¿Tleka iTlaixpantijkauan Jehová okipatlakej seki tlamantli tlen achto okineltokayaj?
Tlen tikneltokaj kisa san itech Biblia. Ikinon ijkuak itlaj okachi kuali tikajsikamatij, tikpatlaj tlen tikneltokaj.a
Tlen techiluia Proverbios 4:18 techpaleuia matikajsikamatikan tleka moneki ijkon tikchiuaskej: “Pero inmiojui akinmej yolmelauakej kajki ken ijkuak tlanestiuits okachi uan okachi tlanestiuits hasta kuali tlanesi”. Ijkon ken ijkuak tlanestiuits okachi kuali tikitaj tlen onka, ijkon tlen melauak, toTajtsin Dios yolik kinmatiltijtiuits itekipanojkauan (1 Pedro 1:10-12). Uan Biblia okijto toTajtsin Dios ijkon kichiuaskia itlamian tonalmej (Daniel 12:4).
Amo matechtlajtlachialti nion matechtekipacho tla itlaj mopatla. Akinmej okitekichiuiliayaj toTajtsin Dios itech achto siglo noijki okipatlakej seki tlamantli tlen achto okineltokayaj.
Moisés okinek kinpaleuis israelitas 40 xiuitl achto toTajtsin Dios kiluiskia makichiua non tekitl (Hechos 7:23-25, 30, 35).
Omoijto Mesías omonekiaya mikis uan oksepa kiyolitiskiaj, apóstoles amo okajsikamatkej (Isaías 53:8-12; Mateo 16:21-23).
Akinmej okichiuayaj ken Cristo itech achto siglo okineltokayaj okse tlamantli keman ualaskia “itonati n Toteko” Jehová (2 Tesalonicenses 2:1, 2).
ToTajtsin Dios okiyektlali tlen omokuayejyekouayaj itekipanojkauan. Uan tiktlatlaujtiaj axkan noijki ijkon makichiua (Santiago 1:5).
a Amo keman tiktlatiaj tlen tikpatlaj. Tikijkuilouaj tlen tikpatlaj uan nochtin tikinmatiltiaj. Se neskayotl, xikita kanin kijtoua “Tlen okachi kuali tikajsikamatij axkan” itech Amatlajkuilolmej tlen kajki itech Internet.