlasojtla uan kineki ma tiyolpakikan, ik non, otechmakak totlalnamikilis.

² Sekimej tlaltikpaktlakamej amo kimatij tlanauatilmej tlen katej itech Biblia, pero kichiuaj tlen kuali uan kixtopeuaj nochi tlen amo kuali (xiktlajtolti Romanos 2:14, 15). ¿Tleka? Pampa intlalnamikilis kinmiluia seki tlamantli kuali uan okseki amo kuali. Tla tlaltikpaktlakamej amo kipiaskiaj tlalnamikilistli, itech Tlaltikpak okachi mochiuaskia tlen amo kuali. Ik non, moneki ma tiktlasojkamatilikan Jehová pampa tinochtin tikpiaj totlalnamikilis.

3. ¿Ken titlapaleuiskej itech tlanechikol tla kuali tikmachtiaj totlalnamikilis?

³ Miakej tlaltikpaktlakamej amo kimachtiaj intlalnamikilis. Pero tejuan tiknekij tikmachtiskej pampa ma techpaleui ma tikmatikan tlen kuali uan tlen amo kuali. Moneki ma tiktlajtoltikan Biblia uan ma timomachtikan tlen kijtoa, ijkon uelis tikmachtiskej totlalnamikilis. Pero amo san non moneki tikchiuaskej. Noijki moneki ma tikintlasojtlakan itlanauatiluan toTajtsin Dios uan ma tikneltokakan techpaleuiaj. Ik non, tlatitlanil Pablo okijkuilo: “Tlan axa nomechnawatijtok, nikneki xikajsikamatikah nonkipiah nonmotlasojtlaskeh ika nomoyolo chipawak, kemi tetlasojtlah akimeh kipiah intlalnamikilis iwa intlaneltokalis chipawak” (1 Timoteo 1:5). Tla kuali tikmachtiaj totlalnamikilis uan tiktlakamatij, tikinpaleuiskej tokniuan itech tlanechikol uan ijkon tinochtin san sekan tiyetoskej. Noijki okachi tiktlasojtlaskej Jehová uan itech okachi titlaneltokaskej. Uan noijki tikteititiskej kuali iuan timouikaj uan tiknekij tikyolpaktiskej. Ijkon motas ken tikpiaj toyelis.

4. ¿Ken moneki ma tikmachtikan totlalnamikilis?

⁴ Pampa tikmachtiskej totlalnamikilis amo san moneki ma tikmatikan miakej tlanauatilmej uan nochi tlen kijtoa Biblia. Moneki nochipa ma timomachtikan, ma timokuayejyekokan itech tlen tiktlajtoltiaj uan ma tiktlajtlanilikan Jehová ma techpaleui ijkon ma tikchiuakan itech tonemilis. Ijkuak timomachtiaj Biblia okachi kuali tiknekij tikixmatiskej Jehová. Tiknekij tikmatiskej ken iyelis, tlen kipaktia uan tlen amo kipaktia. Ijkuak okachi tikmachtiskej totlalnamikilis, okachi tikchiuaskej ken toTajtsin Dios.

5. ¿Tlen timomachtiskej axkan?

⁵ Uelis timotlajtlaniaj: “¿Ken techpaleuia totlalnamikilis kuali ma tikpejpenakan tlen tikchiuaskej? ¿Ken uelis tikteititiskej tiktlakaitaj tlen oksekimej kinmiluia intlalnamikilis? ¿Uan ken techpaleuia totlalnamikilis ma tikchiuakan tlen kuali? Tla kuali tikmachtiaj totlalnamikilis uelis techpaleuis itech eyi tlamantli tlen axkan timomachtiskej. Achto, ijkuak timomaluiaj pampa amo timokokoskej. Ome, ijkuak tikpejpenaskej ken timoyolpaktiskej. Uan eyi, ijkuak titetlapouiaj itech tlen tikneltokaj.

XIKTEITITI IXTLAMATILISTLI

6. Tla timokokoaj, ¿tlen uelis tikpejpenaskej?

⁶ Biblia techiluia seki tlamantli tlen uelis techpaleuis amo ma timokokokan. Se neskayotl, techiluia amo ma tikkuakan tlamantli tlen uelis techkokos, uan amo okachi ma titlakuakan nion ma titlakonikan (Proverbios 23:20; 2 Corintios 7:1). Uan melauak, maski tikchiuaskej tlen kijtoa Biblia ok timokokoskej uan tiueuejtiskej noso tikokoxkatiskej. Ik non, tla timokokoaj, uelis moneki ma tikpejpenakan ken timopajtiskej. Uan noijki itech seki uejueyij altepemej tokniuan amo uelis yaskej kanin tlapajtiaj, pero uelis kipejpenaskej kox kinpajtiskej ika xiuitl noso okseki tlamantli. Miakej tokniuan kintlajtlaniaj akinmej tlayekanaj itech Betel ken uelis mopajtiskej.

