¿Uelis techpaleuis Biblia ijkuak timoyolkokouaj?
Biblia technankilia
Biblia kijtoua san toTajtsin Dios techpaleuia porque ye “kinyolchikawa akimeh mosotlawah” (2 Corintios 7:6).
¿Ken kinpaleuia toTajtsin Dios akinmej moyolkokouaj?
Kinyolchikaua. ToTajtsin Dios kinyolchikaua akinmej moyolkokouaj. Kinmaka chikaualistli maski amo kinkixtilia tlen kinyolkokoua (Filipenses 4:13). ToTajtsin Dios mitskaki ijkuak tiktlatlaujtia porque Biblia kijtoua: “Jehová kajki inmiuan akinmej moyolkokouaj; ye kinmakixtia akinmej yolpatlachitokej” (Salmo 34:18). ToTajtsin Dios mitskakis maski sapanoua timoyolkokoua uan maski amo ueli titlajtoua (Romanos 8:26, 27).
Mitsyolchikauas tlen oksekimej okichijkej. Se akin okijkuilo Salmos okilui toTajtsin Dios nimitsnotsa maski nitlajyouia. ¿Tlen okipaleui ayakmo mamoyolkoko? Okilnamik toTajtsin Dios amo kineki matikilnamiktokan tlen amo kuali otikchijkej. Ye okijto: “Jehová, tla san tikitaskia ijkuak tikchiuaj tlen amo kuali, Jehová, ¿akin uelis tlaxikos? Porque san te melauak titetlapojpoluia uan ijkon mamitsueyichiuakan” (Salmo 130:1, 3, 4).
Satepan itlaj kichiuas toTajtsin Dios. ToTajtsin Dios kijtoua satepan ayakmo titlajyouiskej nion timoyolkokoskej. Pero axkan ok techyolchikaua. Ye kachiuas “nochi tlamantli tlen achto opanok ayakmo moilnamikis, nion ayakmo yetos itech toyolo” (Isaías 65:17).
Nota: TiiTlaixpantijkauan Jehová tikneltokaj toTajtsin Dios techpaleuia. Pero moneki mamopajti tla ikaj nochipa motekipachoua uan moyolkokoua (Marcos 2:17). Sejse moneki kipejpenas ken mopajtis porque tejuan amo uelis tikijtoskej ken moneki mopajtiskej oksekimej.