¡XIMOMALUIJTOKAN!
Tlajyouijtokej akinmej omopaleuitoj itech okse altepetl: Ompa Ucrania Sapanoua miakej cholouaj
Rusia opejki kiteuia Ucrania 24 de febrero 2022. Nin okichi sapanoua miakej matlajyouikan uan oksekimej macholokan.a
Nataliia chanti Ucrania itech altepetl Járkov, ye okijto: Sapanoua otojtoponkej bombas, sapanoua onimomojti uan onikitak miak tlamantli tlen teyolkoko. Ijkuak otikmatkej seki trenes kisaskiaj, otikijtojkej noijki ticholoskej. Otikkajkej nochi tlen otikpiaya porque okijtojkej amo uelis miak tikuikaskiaj san atl, tlen tikkuaskiaj, seki amamej uan pajtli. Nochi otikkajkej, otiayaj kanin kajki tren maski ouetsiayaj bombas.
Noijki Nadija chanti Ucrania itech altepetl Járkov, ye okijto: Amo otikneltokayaj kox melauak peuaskia guerra, onikkakiaya ken oksekan ouetsiayaj bombas uan ventanas otijtikuiniayaj. Onicholo, san onikuikak tlen omonekiaya. Onikiski 8:00 am uan onia altepetl Lviv ipan se tren, satepan okinkitski se autobús para nias Polonia.
Axkan tikitaskej:
¿Tleka tlajyouiaj akinmej cholouaj uan mopaleuitiuij itech okse altepetl?
Rusia opejki kiteuia Ucrania, ik non, tlajyouiaj akinmej cholouaj pero iTlajtol toTajtsin Dios kijtoua tleka:
Tekiuajkej amo ueli kichiuaj tlen moneki. Akinmej tlanauatiaj ualeua kintlajyouiltiaj akinmej kinnauatiaj (Eclesiastés 4:1; 8:9).
Satanás tlanauatijtok ipan tlaltikpak, ik non, iTlajtol toTajtsin Dios kijtoua: “Nochteh n tlaltikpaktlakah non amo kineltokah Dios kinnawatijtok n Satanás” (Juan 14:30; 1 Juan 5:19).
Sapanoua yiuejkika titlajyouijtokej uan itech iTlajtol toTajtsin Dios oijkuilitoka tlen axkan panoskia: “Itech iksemi tonatijmeh yetos miak tlaijyowílistli” (2 Timoteo 3:1). Noijki axkan yetoskiaj guerras, tlaxixiniskia, miakej amo kipiaskiaj tlen kikuaskej uan miakej mokokoskiaj. Non kichiuaskia miakej macholokan (Lucas 21:10, 11).
¿Tlen uelis kinyolchikauas?
ITlajtol toTajtsin Dios kijtoua Jehová,b akin otechchijchi kintlasojtla uan kineki kinpaleuis akinmej cholouaj (Deuteronomio 10:18). Ye yokijto kinpaleuis akinmej tlajyouiaj ika iTekiuajkayo uan kinpatkayotis nochtin tekiuajkej ipan tlaltikpak (Daniel 2:44; Mateo 6:10). Ika iTekiuajkayo, Jehová san niman kachiuas Satanás (Romanos 16:20). Nin Tekiuajkayotl tlanauatis itech nochi tlaltikpak uan ayakmo yetoskej altepemej ken axkan. Nochtin tiyetoskej san se familia uan ayakmo keman monekis ikaj macholo porque Biblia kijtoua: “Yejuan motlaliskej itlampa uvas uan itlampa higos uan amikaj kinmomojtis porque ijkon yokijto Jehová akin kinyekana miakej soldados” (Miqueas 4:4).
San iTekiuajkayo toTajtsin Dios uelis kachiuas nochi tlen kichiua matlajyouikan akinmej axkan cholouaj. Xikita tlen kichiuas:
Guerra. “Kintlajtlamia guerras itech nochi tlaltikpak” (Salmo 46:9). Tla tikneki tikitas ken toTajtsin Dios kichiuas non, xikita “¿Cómo llegará a haber paz en la Tierra?”.