7. ¿Tlen techpaleuis ma tikpejpenakan kox tikseliskej estli noso amo?

⁷ Akinmej tlayekanaj itech Betel uan tlayekankej amo uelis techiluiskej ken timopajtiskej, maski tikintlajtlaniskej amo techiluiskej tlen uelis tikpejpenaskej (Gálatas 6:5). Kema, tlayekankej kema uelis techpaleuiskej pampa toneuian ma tikpejpenakan ken timopajtiskej. ¿Ken uelis kichiuaskej? Uelis techilnamiktiskej tlen kijtoa toTajtsin Dios itech iTlajtol. Uelis techilnamiktiskej toTajtsin Dios technauatia: “Amo xikkuakah estli” (Hechos 15:29). Ika nin tlanauatil tikajsikamatij amo uelis timopajtiskej ika estli nion ika pajtli tlen kipia naui tlamantli tlen kipia estli. ¿Uan uelis tikseliskej okseki tlamantli tlen kisa itech nin naui tlamantli tlen kipia estli? Sejse moneki kijtos kox kiselis noso amo. Sekimej tokniuan intlalnamikilis kinmiluis kema uelis kiseliskej, pero oksekimej tokniuan intlalnamikilis amo kinkauilia ma kiselikan.a ¿Onka okseki tlaxelolmej itech Biblia tlen uelis techpaleuiskej ma tikpejpenakan ken ika timopajtiskej?

8. ¿Ken techpaleuia Biblia ma tikpejpenakan ken timopajtiskej?

⁸ Axkan amo onka pajtli pampa seki kokolistli. Pero sekimej uelis kijtoskej kimatij tlen ika uelis mopajtiskej. Ximomalui. Proverbios 14:15 kijtoa akin ixtlamatki amo tlaneltoka itech nochi tlen kiluiaj, okachi kuali mokuayejyekoa tlen kichiuas. Biblia kijtoa toTajtsin Dios kitemaka ixtlamatilistli uan tlamatilistli (Eclesiastés 2:26). Tla tikpiaj nin ixtlamatilistli, uelis tikpejpenaskej tlamantli tlen techpaleuis okachi ma tikueyichiuakan Jehová uan amo okachi ma timotekipachokan itech tlen techkokoa (Filipenses 2:4). Ken titlajtlakolejkej amo keman uelis tikijtoskej amo timokokoaj. Ik non, moneki timochijchikauaskej pampa tikteititiskej okachi tikpatioitaj tiktekichiuiliskej Jehová (xiktlajtolti Filipenses 1:10).

9. 1) ¿Ken techpaleuia Romanos 14:13, 19 ma tikpejpenakan ken timopajtiskej? 2) Tla amo tikchiuaj ken kijtoa tlatitlanil Pablo, ¿tlen uelis panos?

⁹ Yiuejkika itech ueyi altepetl Roma sekimej tokniuan okinteneuayaj oksekimej pampa amo san se tlamantli omokuayejyekoayaj itech tlakuali uan iluimej. Pero nin tlamantli uelis kijtlakoskia tlanechikol. Ik non, tlatitlanil Pablo okinmilui: “Noiwa sikimeh tokniwah kijtoah se tonati okachi ipati ke ok se tonati, iwa oksikimeh kimoliah nochteh n tonatijmeh san se impati. Nochteh kuali makimatokah itech inyolo tleka ijkó kiyejyekoliah” (xiktlajtolti Romanos 14:5, 13, 15, 19, 20). Nin techmachtia moneki tikpiaskej ixtlamatilistli pampa amo tikinchiualtiskej oksekimej ma kichiuakan tlen tikneltokaj okachi kuali. Tla amo tikchiuaj ken okijto tlatitlanil Pablo, ¿tlen uelis panos? Uelis tikinyolkokoskej tokniuan uan itech tlanechikol uelis yetos tlajyouilistli. Se neskayotl, sekimej tokniuan okinekiayaj oksekimej tokniuan ma kinkouilikan seki tlamantli uan ma kikuakan san seki tlakuali. Sekimej ijkon okichijkej pero oksekimej amo. Satepan, tlen tokniuan okinnemakiltijkej uan okinmiluijkej amo okinpaleui, uan miakej okualankej. ¿Tleka okualankej? Tokniuan akinmej otlanemakayaj amo okiteititijkej ixtlamatilistli. Yejuan uelis kipejpenaskiaj tlen kikuaskiaj uan tlen kitekitiltiskiaj. Pero ijkuak yejuan okinmiluijkej oksekimej noijki ijkon ma kichiuakan, san okintlajyouiltijkej tokniuan itech tlanechikol.

