¿Tlaneltokaj iTlaixpantijkauan Jehová itech Antiguo Testamento?

Kema. ITlaixpantijkauan Jehová tikneltokaj nochi Biblia “Dios otlanawati makijkuilokah” uan techpaleuia (2 Timoteo 3:16). Kema, Antiguo Testamento uan Nuevo Testamento techpaleuia. Uan amo tiknekij ikaj mamokuayejyeko Antiguo Testamento ayakmo techpaleuia, ikinon tiktokayotiaj Escrituras Hebreas uan Nuevo Testamento tiktokayotiaj Escrituras Griegas Cristianas.

¿Tleka akinmej kichiuaj ken Cristo moneki kitekitiltiskej Antiguo Testamento?

ToTajtsin Dios okinauati Pablo makijkuilo: “Nochi tlan yowejka omoijkuilo itech tiotlajkuíloli, omoijkuilo para matimoixtlamachtikah” (Romanos 15:4). Ikinon kuali tikmatij miak ipati tlen ijkuilitok itech Escrituras Hebreas. Uan techiluia tlen techpaleuia uan tlen yiuejkika opanok tlen noijki techyolchikaua.

• Tlen yiuejkika opanok. Escrituras Hebreas kuali techiluia ken toTajtsin Dios kualtsin okiyektlali tlaltikpak uan ken opejki tlajtlakoli. Nin techpaleuia tikmatiskej kanin tiuitsej uan tleka timikij (Génesis 2:7, 17). Noijki Antiguo Testamento techiluia ken toTajtsin Dios okinpaleui sekimej tlen opanokej ouijkayotl ken tejuan (Santiago 5:17).

• Tlamachtilmej tlen techpaleuiaj. Escrituras Hebreas kinpia amochmej Proverbios uan Eclesiastés, tlen kinpia miakej tlamatchtilmej tlen axkan noijki techpaleuia. Techiluia ken uelis yolpakis tofamilia (Proverbios 15:17). Ken moneki tikitaskej tekitl (Proverbios 10:4; Eclesiastés 4:6) uan noijki ken telpochmej uan ichpochmej uelis yolpakiskej (Eclesiastés 11:9–12:1).

Noijki techpaleuia miak timomachtiskej Tlanauatil tlen okijkuilo Moisés tlen kajki itech Torá noso Pentateuco (achto makuili amochmej tlen kinpia Biblia). Uan maski akinmej tikchiuaj ken Cristo amo moneki tiktlakamatiskej tlen kijtoua non Tlanauatil, principios tlen kinpia techpaleuiaj matiyolpakikan (Levítico 19:18; Deuteronomio 6:5-7).