¿Kineki toTajtsin Dios ma tikinmaluikan totatajuan tlen yikipiaj miak xiuitl?

Biblia kijtoua

Akinmej kinpiaj intatajuan moneki kitaskej kuali ma yetokan. Biblia kijtoua “moneki kipalewiskeh iwa kintlasojtlaskeh intajwah, ijkó kinkopiliskeh n tlasojtlálistli non intajwah yokinmakakeh. Ijkó kipaktiskeh n Toteko Dios” (1 Timoteo 5:4). Biblia noijki kijtoua moneki ma tikintlakaitakan totatajuan uan ijkuak tikinmaluiaj kijtosneki tiktlakamatij non tlanauatil (Efesios 6:2, 3).

ITlajtol toTajtsin Dios amo techiluia ken moneki tikinmaluiskej totatajuan tlen yikipiaj miak xiuitl. Pero techiluia ken okinmaluijkej intatajuan sekimej tlakamej uan siuamej tlen yiuejkika okatkaj. Noijki techiluia tlen uelis techpaleuis para tikinmaluiskej akinmej yikipiaj miak xiuitl.

• ¿Akinmej yiuejkika okatkaj ken okinmaluijkej intatajuan?

• ¿Ken techpaleuia Biblia?

• ¿Kijtoua Biblia moneki tochan tikinmaluiskej totatajuan?

¿Akinmej yiuejkika okatkaj ken okinmaluijkej intatajuan?

Yejuan tlatlamantli okinpaleuijkej intatajuan.

• Itajtsin José omotokayotiaya Jacob uan ye uejka okatka ijkuak yokipiaya miak xiuitl. Satepan José okipaleui itajtsin para iuan ma chantiti kanin ye okatka. Noijki okipaleui para kipiaskia tlen kikuas uan kanin chantiskia (Génesis 45:9-11; 47:11, 12).

• Rut oyajki ochantito kanin ochantiaya imonna uan miak otekipano para kimaluiskia (Rut 1:16; 2:2, 17, 18, 23).

• Ijkuak Jesús yiixpoliuiskia, ikaj okilui ma kimalui inantsin tlen itoka María porque nesi ye yoixpolika inamik (Juan 19:26, 27).a

¿Ken techpaleuia Biblia?

Ijkuak tikinmaluiaj totatajuan, ualeua sapanoua tisotlauaj. Pero Biblia techiluia seki tlamantli tlen uelis techpaleuis.

• Ma tikintlakaitakan totatajuan.

  Tlen kijtoua Biblia: “Xiktlakaita motajtsin uan monantsin” (Éxodo 20:12).

  ¿Ken tikchiuaskej? Ma tikinkauilikan totatajuan ma kichiuakan seki tlamantli uan yejuan ma kipejpenakan ken kinekij ma tikinmaluikan. Ma tikinmajsikamatikan uan ma tikinpaleuikan pero nochipa ma tikintlakaitakan.

• Ma titeajsikamatikan uan ma titetlapojpoluikan.

  Tlen kijtoua Biblia: “Akin ixtlamatki amo san niman kualani uan kitlakaitaskej porque tetlapojpoluia” (Proverbios 19:11).

  ¿Ken tikchiuaskej? Xamo totatajuan techiluiskej itlaj tlen techyolkokos noso amo kitlasojkamatiskej tlen tikinchiuiliaj. Tla ijkon panoua, ma timotlajtlanikan: “¿Ken nimomachiliskia tla ayakmo uelis nikchiuaskia seki tlamantli? ¿Kuali nimomachiliskia?”. Tla timokuayejyekouaj tlen kimachiliaj totatajuan uan tikintlapojpoluiaj, amo panos miak tlamantli oui.

• Ximotlajtlani.

  Tlen kijtoua Biblia: “Itlaj amo kuali kisa ijkuak amo tetlajtlaniaj, pero nochi kuali kisa ijkuak kintlajtlaniaj oksekimej tlen kichiuaskej” (Proverbios 15:22).

  ¿Ken tikchiuaskej? Ma titlajtlanikan ken uelis mopajtiskej totatajuan. Noijki ma titlajtlanikan ken kinpaleuiaj akinmej yikipiaj miak xiuitl kanin chantij. Ma timotlapouikan inmiuan oksekimej tlen noijki kinmaluiaj intatajuan. Ma timotlapouikan inmiuan tokniuan ken uelis tikinpaleuiskej totatajuan.

  

• Amo ma timosotlauakan.

  Tlen kijtoua Biblia: “Ixtlamatilistli kajki iuan akinmej yolyamankej” (Proverbios 11:2).

  ¿Ken tikchiuaskej? Ma tikchiuakan san tlen se uelis. Ma tikilnamiktokan amo nochipa tiuelij uan timajxiliaj tikinpaleuiskej totatajuan. Tla timosotlauaj ijkuak tikinpaleuiaj totatajuan, ma tikinmiluikan tofamiliares noso tepajtijkej ma techpaleuikan.

• Ma timomaluikan.

  Tlen kijtoua Biblia: “Amaka kikokolia ikuerpo, yej kimalwia iwa kitlakualtia” (Efesios 5:29).

  ¿Ken tikchiuaskej? Moneki tikinmaluiskej totatajuan pero noijki moneki timomaluiskej tejuan uan akinmej yomonamiktijkej moneki kimaluiskej infamilia (Eclesiastés 4:6). Ualeua moneki timoseuiskej uan ijkon amo tikitaskej oui tikinmaluiskej totatajuan.

¿Kijtoua Biblia moneki tochan tikinmaluiskej totatajuan?

Biblia amo kijtoua kanin moneki tikinmaluiskej. Sekimej kinkauiliaj intatajuan ma yetokan inchan. Pero ualeua xamo kitaj moneki kinuikaskej kanin kinmaluiaj akinmej yikipiaj miak xiuitl. Uelis monechikoskej ken familia para kitaskej tlen uelis kichiuaskej (Gálatas 6:4, 5).