10. ¿Tleka moneki tiktlakaitaskej tlen oksekimej kipejpenaj? (Xikita tlaixkopinal tlen ika peua tlamachtil.)

¹⁰ Uelis ualeua amo techpaktis tlen kipejpenas se tokni pampa mopajtis. Pero amo moneki tikteneuaskej nion tikchiualtiskej ma kipatla tlen okipejpenki. Uelis tokni moneki okachi kuali kimachtis itlalnamikilis (1 Corintios 8:11, 12). Noso uelis tejuan moneki okachi kuali tikmachtiskej totlalnamikilis. Sejse moneki kipejpenas tlen kichiuas uan kiselis tlen panos pampa tlen otikpejpenkej.

IJKUAK TIKPEJPENAJ KEN TIMOYOLPAKTISKEJ

11, 12. ¿Ken techpaleuiaj Eclesiastés 3:4 uan Gálatas 5:19-21 ma tikpejpenakan tlen ika timoyolpaktiskej?

¹¹ Tinochtin moneki ma tiuetskakan uan ma timoyolpaktikan, pampa Jehová ijkon otechchijchi (Eclesiastés 3:4). Pero tla tiknekij kuali timoyolpaktiskej, moneki ma tikmaluikan tlen tikitaj uan keski kauitl timoyolpaktiaj. ¿Ken techpaleuia tlalnamikilistli kuali ma tikpejpenakan tlen ika timoyolpaktiskej?

¹² Biblia kijtoa amo keman ma tikchiuakan tlen amo kuali, ken auilnemilistli, amo ma tikinueyichiuakan teotsitsintin, amo ma tikchiuakan naualotl, amo ma timoteuikan, amo ma tiakan itech iluimej kanin kichiuaj tlen amo kuali nion sapanoa ma titlakonikan. Tlatitlanil Pablo okijto “akimeh ijkó kichiwah, mach kalakiskeh ilwikak kan Dios tlanawatijtok” (Gálatas 5:19-21). Ik non, ma timotlajtlanikan: “¿Notlalnamikilis nechkauilia ma nimoyolpakti ika tlen moteuiaj noso kanin kinpaleuiaj seki altepemej, noso kichiua okachi niman ma nikualani? ¿Notlalnamikilis nechkauilia ma nikinmita películas kanin mota auilnemilistli, naualotl noso kanin mota uintij uan kichiuaj tlen amo kuali?”.

13. ¿Ken techpaleuiaj 1 Timoteo 4:8 uan Proverbios 13:20 kuali ma tikpejpenakan tlen ika timoyolpaktiskej?

¹³ Ma tikitakan okseki tlaxelolmej tlen uelis techpaleuiskej ma tikpejpenakan tlen ika timoyolpaktiskej. Se neskayotl, 1 Timoteo 4:8 kijtoa ma tikchiuakan ejercicio. Uan nin uelis techpaleuis amo okachi ma timokokokan. Pero nin amo kijtosneki uelis tikchiuaskej ejercicio iuan nochtin tlaltikpaktlakamej. Pampa Proverbios 13:20 kijtoa: “Akin nemi iuan akin ixtlamatki ye noijki yetos ixtlamatki, uan akin mouika iuan akinmej amo yolkualmej mochiuas amo yolkuali”. Kuali tikajsikamatij tla tiknekij kuali tikpejpenaskej tlen ika timoyolpaktiskej, moneki tikmachtiskej totlalnamikilis nochi tlen kijtoa Biblia.