Ijkuak miakej kintlajyouiltiaj. “Kinpaleuis amo makintlajyouiltikan nion makinteuikan” (Salmo 72:14). Para tikajsikamatis ken uelis sekimej kipatlaskej tlen mokuayejyekouaj, xikita tlamachtil: “¿Ken uelis ayakmo titekokoliskej?”.
Akinmej amo kipiaj tomin. “Porque ye kimakixtis akin amo itlaj kipia uan kitlajtlanilia makipaleui” (Salmo 72:12). Xikita tleka sapanoua miakej amitlaj kipiaj itech tlamachtil: “¿Es realista esperar un sistema económico justo?”.
Miakej amo kipiaj tlen kikuaskej. “Yetos miak xinachtli ipan tlaltikpak” (Salmo 72:16). Tla tikneki tikmatis ken kichiuas toTajtsin Dios nochtin makipiakan tlen kikuaskej, xikita nin tlamachtil: “¿Un mundo sin hambre?”.
¿Uelis kinpaleuis tlen kijtoua Biblia?
Kema. ITlajtol toTajtsin Dios kinyolchikaua ijkuak kijtoua tlen panos satepan pero noijki kijtoua tlen uelis kichiuaskej axkan.
Principio bíblico: “Akin amo ixtlamatki kineltoka nochi tlen kiluiaj pero akin ixtlamatki mokuayejyekoua itech sejse tlamantli tlen kichiua” (Proverbios 14:15).
Kijtosneki: Xikita tlen uelis panos uan noijki ximokuayejyeko tlen monekis tikchiuas para timopaleuis. Xikita akinmej uelis itlaj mitschiuiliskej uan sekimej kintemouaj akinmej yauij mopaleuitiuij itech okse altepetl para kinchiuiliskej tlen amo kuali kanin ajsitiuij.
Principio bíblico: “Yika, tla tikpiah tlan tikkuaskeh iwa tlan tikmokentiskeh, san ika ye matipakikah” (1 Timoteo 6:8).
Kijtosneki: Amo san ximokuayejyeko tlen tlamantli tikpolos. Xiyolpaki tla yitikpia san tlen moneki.
Principio bíblico: “Xikchiwakah iwan oksikimeh ijkó kemi nomejwah nonkinekih makichiwakah nomowah” (Mateo 7:12).
Kijtosneki: Xikmati timochias uan xiyeto tiyolkuali. Ijkon kanin tiajsiti kinekiskej ompa xiyeto.
Principio bíblico: “Tla aka nomechtoktia itla amokuali, nomejwah amo xikmokopilikah” (Romanos 12:17).
Kijtosneki: Amo ximomakopa ijkuak mitstlajyouiltiaj non san kichiuas okachi xitlajyoui.
Principio bíblico: “Para nochi tlamantli nikpia chikaualistli porque onka akin nechmaka chikaualistli” (Filipenses 4:13, TNM).
Kijtosneki: Xiktlatlaujti toTajtsin Dios, san ye uelis mitspaleuis para titlaxikos.
Principio bíblico: “Amitla manomechtekipacho, yej nochipa xikilikah n Toteko tlan nonkinekih keman nonmotiotsajtsiliah, xiktlajtlanilikah iwa ximotlasojkamatikah. Iyolsewilis Dios, non amaka weleti kajsikamati, kimokuitlawis [noso kimaluis] nomoyolo iwa nomotlayejyekolis” (Filipenses 4:6, 7).
Kijtosneki: Xikilui Totajtsin Dios mamitsyolseui, maski san tlen tlamantli mitspanos kuali tiyetos. Xikita: Filipenses 4:6, 7 “No se inquieten por nada”.
a Mostlatika ijkuak Rusia okiteuito Ucrania, Alto Comisionado de las Naciones Unidas para los Refugiados (ACNUR), okijto amo onka okse tlamantli tlen okachi temomojti. San opanok 12 tonal uan ome millones ocholojkej, oyajkej omopaleuitoj itech okseki altepemej. Oksekimej san oyajkej itech okseki altepetsitsintin itech Ucrania.
b ToTajtsin Dios itoka Jehová (Salmo 83:18). Xikita tlamachtil: “¿Akin Jehová?”.