¿Tlen kijtosneki tikchiuaskej ken Cristo? | ¿Tlen kijtoua Biblia?

Miakej kijtouaj kichiuaj ken Cristo pero kichiuaj miak tlamantli tlen oksekimej kintlajyouiltia. Sekimej tlaixnekij, tlakajkayauaj uan amo tetlasojtlaj. Oksekimej kikajkayauaj insiua noso innamik. Ikinon miakej motlajtlaniaj tlen kijtosneki tikchiuaskej ken Cristo.

¿Tlen kijtosneki tikchiuaskej ken Cristo?

Miakej kijtouaj kichiuaj ken Cristo. Pero non amo kijtosneki san tikijtoskej ijkon tikchiuaj. Biblia kijtoua tikchiuaskej ken Cristo kijtosneki tikchiuaskej tlen ye otlamachti (Hechos 11:26). Jesús okijto: “Tla nankichiuaj tlen nitlamachtia, melauak nanyetoskej nodiscípulos” (Juan 8:31). Kuali tikmatij amo uelis nochi tiktlakamatiskej tlen Jesús okijto. Pero moneki timochijchikauaskej tikchiuaskej tlen ye otlamachti uan matikteititikan ijkon tikchiuaj ijkuak itlaj tikpejpenaj tikchiuaskej. Matikitakan ken uelis tikchiuaskej.

Akinmej kichiuaj ken Cristo melauak tetlasojtlaj

¿Tlen okijto Jesús? Ye okijto: “Ne namechmaka se yankuik tlanauatil: ximosepantlasojtlakan. Namejuan ximosepantlasojtlakan ijkon ken ne namechtlasojtla. Tla nanmosepantlasojtlaj, nochtin kimatiskej namejuan nannodiscípulos” (Juan 13:34, 35).

¿Tlen okichi Jesús? Jesús nochtin okintlasojtlak ijkuak ouala tlaltikpak uan amo okitak kox okipiayaj tomin noso kox oualayaj itech okseki altepemej. Noijki okinpajti akinmej omokokouayaj, okintlamakak akinmej oapismikiayaj uan topatka okitemakak iyolilis (Mateo 14:14-21; 20:28).

¿Tlen kiteititiaj akinmej kichiuaj ken Cristo? Yejuan kiteititiaj kintlasojtlaj nochtin personas uan amo kinchikoitaj. Noijki kitemakaj tlen kipiaj uan tetlapojpoluiaj. Kinpaleuiaj akinmej tlajyouiaj maski kikauaj tlen okichijtokaj (1 Juan 3:16).

Akinmej kichiuaj ken Cristo amo tlakajkayauaj

¿Tlen okijto Jesús? Ye okijto: “Ne niojtli [uan] ne nimelauak” (Juan 14:6).

¿Tlen okichi Jesús? Jesús amo keman otlakajkaya ijkuak itlaj okichiuaya uan ijkuak itlaj okijtouaya. Amo okinkajkayaj oksekimej para makichiuakan tlen ye okinekiaya uan amo okinmilui tlen amo neli. Noijki miakej okimatiayaj Jesús amo otlakajkayauaya maski okitlajtlakoltiayaj miak tlamantli (Mateo 22:16; 26:63-67).

¿Tlen kiteititiaj akinmej kichiuaj ken Cristo? Amo tlakajkayauaj nion tlachteki. Yejuan kitlaxtlauaj tlen moneki, kinpaktia tekipanoskej uan amo motonalpolouaj (Romanos 13:5-7; Efesios 4:28). Amo kintlachtekiaj oksekimej, amo tlakajkayauaj ijkuak kinchiuaj exámenes nion tlakajkayauaj ijkuak kitemitiaj se amatl para makinmakakan tekitl noso ijkuak kintemitiaj okseki amamej (Hebreos 13:18).

Akinmej kichiuaj ken Cristo nochtin kuali kinseliaj

¿Tlen okijto Jesús? Ye okijto: “Nouan xiualakan nochtin namejuan tlen chikauak nantekipanouaj uan yetoskia ken nankimamajtokej itlaj etik, uan ne namechyolseuis. Xikmoajkolmamaltikan noko uan ximochiuakan nodiscípulos porque ne niyolyamanki uan amo nimoueyineki. Ne namechyolseuis. Porque noko amo oui nankiuikaskej uan notlamamal amo okachi etik” (Mateo 11:28-30).

¿Tlen okichi Jesús? Jesús nochtin kualtsin okinseliaya uan yejuan kuali omomachiliayaj ijkuak inauak okatkaj. Okipaktiaya yetos inuan konemej, okinyolchikauaya akinmej omoyolkokouayaj uan nochtin okintlakaitaya (Marcos 10:13-15; Lucas 9:11).

¿Tlen kiteititiaj akinmej kichiuaj ken Cristo? Nochtin kinyeknotsaj, amikaj kitsatsajtsiliaj uan amikaj kitlajyouiltiaj (Efesios 4:29, 31, 32). Yejuan kintekipachoua tlen kinpanoua oksekimej uan kinpaleuiaj (Gálatas 6:10).

Akinmej kichiuaj ken Cristo amo kikajkayauaj insiua noso innamik

¿Tlen okijto Jesús? Ye okijto: “Nion se tlakatl makixelo tlen toTajtsin Dios yokisetili” (Marcos 10:9).

¿Tlen okichi Jesús? Jesús amo keman omonamikti pero okinmilui akinmej yomonamiktijkej amo makikajkayauakan insiua noso innamik (Mateo 19:9). Noijki okinmilui amo maauilnemikan uan ijkon amo kitlajyouiltiskej akin iuan omonamiktijkej (Mateo 5:28).

¿Tlen kiteititiaj akinmej kichiuaj ken Cristo? Yejuan amo kichiuaj tlen kiteititia amo kitlakaitaj insiua noso innamik (Hebreos 13:4). Akinmej yomonamiktijkej motlasojtlaj uan motlakaitaj (Efesios 5:28, 33).