14. Se kalchanejke, ¿ken omopaleui ika tlen kijtoa Romanos 14:2-4?

¹⁴ Ma tikitakan inneskayo sekimej tokniuan tlen yomonamiktijkej tlen intoka Christian uan Daniela. Christian kijtoa ijkuak ken kalchanejkej kiueyichiuaj Jehová omotlapouijkej iuan ome inmichpokauan ken uelis moyolpaktiskej. Omotlapouijkej seki tlamantli tlen ika uelis moyolpaktiskej kuali uan okseki amo. Noijki omotlapouijkej iuan akinmej uelis mouikaskiaj. Ijkuakon, se inmichpoch okijto kanin momachtia sekimej telpokamej tlen noijki iTlaixpantijkauan Jehová okichiuayaj seki tlamantli tlen ye kineltoka amo kuali. Noijki okijto ualeua okinekiaya kichiuas ken yejuan. Itatajuan okiluijkej sejse moneki kitekitiltis itlalnamikilis pampa kipejpenas tlen kichiuas iuan akin kichiuas seki tlamantli (xiktlajtolti Romanos 14:2-4).

15. ¿Ken techpaleuia Mateo 6:33 ma tikpejpenakan keski kauitl timoyolpaktiskej?

¹⁵ ¿Tlen tlamantli okachi tikpatioita? ¿Timonechikos, titetlapouis uan timomachtis Biblia? ¿Noso timoyolpaktis? Jesús okijto seki tlamantli tlen uelis techpaleuis ma tikpejpenakan keski kauitl timoyolpaktiaj. Ye okijto: “Nomejwah moneki achto xikchiwakah tlan Dios nomechnawatia iwa xikchiwakah tlan Ye kimonekiltia. Iwa ijkó Dios nomechmakas nochi tlan nomechpolos” (Mateo 6:33). Ijkuak tikpejpenaskej tlen tikchiuaskej, totlalnamikilis moneki techilnamiktis tlen okijto Jesús.

IJKUAK TITETLAPOUIAJ ITECH TLEN TIKNELTOKAJ

16. ¿Tlen moneki ma techyoleua ma tikchiuakan totlalnamikilis?

¹⁶ Tla kuali tikmachtiaj totlalnamikilis amo san techiluis amo ma tikchiuakan tlen amo kuali. Noijki techiluis ma tikchiuakan tlen kuali, ken ma titetlapouikan. Totlalnamikilis techiluia ma tikintlapouikan oksekimej itech toTajtsin Dios, uelis itech inkalijtik uan noijki san kanin tikinmajsiskej tlaltikpaktlakamej. Ijkon okipanoaya tlatitlanil Pablo. Ik non, okijto: “Porke notech powi maniktetlapowi. ¡Nimialma tla amo oniktetlapowi!” (1 Corintios 9:16). Tla tikchiuaj ken ye, tikchijtoskej tekitl tlen moneki uan totlalnamikilis amo techtekipachos. Uan noijki, tlatitlanil Pablo okijto ijkuak titetlapouiaj, timochijchikauaj pampa intlalnamikilis tlaltikpaktlakamej kuali ma tlanankili ijkuak tikintlapouiaj (2 Corintios 4:2).

17. ¿Tlen okichi se tokni pampa kuali okimachti itlalnamikilis?

¹⁷ Ma tikitakan ineskayo se tokni tlen itoka Jacqueline. Ijkuak okipiaya 16 xiuitl, kanin omomachtiaya omomachtijkej kox tiuitsej itech yolkamej. Ye okipaktiaya tlanankilis kanin omomachtiaya, pero itech non tonal itlalnamikilis amo okikauili okachi ma tlajto. ¿Tleka? Pampa ye amo okineltokaya tiuitsej itech yolkamej. Ik non, omoka kitlapouis akin okinmachtiaya tlen ye okineltokaya. Ye amo okitlajtlachialti tlen opanok, pampa akin okinmachtiaya okipakti tlen ye okijto, uan okilui ma kintlapoui nochtin itech tlen okineltokaya. Tokni kuali omomachili pampa itlalnamikilis tlen okimachti ika Biblia okipaleui ma kichiua tlen kuali. ¿Kuali tekiti motlalnamikilis?

18. ¿Tleka miak ipati kuali ma tikmachtikan totlalnamikilis?

¹⁸ Tla timomachtiaj Biblia, timokuayejyekoaj itech tlen timomachtiaj uan tikchiuaj, kuali tikmachtiskej totlalnamikilis. Nin miak ipati, pampa techpaleuis ma tiktlakamatikan Jehová itech nochi tonemilis. ¿Amo melauak tinochtin tiknekij ijkon tikchiuaskej?