¿Mitspaleuis xitlaxiko tlen kijtoua Biblia tla sapanoua timokokoua?

Biblia kijtoua

Kema, techpaleuis tlen ompa kijtoua, porque toTajtsin Dios kineki techpaleuis ijkuak timokokouaj. Biblia kijtoua: “Jehová kipaleuis ijkuak mokokos itech itlapech” (Salmo 41:3). Ma tikitakan eyi tlamantli tlen techpaleuis tla sapanoua timokokouaj:

1. Ma tikiluikan toTajtsin Dios ma techpaleui ma titlaxikokan. “Iyolsewilis Dios, non amaka weleti kajsikamati” techpaleuis amo sapanoua ma timotekipachokan uan ma titlaxikokan (Filipenses 4:6, 7).

2. Ma tiyolpaktokan. Biblia kijtoua: “Tla tiyolpakij techpaleuis ma tipajtikan, pero tla san timoyolkokojtokej amo tichikajtoskej” (Proverbios 17:22, Dios habla hoy [Versión Popular]). Tla tiyolpakij, techpaleuis amo ma timoyolkokojtokan uan noijki tichikajtoskej.

3. Ma tikilnamiktokan tlen kichiuas toTajtsin Dios. Tla tikilnamiktokej satepan kuali tiyetoskej, techpaleuis ma tiyolpakikan maski timokokoskej (Romanos 12:12, TNM). Biblia kijtoua satepan amikaj kijtos: “Nimokokoua” (Isaías 33:24). ToTajtsin Dios kipojpolos nochi kokolistli tlen tlapajtijkej amo ueli kitlajtlamiaj. Noijki, ayakmo tlajyouiskej akinmej yokokoxkatikej, porque Biblia kijtoua: “Inakayo ma moyankuili ken ijkuak okatka telpochtli; oksepa ma chikajto ken ijkuak okatka telpochtli” (Job 33:25).

Nota: TiiTlaixpantijkauan Jehová tikneltokaj toTajtsin Dios techpaleuia. Pero ijkuak timokokouaj tikitatiuij se tlapajti (Marcos 2:17). Tejuan amo tikinmiluiaj ken moneki mopajtiskej oksekimej, non sejse moneki kitas.