¿Tleka iTlaixpantijkauan Jehová ok yauij nechtlajpalotiuij maski yonikinmilui amo nechpaktia tlen tlamachtiaj?
Tinochtin tiiTlaixpantijkauan Jehová techpaktia tikinmiluiskej oksekimej tlen kijtoua Biblia maski sekimej amo kinekij techkakiskej. ¿Tleka? Porque tiktlasojtlaj toTajtsin Dios uan tikintlasojtlaj oksekimej (Mateo 22:37-39). Tiktlasojtlaj toTajtsin Dios uan non techyolinia nochtin matikintlapouikan (Hechos 10:42; 1 Juan 5:3). Ikinon ok titetlapouiaj ken yiuejkika otetlapouiayaj profetas (Jeremías 25:4). Titetlasojtlaj ikinon tikintlapouiaj oksekimej itech Tekiuajkayotl maski sekimej amo kinpaktia. Ijkon tikchiuaj porque uelis kinpaleuis mamomakixtikan (Mateo 24:14, TNM).
Ijkuak tiauij inkalijtik akinmej amo kinpaktia matikintlapouikan tlen tlamachtia Biblia, ualeua ikaj kisa tlen kineki kimatis tlen tlamachtia Biblia. Noijki onka okseki tlamantli tlen panoua ikinon ok tiuaij tekalijtik. Nikan kijtoua seki tlamantli tlen ualeua panoua:
Sekimej yauij oksekan chantitiuij.
Oksekimej tlen ompa chantij noijki kinekij kimatiskej tlen tlamachtia Biblia.
Miakej ualeua ayakmo mokuayejyekouaj ken achto omokuayejyekouayaj. Miakej kitaj moneki kitemoskej toTajtsin Dios porque kitaj tlen panotok noso itlaj kinpanoua ikinon kinekij kimatiskej tlen tlamachtia Biblia (Mateo 5:3, TNM). Sekimej axkan amo kinpaktia matikintlapouikan tlen kijtoua Biblia. Pero satepan uelis kipatlaskej tlen mokuayejyekouaj ijkon ken okichi tlatitlanil Pablo (1 Timoteo 1:13).
Pero amikaj tikchiualtiaj matechkaki (1 Pedro 3:15). Tikmatij sejse moneki kipejpenas tlen religión kineki kipias (Deuteronomio 30:19, 20).