¿Tlen kijtoua Biblia? | ¿Ken uelis tinochtin timoyekuikaskej?

Biblia kijtoua

Kuali tiyetoskej satepan porque iTekiuajkayo toTajtsin Dios technauatis uan amo porque tlakamej kichiuaskej kuali matiyetokan. Jesucristo kiyekantok non tekiuajkayotl tlen kajki iluikak. Matikitakan tlen kijtoua Biblia kichiuas satepan.

1. ToTajtsin Dios ‘kintlajtlamis guerras itech nochi tlaltikpak’ uan ijkon kichiuas “makipiakan yolseuilistli akinmej ye kinselia” (Salmo 46:9; Lucas 2:14).

2. ITekiuajkayo toTajtsin Dios tlanauatis ipan nochi tlaltikpak uan kipojpolos nochi tlen kichiua mamoxexelokan akinmej chantij okseki altepemej uan kichiua mamomijmiktikan (Daniel 7:14).

3. Jesús kiyekana iTekiuajkayo toTajtsin Dios uan kixmatij ken “Tekiua tlen kitemaka Yolseuilistli”. Ye kichiuas nochipa kuali matiyetokan (Isaías 9:6, 7).

4. Ijkuak tlanauatis iTekiuajkayo toTajtsin Dios kinmixpolos nochtin akinmej tetlajyouiltiaj porque “ye kikokolia akin kipaktia moteuis” (Salmo 11:5; Proverbios 2:22).

5. ToTajtsin Dios kinmachtia itekipanojkauan kuali mamouikakan inuan oksekimej. Biblia kijtoua tlen kichiuaj akinmej kinmachtia. Ompa kijtoua: “Kinkopaskej inmiespadas tlen ika tlameuaskej uan inlanzas kinkopaskej tlen ika kitekiskej xiuitl. Ayakmo moteuiskej ika espadas akinmej chantij itech tlatlamantli altepemej uan ayakmo kichiuaskej guerra” (Isaías 2:3, 4).

Sapanoua miakej iTlaixpantijkauan Jehová momachtijtokej moyekuikaskej inuan oksekimej (Mateo 5:9). Tinochtin tichantij itech kanaj doscientos treinta altepemej ikinon tlatlamantli otechiskaltijkej pero amo keman tikitskiskej se arma para ikaj itlaj tiktoktiskej.